ကရင်ပြည်နယ် မြဝတီမြို့တောင်ပိုင်း မင်းလက်ပံဒေသမှာ စစ်တပ်က စစ်အင်အား ထပ်မံဖြည့်တင်းနေပြီး ကရင်အမျိုးသားလွတ်မြောက်ရေးတပ်မတော် KNLA ဦးဆောင်တဲ့ တော်လှန်ရေးပူးပေါင်းတပ်တွေနဲ့ တိုက်ပွဲတွေ ပိုမိုပြင်းထန်လာနိုင်တဲ့ အခြေအနေကြောင့် ထိုင်း-မြန်မာနယ်စပ်တလျှောက် လုံခြုံရေးစိုးရိမ်မှုတွေ မြင့်တက်နေပါတယ်။
မြန်မာဘက် မင်းလက်ပံဒေသနဲ့ သောင်ရင်းမြစ်သာ ခြားထားတဲ့ ထိုင်းနိုင်ငံ မဲဆောက်မြို့နယ် မယ်ကို့ကင်းကျေးရွာမှာရှိတဲ့ စာသင်ကျောင်းတချို့ကို လက်နက်ကြီးကျည် ကျရောက်နိုင်ခြေရှိတယ်ဆိုတဲ့ သတိပေးချက်တွေအပြီး ဇွန်လ ၂၂ ရက်ကစပြီး ယာယီပိတ်ထားလိုက်ပါတယ်။ ကျောင်းသား၊ ကျောင်းသူတွေနဲ့ ဆရာ၊ ဆရာမတွေရဲ့ ဘေးကင်းလုံခြုံရေးအတွက် အရေးပေါ်ဆောင်ရွက်တာဖြစ်ပြီး ထိုင်းအာဏာပိုင်တွေဘက်ကလည်း သောင်ရင်းမြစ်တလျှောက် ကင်းလှည့်မှုတွေ တိုးမြှင့်ထားပါတယ်။
မင်းလက်ပံဒေသမှာ ဇွန်လ ၂၂ ရက်ကစပြီး နှစ်ဖက်တိုက်ပွဲတွေ အပြင်းအထန်ဖြစ်ပွားနေသလို ထိုင်းဘက်ခြမ်းကိုလည်း ကျည်ဆန်ကျရောက်မှုတွေ ရှိနေတယ်လို့ ဒေသခံတွေက ပြောပါတယ်။ တိုက်ပွဲတွေ ပြင်းထန်လာတဲ့အတွက် ဒေသခံအချို့ဟာ ထိုင်းနိုင်ငံဘက်ခြမ်းကို တိမ်းရှောင်နေကြရပြီး နယ်စပ်ဒေသတလျှောက် စိုးရိမ်မှုတွေ ဆက်လက်မြင့်တက်နေပါတယ်။
ကိုလှိုင်း/ Myanmar Now
Myanmar Now ဆက်လက်ရပ်တည်နိုင်ရေးအတွက် လစဥ်ငွေအနည်းငယ်ဖြင့် https://myanmar-now.org/mm/members/ တွင် ကူညီနိုင်ပါသည်။
