ဖမ်း၍မကုန်သော တရုတ်ကျားဖြန့်နှင့် စစ်တပ်၏ သံသယဖြစ်ဖွယ် နှိမ်နင်းမှုပုံသဏ္ဌာန်  

ခေတ်အဆက်ဆက် စစ်ဗိုလ်ချုပ်များ၏ မူးယစ်ဆေးဝါးနှိမ်နင်းမှု မအောင်မြင်ရသည့် အကြောင်းရင်းမှာ ဖမ်းမိ သမျှ မူးယစ်ဆေးဝါးများ ပိုင်ရှင်မဲ့ ဖြစ်သွားခြင်း သို့မဟုတ် ထိုမူးယစ်ဆေးဝါးများ အခကြေးငွေယူ သယ်ယူ ပို့ဆောင်ပေးကြသူကိုသာ ဖမ်းဆီးပြခြင်းဖြင့် နိဂုံးချုပ်သွားခြင်းကြောင့် ဖြစ်သည်။ မည်သည့်အခါကမျှ မူးယစ် ဂိုဏ်းခေါင်းဆောင် ဘိန်းဘုရင်များကို ဖမ်းမိသည့်သတင်း၊ မူးယစ်ဆေးဝါးငွေကြေးများကို စုံစမ်းဖော်ထုတ် သိမ်းဆည်းနိုင်ခဲ့သည့်သတင်း ပြည်သူများ မကြားမိဖူးပါ။ မြန်မာပြည်သူများအတွက် အံ့ဩစရာမဟုတ်သော ထိုဖြစ်ရပ်များက စစ်ဗိုလ်ချုပ်များ၏ အကျင့်ပျက်ခြစားမှု ပြယုဂ်အဖြစ် ဆယ်စုနှစ်များစွာ ရှင်သန်ခဲ့၊ ရှင်သန်နေဆဲ ဖြစ်သည်။ 

ဘိန်းဘုရင်များကို သူဌေးကြီးများအဖြစ် မြှောက်စားခဲ့သည့် စစ်ဗိုလ်ချုပ်များ၏ လုပ်နည်းလုပ်ဟန်ကြောင့် ယနေ့အချိန်ထိ မြန်မာနိုင်ငံသည် ကမ္ဘာပေါ်တွင် ဘိန်းဖြူနှင့် မူးယစ်ဆေးဝါး ထုတ်လုပ်ဖြန့်ဖြူးသော ထိပ်တန်း နိုင်ငံများစာရင်း၏ ထိပ်ဆုံးတွင် အမြဲရှိနေခြင်း ဖြစ်သည်။ စက်တင်ဘာလ ၁၆ ရက်က ၂၀၂၇ ခုနှစ် ဘဏ္ဍာနှစ်အတွက် အမေရိကန်သမ္မတက သတ်မှတ်ဆုံးဖြတ်သည့် မူးယစ်ဆေးဝါး အဓိက ထုတ်လုပ်ရာ သို့မဟုတ် ဖြတ်သန်းရာ ၂၃ နိုင်ငံတွင် မြန်မာနိုင်ငံ ပါဝင်ပြီး၊ ၎င်းတို့အထဲ မူးယစ်ဆေးဝါးတိုက်ဖျက်မှု ကျရှုံး  လေးနိုင်ငံထဲတွင် အာဖဂန်နစ္စတန်၊ ဘိုလီးဗီးယားနှင့် ကိုလမ်ဘီယာနိုင်ငံတို့နှင့်အတူ မြန်မာနိုင်ငံပါဝင်ကြောင်း သတ်မှတ်ခဲ့သည်။

စင်စစ် တရုတ်ကျားဖြန့်နှိမ်နင်းမှု ကနဦးကာလကို ပြန်လည်လေ့လာသုံးသပ်လျှင် မင်းအောင်လှိုင်၏ သစ္စာခံ ကိုးကန့်ခေါင်းဆောင် ပယ်ဆောက်ချိန်၊ ပြည်သူ့စစ်ခေါင်းဆောင် ဝေဆန်းနှင့် ကိုးကန့်သူဌေး မိသားစုဝင်များကို လောက်ကိုင်မြို့မှ ရဟတ်ယာဉ်ဖြင့် ကယ်ဆယ်ခဲ့ပြီး၊ နေပြည်တော်အထိ ခေါ်ယူကာကွယ်စောင့်ရှောက်ထားခဲ့သည် မဟုတ်ပါလား။ တရုတ်အစိုးရ၏ ဖိအားကို မလွန်ဆန်နိုင်သည့်နောက်ဆုံး တရုတ်လက်ထဲ ထိုးအပ်ခဲ့ခြင်း ဖြစ်ပြီး၊ တရုတ်ရဲတပ်ဖွဲ့ဝင်များ နိုင်ငံ၏အာဏာဗဟိုချက် နေပြည်တော်အထိ ဝင်ရောက်ဖမ်းဆီးသွားသည့် ထိုဖြစ်ရပ်သည် ကမ္ဘာ့အလယ် အချုပ်အခြာအာဏာပိုင် နိုင်ငံတစ်ခု၏ အရှက်ရစရာအကောင်းဆုံး သမိုင်းဝင် ဖြစ်ရပ်ကြီး ဖြစ်ခဲ့သည်။ 

