လက်ထဲရောက်လာနိုင်သော တစ်သောင်းတန် အတု

ဒိုက်ဦး — ပဲခူးတိုင်းဒေသကြီး၊ ဒိုက်ဦးမြို့နယ်မှ နော်သောသွဲ့မှူးသည် စင်ကာပူတွင် လစာနည်း အိမ်အကူအဖြစ် လုပ်ကိုင်ပြီး ဇာတိမြေသို့ ဒီဇင်ဘာလဆန်းတွင် ပြန်ရောက်လာခြင်းမှာ ခရစ္စမတ်ကာလတွင် မိသားစု စုံစုံညီညီ ထမင်းစားပြီး ဆုတောင်းပွဲ ပြုလုပ်နိုင်ရေးအတွက် ဖြစ်သည်။

အလုပ်ရှင်ကလည်း သူ့လုပ်ခငွေများကို စင်ကာပူရှိ ငွေလဲကောင်တာတွင် မြန်မာငွေဖြင့် လဲလှယ်ပြီး ထည့်ပေးလိုက်သည်။ သို့သော်လည်း စိတ်ကူးထားကြသည့်အတိုင်း ခရစ္စမတ်နေ့တွင် သူတို့မိသားစု စုံစုံလင်လင် ပျော်ရွှင်စွာ နေထိုင်ကြရေး အစီအစဉ်ကို ထိခိုက်စေနိုင်သည့် ဖြစ်ရပ်တစ်ခု ပေါ်ပေါက်လာသည်။

ယင်းမှာ စင်ကာပူမှ ယူလာသော ကျပ်တစ်သောင်းတန်တချို့မှာ အတုဖြစ်နေသောကြောင့် နယ်မြေရဲတပ်ဖွဲ့က သူ့ကို ထိန်းသိမ်းလိုက်သည် ဟူသော ဖြစ်ရပ်ပင်။ မိသားစုအတွက်မူ ၂၅ နှစ်အရွယ် နော်သောသွဲ့ထူးသည် မိဘနှစ်ပါး၊ ညီမနှစ်ယောက်တို့ကို ရှာဖွေကျွေးမွေးသူဖြစ်သည်ဟု သူ၏မိခင် ဒေါ်သီသီခိုင်က ပြောသည်။

“တစ်အိမ်လုံးက သူ့လုပ်စာနဲ့ပဲ စားနေကြတာ။ ဒီတစ်ခေါက်ပြန်လာတာ နောက်ဆုံးပဲ တဲ့။ သူပြန်မသွားချင်တော့ဘူး တဲ့။ ရလာတဲ့ပိုက်ဆံလေးနဲ့ သားအမိတွေ ကုန်စုံဆိုင်လေး ဖွင့်မယ် စိတ်ကူးထားတာ” ဟု ၄၅ နှစ်အရွယ် ဒေါ်သီသီခိုင်က တိမ်ဝင်နေသောအသံကို ထိန်းကာ ပြောပြသည်။

သမီးဖြစ်သူ အရေးယူခံရခြင်းကြောင့် ဒီဇင်ဘာလကို စောင့်ဆိုင်းနေကြသော မိသားစု တုန်လှုပ်သွားသည်။

ဤဖြစ်ရပ်မတိုင်မီ ရက်ပိုင်းအလိုကလည်း ရန်ကုန်တွင် နိုင်ငံခြားသားတချို့ တစ်သောင်းတန်အတု ကိုင်ဆောင်မှုဖြင့် ဖမ်းဆီးခံရပြီး ဖြစ်ရာ ဤသတင်း ကြားသိရသူ အများအပြား အနည်းနှင့်အများ တုန်လှုပ်သွားကြသည်။

နိုင်ငံအနှံ့အပြား ချက်လက်မှတ်၊ ဘဏ်ကတ် အသုံးပြုမှု နည်းပါးပြီး ငွေသားအသုံးပြုမှု တွင်ကျယ်နေသည့် အခြေအနေတွင် လူအများအပြားသည် အတုအစစ် အလွယ်တကူ ခွဲခြားရန် ခက်ခဲသော တစ်သောင်းတန် ငွေစက္ကူနှင့် မကင်းနိုင်ကြသောကြောင့် ဂယက်ရိုက်ခတ်နေခြင်း ဖြစ်လေသည်။

