(ရန်ကုန်) – စည်းကမ်းမဲ့ရောင်းချနေသည့် ပျံကျဈေးသည်များအရေးအပါအဝင် ရန်ကုန်ဆေးရုံကြီးအတွင်း ဖြစ်ပွားနေသည့် အထွေထွေပြဿနာများအား ဖြေရှင်းရန် အသေးစိတ်စီမံချက်တစ်ခု ရေးဆွဲနေကြောင်း ရန်ကုန်ပြည်သူ့ဆေးရုံ အုပ် ဒေါက်တာခင်မောင်ကြီးက ပြောသည်။
ဆေးရုံအုပ်ချုပ်ရေးအဖွဲ့နှင့် တိုင်းဒေသကြီးအဆင့် အစိုးရဝန်ကြီးများ ပါဝင်ရေးဆွဲမည့် အဆိုပါ စီမံချက်သည် ဆေးရုံကြီးအတွင်း သောင်းကျန်းနေသည့် လူနာပွဲစားများ၊ အလစ်သုတ်သမားများ၊ လောင်းကစားဝိုင်းများနှင့် စည်းကမ်းမဲ့ဈေးသည်များ အပါအဝင် လူနာနှင့် ဆေးဘက်ဆိုင်ရာဝန်ထမ်းများအား အနှောင့်အယှက်ပေးသူများကို ပစ်မှတ်ထားနှိမ်နင်းရန် ရည်ရွယ်ခြင်းဖြစ်သည်။
“စီမံချက်အတည်ဖြစ်တဲ့အခါကျတော့ ကျွန်မတို့ အသေးစိတ်ပြောပါမယ်၊ အခုတော့ ပြောလို့မရသေးပါဘူး” ဟု ဆေးရုံအုပ် ဒေါက်တာခင်သိင်္ဂီမြင့်က ပြောသည်။
ရန်ကုန်မြို့လယ်ရှိ ခုတင်၂၀၀၀ ဆန့်ဆေးရုံကြီးအတွင်း ထိန်းမနိုင်သိမ်းမရဖြစ်နေသည့် ဈေးသည်များနှင့် ပျံကျနေထိုင်သူများအရေး ဆေးရုံတာဝန်ရှိသူများက သတင်းထောက်များအား ဇူလိုင် ၃ရက်တွင် ထုတ်ဖော်ပြောကြားခဲ့အပြီး အဆိုပါစီမံချက်ရေးဆွဲရန် အစိုးရဘက်က အာရုံစိုက်လာခြင်းဖြစ်သည်။
ပြီးခဲ့သည့်လအတွင်းက ရန်ကုန်ဆေးရုံကြီးဝင်း အထွေထွေကုသဆောင်(၁)အနီးတွင် ပျံကျဈေးသည်များအကြား ခိုက်ရန်ဖြစ်ပွားရိုက်နှက်နေကြသည့် ရုပ်သံဖိုင်တစ်ခု လူမှုကွန်ရက် ဖေ့ဘွတ်စ်စာမျက်နှာပေါ်တွင် ပျံ့နှံ့သွားပြီး ဝေဖန်မှုများ မြင့်တက်လာခဲ့သည်။
ပျံကျဈေးသည်များကို ထိန်းသိမ်းဖို့ရန်အတွက် အခက်အခဲရင်ဆိုင်နေရသောကြောင့် ယခုလို စီမံချက်ရေးဆွဲရန် စီစဉ်ခြင်းဖြစ်ကြောင်း ဇူလိုင် ၃ ရက်နေ့က မီဒီယာများနှင့် တွေ့ဆုံစဉ် ဒေါက်တာခင်သိင်္ဂီမြင့်က ပြောသည်။
“ ဈေးသည်တွေကို ကျွန်မတို့သွားပြောရင် ခဏနာခံလိုက် ပြီးရင် ပြန်လုပ်လိုက်ဆိုတော့ လိုက်တမ်းပြေးတမ်းကစားသလို ဖြစ်နေတာပေါ့” ဟု ၎င်းက ပြောသည်။
ရန်ကုန်ဆေးရုံကြီးအရေး ဇူလိုင် ၅ ရက်နေ့က ရန်ကုန်တိုင်းလွှတ်တော် လူမှုရေးနှင့် စီမံခန့်ခွဲရေးကော်မတီမှ ဥက္ကဋ္ဌ ဦးသာအောင်နှင့် အဖွဲ့ဝင်များ ဆေးရုံအုပ်ချုပ်ရေးအဖွဲ့ဝင်များနှင့် တွေ့ဆုံခဲ့ပြီး စီမံချက်အမြန်ဆုံး အကောင်အထည်ဖော်နိုင်ရေးအတွက် တိုင်းအစိုးရကို ဖိအားပေးသွားမည်ဖြစ်ကြောင်း ပြောကြားသည်။