ယခုအခါ စစ်ဗိုလ်ချုပ်များသည် ဆယ်စုနှစ်နှင့်ချီပြီး ၎င်းတို့အကျွမ်းကျင်ဆုံး ဟန်ပြမူးယစ်ဆေးဝါးနှိမ်နင်းသည့် နည်းလမ်းအတိုင်း ကျားဖြန့်နှိမ်နင်းရေး လုပ်ဆောင်နေခြင်းဖြစ်ကြောင်း တွေ့မြင်နေရပြီ ဖြစ်သည်။ ကျားဖြန့်ဂိုဏ်းအချို့ကို ဝင်ရောက်စီးနင်းကာ အောက်ခြေလုပ်သားများကို ဖမ်းဆီးပြပြီး၊ ကျားဖြန့်နှိမ်နင်းရေး ကို အင်တိုက်အားတိုက်ဆောင်ရွက်ပြနေသော သတင်းများ ဝါဒဖြန့်သတင်းစာများတွင် ပုံမှန်ဖော်ပြနေသည်။

အာဏာသိမ်းစစ်တပ်၏ ကျားဖြန့်နှိမ်နင်းမှုများကို စောင့်ကြည့် လေ့လာလျက်ရှိသော Myanmar Witness အဖွဲ့က စက်တင်ဘာလ ၁၆ ရက်နေ့ တစ်ရက်တည်းမှာပင် ကရင်ပြည်နယ် မြဝတီမြို့ မြောက်ဘက်ရှိ နာမည်ဆိုးဖြင့် ကျော်ကြားလျက်ရှိသော ရွှေကုက္ကိုမြို့သစ် ကျားဖြန့်စခန်းများအား အာဏာသိမ်းစစ်တပ်က ဖျက်ဆီးမှု ကို စစ်တပ်ဝါဒဖြန့် သတင်းထုတ်ပြန်ချက်များနှင့် မြေပြင်ပကတိအခြေအနေများအား ဂြိုဟ်တုဓာတ်ပုံများဖြင့် နှိုင်းယှဉ်စုံစမ်းလေ့လာခဲ့ပြီး၊ သံသယဖြစ်ဖွယ် ကွာဟချက်များ တွေ့ရှိမှုကို အစီရင်ခံစာ ထုတ်ပြန်ခဲ့သည်။ 

ထို့အပြင် ကျားဖြန့်ဂိုဏ်းခေါင်းဆောင်များ ဖမ်းဆီးနိုင်ရေးနှင့် ၎င်းတို့လိမ်လည်ရယူထားခဲ့သော ငွေကြေးများ ဖော်ထုတ်သိမ်းဆည်းနိုင်ခြင်း သို့မဟုတ် ထိုသို့သိမ်းဆည်းနိုင်ရေး ကြိုးပမ်းဆောင်ရွက်နေမှုကို မည်သည့်အခါ ကမျှ ထုတ်ပြန်ခဲ့ခြင်း မရှိပါ။ 