ငွေတုဖြင့် စျေးဝယ်ထွက်မိခြင်း

စတုတ္ထတန်းအထိသာ တက်ရောက်ခဲ့ဖူးသည့် နော်သောသွဲ့ထူးသည် ညီမနှစ်ယောက်၏ ကျောင်းစရိတ်ကို နှစ်စဉ် ရှာဖွေထောက်ပံ့နေသူ ဖြစ်သည်။

စင်ကာပူမှပြန်ရောက်လာသည့် သူ့ကို ကြည့်ပြီး ဒေါ်သီသီခိုင် မကြာခဏ စိတ်မကောင်း ဖြစ်ခဲ့ရသည်။ စင်ကာပူတွင် အိမ်အကူလုပ်ခြင်းဖြင့် တစ်လလျှင် ကျပ် လေးသိန်းမှ ငါးသိန်းအထိ ရနိုင်သော်လည်း သမီးဖြစ်သူသည် စင်ကာပူတွင် အိမ်ထောင်စုနှစ်စု၏ ဝေယျာဝစ္စကို ပင်ပန်းကြီးစွာ လုပ်ရသူဖြစ်သည်ဟု ဒေါ်သီသီခိုင်က ပြောသည်။

ရဲစခန်းအချုပ်တွင် ရောက်ရှိနေသည်မှာ ဆယ်ရက်ကျော်ပြီဖြစ်သော ပါးဖောင်းဖောင်း၊ မျက်နှာချိုချို သမီးဖြစ်သူက မိခင်ကို ပြန်လည် အားပေးသည့်အနေအထား ဖြစ်နေသည်။

“အချုပ်ထဲမှာ အဝေးကြီးကနေ လှမ်းပြောရတယ်။ သူကတော့ အမေကို ပြုံးပြနေတာပဲ။ နာရေးကူညီမှု အသင်းကလည်း ထမင်း လာပို့တယ်။ သူအဆင်ပြေပါတယ် တဲ့၊ မျက်ရည်ဝဲဝဲနဲ့ပဲ ပြုံးပြီးပြောတယ်။ မျက်ရည်ဝဲနေတော့ ရင်ထဲ ဆို့သွားတာပေါ့။ ဟိုဒီကြည့်ပြီးမှ သူ့ကိုပြန်ပြောရတယ်” ဟု ၄င်းက ပြောသည်။

ဖခင်မှာလည်း သမီးစိတ်ဖြင့် အစားအသောက်မမှန်တော့ဘဲ “မိုးမလင်းသေးဘူး၊ ထထငိုတယ်” ဟု ဒေါ်သီသီခိုင် မျက်ရည်ဝဲကာ ပြောပြသည်။

ဒီဇင်ဘာ ၂ တွင် စင်ကာပူမှ ပြန်ရောက်ပြီးနောက် ဒိုက်ဦးမြို့ပေါ်တွင် စျေးဝယ်သည်။ သစ်ဆန်းထွန်း ကုန်စုံဆိုင်တွင် ဆန်သုံးအိတ်၊ ဖွဲနှစ်အိတ်ဝယ်ယူခဲ့သည်။ ဒီဇင်ဘာ ၄ တွင် Hello ဖုန်းဆိုင်သို့ ရောက်သောအခါ သူပေးချေမည့် ငွေမှာ အတုဖြစ်နေကြောင်း ဖုန်းဆိုင်က ပြောပြသဖြင့် ၎င်းတို့သားအမိသည် ဗျာများသွားပြီး ကျေးရွာလူကြီးများထံ အကူအညီ တောင်းခံခဲ့သည်။ ရွာလူကြီးတို့က သူတို့ကို ရန်ကုန်အခြေစိုက် မြန်မာနိုင်ငံလုံးဆိုင်ရာ အလုပ်သမား သမဂ္ဂများ အဖွဲ့ချုပ်နှင့် ချိတ်ဆက်ပေးလိုက်သည်။

အဖွဲ့ချုပ်မှ လက်ထောက်ဌာနမှူး ကိုဟိန်းလတ်က ထိုငွေစက္ကူများကို ဘဏ်သို့ ယူသွားပြီး စစ်ဆေးရန်၊ ငွေအတုဖြစ်မှန်း သေချာပါက ရဲစခန်းသို့သွားရောက်အပ်နှံရန် အကြံပေးခဲ့ကြောင်း ပြောသည်။

