အမေရိကန်၊ ဗြိတိန်အပါအဝင် အီးယူအဖွဲ့ဝင်နိုင်ငံများမှ သံအမတ်ကြီးများက အမျိုးသားညီညွတ်ရေးအစိုးရ (NUG)ကို ကြိုဆိုထောက်ခံပြီး ပူးပေါင်းဆောင်ရွက်မည်ဟု ပြောကြားကြောင်း NUG က ယနေ့ (ဧပြီ ၂၃ ရက်)တွင် ထုတ်ပြန်သည်။
အမျိုးသားညီညွတ်ရေးအစိုးရ၏ နိုင်ငံခြားရေးဒုဝန်ကြီးသည် မြန်မာနိုင်ငံဆိုင်ရာသံအမတ်ကြီးများနှင့် တွေ့ဆုံကာ ၎င်းတို့အစိုးရ၏ မူဝါဒများ၊ အစိုးရက ဆောင်ရွက်မည့် ရေတိုရေရှည်လုပ်ငန်းများကို ရှင်းလင်းဆွေးနွေးခဲ့သည်ဟု ဆိုသည်။
အွန်လိုင်းမှတစ်ဆင့်ပြုလုပ်ခဲ့သည့် အထက်ပါအစည်းအဝေးတွင် အမေရိကန်၊ ဗြိတိန်၊ ကနေဒါ၊ ဩစတြေးလျ၊ နယူးဇီလန်နှင့် အီးယူသံအမတ်ကြီးဦးဆောင်သော ဂျာမနီ၊ ပြင်သစ်၊ ချက်၊ ဆွီဒင် စသည့် ဥရောပသမဂ္ဂအဖွဲ့ဝင်နိုင်ငံများမှ သံအမတ်ကြီးများ၊ အာဆီယံအဖွဲ့ဝင်နိုင်ငံများမှ သံတမန်များနှင့် တာဝန်ရှိသူများ တက်ရောက်ခဲ့သည်ဟု ထုတ်ပြန်ချက်၌ ဖော်ပြသည်။
သံအမတ်ကြီးများက အမျိုးသားညီညွတ်ရေးအစိုးရဖွဲ့စည်းခြင်းကို ကြိုဆိုထောက်ခံကြောင်း၊ ဆက်လက်၍ လိုအပ်သည့် လုပ်ငန်းများတွင် အကူအညီပေးပြီး ပူးပေါင်းဆောင်ရွက်သွားမည်ဖြစ်ကြောင်းနှင့် ထိုကဲ့သို့ သံတမန်ရေးတွေ့ဆုံဆွေးနွေးမှုများကို အမျိုးသားညီညွတ်ရေးအစိုးရ၏ နိုင်ငံခြားရေးဌာနက ဦးဆောင်ကာ ဆက်လက်ပြုလုပ်သွားမည်ဟု ဆိုသည်။
အထက်ပါ တွေ့ဆုံပွဲတွင် နိုင်ငံခြားရေးဝန်ကြီးဌာနမှ ဒုတိယဝန်ကြီး ဦးမိုးဇော်ဦး၊ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းနှင့် နိုင်ငံတကာဆက်ဆံရေးတာဝန်ခံ ဦးထင်လင်းအောင်တို့ တက်ရောက်ရှင်းလင်းခဲ့သည်။