“၁၀၂၇ စစ်ဆင်ရေး” မတိုင်မီ အာဏာသိမ်းစစ်တပ်၏ အုပ်ချုပ်မှုအောက်တွင် အပြည့်အဝရှိနေသော မြန်မာ- တရုတ်နယ်စပ် ကိုးကန့်ဒေသလောက်ကိုင်မြို့နှင့် မြန်မာ- ထိုင်းနယ်စပ် ကရင်ပြည်နယ် မြဝတီမြို့တွင် အခိုင်အမာ တည်ဆောက်ထားသော ကျားဖြန့် လုပ်ငန်းခွင် အဆောက်အအုံများထဲ အင်အား ထောင်သောင်းချီသော တရုတ်နိုင်ငံသားများ နယ်စပ်ဖြတ်ကျော် ရောက်ရှိလုပ်ကိုင်နေခြင်းကို ဒေသန္တရအာဏာပိုင်များ၊ စစ်ဒေသဌာနချုပ်များမှ အရာရှိကြီးများ၊ ရဲတပ်ဖွဲ့ အရာရှိကြီးများ အကျိုးအမြတ်ယူ၍ မျက်နှာလွှဲထားခဲ့ခြင်းကို စစ်တပ်က ယနေ့ အချိန်ထိ ဖုံးကွယ်ထားခဲ့သည်။ အကြောင်းမှာ စစ်ဗိုလ်ချုပ်များကိုယ်တိုင် ပါဝင်ပတ်သက်နေ၍ ဖြစ်သည်။  

ထို့ကြောင့် အာဏာသိမ်းစစ်တပ်၏ ကျားဖြန့်နှိမ်နင်းရေး သတင်းထုတ်ပြန်မှုပုံစံသည် ဆယ်စုနှစ်များစွာ မူးယစ်ဆေးဝါးများ နိုင်ငံအနှံ့ဖမ်းဆီးရမိသော သတင်းထုတ်ပြန်မှု ပုံစံအတိုင်း ထိုမူးယစ်ဆေးဝါများ၏ မူလပိုင်ရှင် မူးယစ်ရာဇာများ၊ ဘိန်းဘုရင်များကို မည်သည့်အခါကမျှ ဖမ်းဆီးရမိခဲ့ခြင်းမရှိသလို၊ ကျားဖြန့်ဂိုဏ်းများ၏ ဂိုဏ်းခေါင်းဆောင်များ ဖမ်းဆီးရမိခြင်းမရှိသည်ကို တွေ့ရှိရသည်။ 

ယခုအခါ ကျားဖြန့်ငွေလိမ်လုပ်ငန်းများသည် လူဦးရေထူထပ်ပြီး၊ တိုက်ခန်းငယ်တစ်ခုတွင် အလွယ်တကူ ခြေရာဖျောက် လျှို့ဝှက်လုပ်ကိုင်နိုင်သော မန္တလေးနှင့် ရန်ကုန်ကဲ့သို့ နိုင်ငံ၏ အဓိက စီးပွားရေးမြို့ကြီးများ အထိ ပျံ့နှံ့နေသည်ကို စက်တင်ဘာလအတွင်း ဖမ်းဆီးရမိမှုများက ညွှန်ပြနေပါသည်။ စက်တင်ဘာလ ၁၉ ရက်တွင် အာဏာသိမ်းစစ်တပ် လက်အောက်ခံ ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနက ပထမ ဆုံးအကြိမ် ရန်ကုန်မြို့တွင် တရားဝင်မှတ်ပုံတင် ရုံးခန်းဖွင့်လှစ် လုပ်ကိုင်နေသော ပြည်တွင်းကုမ္ပဏီ လေးခုနှင့် ကုမ္ပဏီဒါရိုက်တာ လေးဦးကို ကျားဖြန့်လုပ်ငန်း လုပ်ကိုင်မှု၊ မြန်မာကျပ်ငွေနှင့် USDT (ခရစ်တိုငွေကြေး) ငွေလွှဲပြောင်းသည့်လုပ်ငန်း လုပ်ကိုင်မှုများဖြင့် အမည်ပျက်စာရင်းသွင်းလိုက်ကြောင်း ထုတ်ပြန်ကြေညာခဲ့သည်။

၂၀၂၆ ခုနှစ် ဇန်နဝါရီလမှ စက်တင်ဘာလလယ်အထိ အာဏာသိမ်းစစ်တပ် ထုတ်ပြန်ခဲ့သော ကျားဖြန့်ဂိုဏ်း များ ဖမ်းဆီးမှုသတင်းများအရ အောက်ဖော်ပြပါ မြေပုံတွင် ၁၇ မြို့နယ်ကို ဖော်ပြထားပါသည်။ ၎င်းမြို့နယ်များထဲတွင် ရှမ်းပြည်နယ်အတွင်းမှ ၁၄ မြို့နယ်၊ ကရင်ပြည်နယ် မြဝတီမြို့၊ မန္တလေးတိုင်း မန္တလေးမြို့နှင့် ရန်ကုန်တိုင်း ရန်ကုန်မြို့တို့ ဖြစ်သည်။