ရန်ကုန်ဆေးရုံကြီးဝင်းထဲရှိ စည်းမဲ့ကမ်းမဲ့ဈေးသည်တွေကြောင့် ဆေးရုံကြီး၏ ကျန်းမာရေးစောင့်ရှောက်မှုကဏ္ဍတွင် အခက်အခဲများစွာဖြစ်ပေါ်နေကြောင်း ဆေးရုံရှိတာဝန်ရှိသူများက သတင်းမီဒီယာများကို ဖိတ်ခေါ်၍ ပြောဆိုလိုက်သည်။
စည်းမဲ့ကမ်းမဲ့ဈေးရောင်းမှုကြောင့် ကြွက်၊ခြင်၊ ယင် ပိုးမွှားများတိုးပွားနေကြောင်း၊ ဈေးသည်များသည် ဆေးရုံကြီးတွင် ဈေးရောင်းရုံတင်မကဘဲ ဆေးရုံကြီး၏ ရေချိုးခန်းများကို သုံးစွဲခြင်း၊ ဆေးရုံအဆောက်အအုံများတွင် ကျူးကျော်ဝင်ရောက်နေထိုင်ခြင်း၊ အဝတ်အစားများလှန်းခြင်းများပြုလုပ်နေကြောင်း ဆေးရုံအုပ် ဒေါက်တာဒေါ်ခင်သိင်္ဂီမြင့်က ပြောကြားသည်။
ယခုပြဿနာအား ရန်ကုန်တိုင်းဝန်ကြီးချုပ်ဦးဖြိုးမင်းသိန်း၊ မြို့တော်ဝန်ဦးမောင်မောင်စိုး၊ ရန်ကုန်တိုင်းလူမှုရေးဝန်ကြီး ဦးနိုင်ငံလင်းတို့အားလည်း တင်ပြခဲ့ကြောင်း၊ သို့သော်လည်း စည်ပင်သာယာအဖွဲ့များမှ စည်းမဲ့ကမ်းမဲ့ဈေးသည်များကို ခေတ္တခဏမျှသာ ရှင်းပေးနိုင်သောကြောင့် ယခုကဲ့သို့သတင်းမီဒီယာများကို ခေါ်ယူရှင်းလင်းပြောကြားရခြင်းဖြစ်ကြောင်း ဆရာဝန်ကြီးများအဖွဲ့က ပြောသည်။
“ဒီမှာက အလှူအတန်းတွေလည်း များတယ်။ ဒါ့ကြောင့် နေစရာလည်း အလကားရတယ်။ စားစရာလည်း အလကားရတယ်။ ဒီလိုရောနှောနေထိုင်တဲ့ သူခိုးတွေ၊ ခါးပိုက်နှိုက်တွေလည်း ရှိတယ်။ နောက်ပြီး လူနာပွဲစားတွေလည်းရှိတယ်။ ဒီကိစ္စတွေကို ရှင်းကိုရှင်းရမယ့် အနေအထားရောက်နေပြီဆိုတာ ပြည်သူလူထုကို ချပြတဲ့သဘောပါ”ဟု ရန်ကုန်ဆေးရုံကြီး လက်ထောက်ညွှန်ကြားရေးမှူး ဒေါက်တာခင်မောင်ကြီးကလည်း ဆိုသည်။