ဒီဇင်ဘာ ၆ နံနက်ပိုင်းတွင် ဘဏ်သို့ သွားကြစဉ် ဆန်ရောင်းခဲ့ဖူးသည့် သစ်ဆန်းထွန်းကုန်စုံဆိုင်က ၎င်းတို့ သားအမိကို ခေတ္တ ခေါ်ထားပြီး မြို့နယ်အုပ်ချုပ်ရေးမှူးရုံးသို့ အကြောင်းကြားခဲ့သည်ဟု ဒေါ်သီသီခိုင် ပြောသည်။ ထို့နောက် ၎င်းတို့ သားအမိကို ထိုရုံးက ခေါ်ဆောင်ကာ ငွေစက္ကူများ ဖြန့်ပြီး ဓာတ်ပုံ ရိုက်ကြကြောင်း၊ နေအိမ်သို့ ပြန်စေကာ အိမ်တွင်ပင် ဖမ်းဆီးခဲ့ခြင်း ဖြစ်ကြောင်း သူက ဆက်ပြောသည်။

ဒေါ်သီသီခိုင်က အာဏာပိုင်တို့အနေဖြင့် ငယ်သည့်အမှုကို ပပျောက်အောင် လုပ်သင့်သည်ဟု ဆိုသည်။

“သူတို့(ရဲစခန်း)ကို ပြောပစ်လိုက်ချင်တာပေါ့။ လုံးဝမှ မတရားဘူး။ ကျွန်မ သမီး ပြန်မလွတ်ဘူး၊ ကျပြီ ဆိုလို့ကတော့ ဘယ်ကို လိုက်ရ လိုက်ရ၊ အထက်ထိတိုင် ဆိုလည်း တိုင်မှာ။ ကိုယ့်လက်ထဲလည်း ငွေလည်း မရှိတော့ဘူး။ သူပြန်လွတ်ရင်ကျေနပ်ပါပြီ” ဟု ၎င်းက မချိတင်ကဲ ဆိုသည်။

အာမခံ ရရှိရေး

ဒိုက်ဦးမြို့ ငွေတု အဖမ်းအဆီး သတင်းကို အာဏာပိုင်တို့ ထုတ်ပြန်ရာတွင် အဓိက အချက်တချို့ မပါဝင်ကြောင်း၊ ငွေအတု ဟုတ်မဟုတ် စစ်ဆေးရန် ဘဏ်သို့ သွားရောက် အကူအညီတောင်းစဉ် ဖမ်းဆီးခံရခြင်း ဖြစ်သည်ဟူသော အချက်ကို အများပြည်သူ သိစေလိုကြောင်း အလုပ်သမား သမဂ္ဂများ အဖွဲ့ချုပ်မှ ကိုဟိန်းလတ်က ပြောသည်။ နော်သောသွဲ့ထူး လွတ်မြောက်ရေးအတွက် ဆောင်ရွက်ရာတွင် စင်ကာပူ အလုပ်ရှင်ဟောင်း၏ အကူအညီကိုလည်း ရယူကြမည်ဟု သူက ဆက်ပြောသည်။

“အလုပ်ရှင်အနေနဲ့ စင်ကာပူဆိုင်ရာ မြန်မာသံရုံးမှာ ဒီငွေတွေကို သူတို့ကိုယ်တိုင် ငွေလဲကောင်တာကနေ သွားလဲပေးတယ်ဆိုတာ သွားရောက်ထွက်ဆိုပေးဖို့ စာပို့ထားတယ်။ အခုထိတော့ အကြောင်း မပြန်သေးဘူး” ဟု ကိုဟိန်းလတ်က ပြောသည်။

လတ်တလောတွင် မြန်မာပြည်ပအလုပ်အကိုင်ဝန်ဆောင်မှုလုပ်ငန်းရှင်များအဖွဲ့က မိသားစုကို ကျပ် ဆယ်သိန်း လှူဒါန်းထားကြောင်း သိရသည်။

