လွိုင်ကော်တွင် ဆန္ဒပြသူများအား ရဲက ယနေ့နံနက်ပိုင်းတွင် ရာဘာကျည်ဖြင့် ပစ်ခတ်ခဲ့ဖြိုခွဲခဲ့သဖြင့် အနည်းဆုံး ဆန္ဒပြသူ ၄ ဦးထက်မနည်း ရာဘာကျည်ထိမှန်ခဲ့ကြောင်း ဆန္ဒပြသူများက ပြောသည်။
လက်၊ ဝမ်းဗိုက်နှင့် ရင်အုပ်တို့တွင် ရာဘာကျည်ထိမှန်ခဲ့သော ဆန္ဒပြသူများ၏ ဓာတ်ပုံများကို ဒေသတွင်းသတင်းဌာနများက Facebook တွင် လွှင့်တင်ခဲ့ကြသည်။
“ကျွန်တော်တို့ ပြည်နယ်ခန်းမရှေ့အရောက်မှာ သူတို့က အင်အားနဲ့ ပိတ်ဆို့ထားတယ်။ ကျွန်တော်တို့ ညှိနှိုင်းတာကို ဖြတ်ခွင့်မပေးတာနဲ့ အတင်းဖောက်ထွက်တာမှာ ရာဘာကျည်နဲ့ပစ်တာ” ဟု ဆန္ဒပြသူများထဲမှ တစ်ဦးဖြစ်သည့် ကိုမျိုးလှိုင်ဝင်းက ပြောသည်။
ယနေ့နံနက်ပိုင်းမှ စတင်ခဲ့သည့် ဆန္ဒပြပွဲသည် လွိုင်ကော်တွင် စိုက်ထူထားသည့် ဗိုလ်ချုပ်ကြေးရုပ်ကို ပြန်လည်ဖယ်ရှားပေးရန်၊ ကြေးရုပ်ကို အတင်းအကျပ်စိုက်ထူခဲ့သည့် ပြည်နယ်ဝန်ကြီးချုပ်နှင့် စီမံဘဏ္ဍာဝန်ကြီးတို့အား ရာထူးမှ နုတ်ထွက်ပေးရန် တောင်းဆိုနေကြသည်။
ဆန္ဒပြသူများက ၎င်းတို့သည် ဗိုလ်ချုပ်အောင်ဆန်းကို ဆန့်ကျင်နေခြင်းမဟုတ်ဘဲ ဗိုလ်ချုပ်အောင်ဆန်း၏ ကတိကဝတ်ကို အကောင်အထည်အဖော်ဘဲ ရုပ်တုကိုသာ အတင်းအကျပ် စိုက်ထူခဲ့ခြင်းအတွက် ကန့်ကွက်ခြင်းဖြစ်ကြောင်း ဟောပြောခဲ့ကြသည်။
မြို့တွင်းလှည့်လည် ဆန္ဒပြကြသည့် လူအုပ်သည် နံနက် ၁၀ နာရီခန့်တွင် ဗိုလ်ချုပ်ကြေးရုပ်စိုက်ထူထားသည့် လွိုင်ကော်မြို့လယ်ပန်းခြံရှေ့တွင် ထိုင်သပိတ်ဆင်နွှဲနေကြသည်။ ဆန္ဒပြသူများက အစိုးရအရာရှိများအား ယနေ့နေ့လယ် ၁၂ နာရီမတိုင်မီ လာရောက်ညှိနှိုင်းရန် တောင်းဆိုခဲ့ကြပြီး လာရောက်မတွေ့ဆုံပါက ပိုမိုပြင်းထန်သည့် တုံ့ပြန်မှုကို တွေ့ကြုံရမည်ဟုလည်း သတိပေးကြသည်။