ပဲခူးတိုင်းဒေသကြီးအစိုးရ၊ ကရင်တိုင်းရင်းသားရေးရာ ဝန်ကြီး နော်ပွယ်စေးကလည်း နော်သောသွဲ့ထူး အာမခံ ရရှိရန် ကြားဝင် ကူညီနေပြီး မိသားစုထံ သွားရောက် တွေ့ဆုံ အားပေးခဲ့သည်။ အချုပ်ခန်းသို့လည်း သွားရောက် တွေ့ဆုံခဲ့သည်ဟု ဒေသခံတို့ထံမှ သိရသည်။

အာမခံ ရမည်ဟု အမှုတွင် လိုက်ပါဆောင်ရွက်ပေးနေသည့် ဥပဒေအကြံပေးက မျှော်လင့်နေသည်။

အထူးဥပဒေတွင် အာမခံပေးခွင့်မရှိသောအမှုဟု သတ်မှတ် မထားကြောင်းလည်း သူက ထောက်ပြသည်။

ဤအမှု မတိုင်မီ ရက်ပိုင်းအလိုက တစ်သောင်းတန်အတု ကိုင်ဆောင်မှုဖြင့် အထိန်းသိမ်းခံရသည့် နိုင်ငံခြားသား သုံးဦး ရှိရာ ၎င်းတို့ထဲမှ တစ်သောင်းတန်အတု ၄၅ ရွက်ဖြင့် ဖမ်းဆီးရမိသည်ဟူသော စင်ကာပူနိုင်ငံသား ဇနီးမောင်နှံကို တရားရုံးက အာမခံဖြင့် ပြန်လွှတ်ပေးပြီးဖြစ်သည်။

တစ်သောင်းတန်အတု ၄၁ ရွက်ဖြင့် ဖမ်းမိသည်ဟူသော ထိုင်းအမျိုးသမီး၏ အမှုအခြေအနေအကြောင်း မသိရသေးပေ။

ရခိုင်ဒေသ ပဋိပက္ခကြောင့် မြန်မာနိုင်ငံသို့ နိုင်ငံခြားဧည့်သည် လာရောက်ရေး အဟန့်အတား ဖြစ်နေရာ အစိုးရက ပြည်ပခရီးသွားများ အထူးသဖြင့် အာရှခရီးသွားများ ပိုမို ဝင်ရောက်လာရန် စီစဉ်နေချိန်ဖြစ်သည်။ ဤအခြေအနေတွင် အစိုးရ၏ စာနယ်ဇင်းများနှင့် သတင်းထုတ်ပြန်ရေးဌာနများက နိုင်ငံခြားသားတချို့ကို ထိုသို့ အရေးယူလိုက်ခြင်းနှင့် ပတ်သက်ပြီး သတင်းအမှောင်ချထားသည်။

၎င်းတို့သည် ငွေအတုမှန်းသိလျက်နှင့် လက်ဝယ်ထားရှိ သုံးစွဲခြင်း ဟူသော ဗဟိုဘဏ်ဥပဒေ ပုဒ်မ ၁ဝ၅ နှင့် တရားစွဲခံနေရခြင်း ဖြစ်သည်။ ပြစ်မှုကျူးလွန်ကြောင်း ထင်ရှားပါက ငွေဒဏ် သို့မဟုတ် ၃ နှစ်ထက် မပိုသော ထောင်ဒဏ် ချမှတ်ခံရမည်ဖြစ်သည်။

သို့သော်လည်း ထိုနိုင်ငံခြားသားတို့နှင့် မတူသော အခြေအနေတစ်ခု နော်သောသွဲ့ထူးထံတွင် ရှိနေသည်။ ၎င်းသည် ငွေအတုကို ပြည်ပမှ ပြည်တွင်းသို့ သယ်ဆောင်လာမှု ပုဒ်မ ၁ဝ၆ ဖြင့်လည်း အရေးယူခံနေရသည်။ ထိုပုဒ်မသည် ထောင်ဒဏ် ၁ဝ နှစ်မှ နှစ်၂ဝ အထိ ချမှတ်နိုင်သည့် ပုဒ်မဖြစ်သည်။

ယခင်က မိတ္တူကူးစက်ဖြင့် ထုတ်လုပ်သည့် ငွေစက္ကူတုပမှုကို အများအပြား ဖမ်းဆီးရမိခဲ့သည်ဟု ဝင်းမြင့် (ဗဟိုဘဏ်) ကလောင်အမည်ဖြင့် ရေးသားသည့် ဆောင်းပါးတစ်ပုဒ်ကို ဒီဇင်ဘာ ၁၄ ရက်နေ့ထုတ် ကြေးမုံသတင်းစာတွင် ဖော်ပြခဲ့သည်။

“ယခုတွေ့ရှိရတာတွေကတော့ တစ်ဦးချင်းစီက စုပြီး တွေ့ပြီးတော့ ပြည်ပက ဝင်လာတာတွေပဲ ဖြစ်ပါတယ်။ ဘယ်လိုပုံစံနဲ့ တုပထားတယ် ဆိုတာကတော့ မထုတ်ပြန်သေးပါဘူး။ ပြည်ပ တာဝန်ရှိအဖွဲ့ အစည်းတွေကလည်း ဆက်စပ် ကွင်းဆက်တွေကို စစ်ဆေး နေတာဖြစ်တဲ့အတွက် ရင်းမြစ်ကို ဖော်ထုတ် အရေးယူနိုင်မယ်လို့ မျှော်လင့်ပါတယ်” ဟု ဆောင်းပါးတွင် ဖော်ပြထားသည်။

၂ဝ၁၂ နှစ်လယ်ပိုင်းတွင် စတင် ထုတ်ဝေသော ကျပ်တစ်သောင်းတန် ငွေစက္ကူကို အတုပြုလုပ်သုံးစွဲမှု သတင်းများ မကြာခဏ ထွက်ပေါ်ခဲ့သည်။

တစ်သောင်းတန် အတုများမှာ ထိုင်း၊ တရုတ် နယ်စပ်ဒေသများမှ အလုံးအရင်း ဝင်ရောက်လာသည်များ ရှိသကဲ့သို့ မြန်မာနိုင်ငံအတွင်း ထုတ်လုပ်မှုများလည်း ရှိသည်ဟု အာဏာပိုင်တို့ကို ကိုးကားပြီး စာနယ်ဇင်းများတွင် ရေးသားနေကြသည်။

မိမိကိုင်ဆောင်သည့် ငွေသားထဲတွင် တစ်သောင်းတန်ငွေအတု အနည်းငယ် ပါဝင်နေသည့် ဖြစ်ရပ်မျိုးက အနယ်နယ် အရပ်ရပ်တွင် မကြာခဏ ပေါ်ပေါက်နေသည်။ ဒိုက်ဦးမြို့ ရဲဌာန အချုပ်ခန်းတွင်မူ နော်သောသွဲ့ထူးသည် ငွေအတု ကိုင်ဆောင်မှု၊ ပြည်ပမှ သယ်ဆောင်မှုတို့ဖြင့် အမှု ရုတ်တရက် ရင်ဆိုင်နေရပြီး အာမခံရရှိရန် မျှော်လင့်နေသည်။

ဒိုက်ဦး၊ စစ်ဗိုလ်ကြီးကျေးရွာအုပ်စု ဥက္ကဋ္ဌ ဦးလှဝင်းက ကျေးရွာတွင် အနေအေး၊ ရိုးသားသည့် ကရင်အမျိုးသမီးငယ် နော်သောသွဲ့ထူး ပြန်လည် လွတ်မြောက်ရေးအတွက် ကြိုးပမ်းနေသူတစ်ဦး ဖြစ်သည်။

“တအားနစ်နာနေပြီ။ ကိုယ့်နိုင်ငံ ဆင်းရဲလို့ သူများနိုင်ငံမှာ ကျွန်သွားခံရပြီး ငွေတုတွေပဲ ပြန်ရလာတာ ဆိုတာမျိုး စိတ်ထဲ ဝင်မသွားစေချင်ဘူး။ ဦးတို့ တောသူတောင်သားက ငွေတုလား၊ ငွေစစ်လား မသိဘူးလေ။ နိုင်ငံဆင်းရဲနေတဲ့အတွက် ကိုယ့်နိုင်ငံသားတွေက နာပြီးရင်း နာရင်းနဲ့ မိအေးသုံးခါနာဖြစ်နေတယ်” ဟု ဦးလှဝင်းက ပြောလိုက်သည်။