ယမန်နေ့က ဟောင်ကောင်ပါလီမန် အဆောက်အအုံထဲသို့ ဝင်ရောက်ကာ ပြည်သူပိုင်ပစ္စည်းများကို ရမ်းကားဖျက်ဆီးသွားသည့် ဆန္ဒပြအင်အားစုများကို တရုတ်ပြည်မကြီးအစိုးရ (ဘေဂျင်း)က ဥပဒေကို လွန်လွန်ကျူးကျူး ချိုးဖောက်သည့်လုပ်ရပ် ဖြစ်သည်ဟုဆိုကာ ပြင်းပြင်းထန်ထန် ရှုတ်ချလိုက်သည်။
အငြင်းပွားဖွယ် ဥပဒေဖျက်သိမ်းရေးအတွက် တက်ကြွစွာဆန္ဒပြခဲ့ကြသည့် အုပ်စုများအနက် ဆန္ဒပြသူအချို့က ဟောင်ကောင် ဥပဒေပြုရေးကောင်စီ(ပါလီမန်) အဆောက်အအုံကို နာရီပေါင်းများစွာ သိမ်းပိုက်ထားခဲ့ရာ ငြိမ်းချမ်းစွာ စီတန်းလှည့်လည်ဆန္ဒပြမှုမှာ ပျက်ယွင်းသလိုဖြစ်ခဲ့ရသည်။
ထိုသို့ ဟောင်ကောင်ပါလီမန်ထဲသို့ ဝင်ရောက်ပြီး ရမ်းကားဖျက်ဆီးခဲ့မှုအတွက် တာဝန်ရှိသူများကို စုံစမ်းဖော်ထုတ်ရန် တရုတ်အစိုးရက တိုက်တွန်းခဲ့သည်။
ဟောင်ကောင်ပါလီမန်ကို သိမ်းပိုက်ဖျက်ဆီးခဲ့ခြင်းသည် တစ်နိုင်ငံ စနစ်နှစ်မျိုးကျင့်သုံးသည့် တရုတ်-ဟောင်ကောင်မူဝါဒကို ပြောင်ပြောင်တင်းတင်း စိန်ခေါ်လိုက်ခြင်းသာဖြစ်ကြောင်း တရုတ်ပြည်မကြီးအစိုးရက ပြောဆိုလိုက်သည်။
- ဆန္ဒပြလူအုပ်နှင့် ဟောင်ကောင်ရဲ ထိပ်တိုက်တွေ့၊ အစိုးရလုပ်ငန်းများ ထိခိုက်
- ပြည်သူ ၂ သန်းကျော် ဆန္ဒပြခဲ့ပြီးနောက် ဟောင်ကောင်ခေါင်းဆောင် ဝန်ချတောင်းပန်
ဘေဂျင်းအစိုးရက ဟောင်ကောင်ပါလီမန်အတွင်း ဆန္ဒပြသူများ ဝင်ရောက်သိမ်းပိုက်ကာ ဖျက်ဆီးမှုများ ပြုလုပ်ခဲ့မှုအပေါ် ဇူလိုင်လ ၂ ရက်နေ့တွင် တရားဝင်ကြေညာချက်ထုတ်ကာ ပြစ်တင်လိုက်ပြီး စုံစမ်းဖော်ထုတ်မှုများ ပြုလုပ်ရာတွင် ဟောင်ကောင်အာဏာပိုင်များကို ပံ့ပိုးကူညီသွားမည်ဖြစ်သည်ဟု ဆိုသည်။
“ယခုကဲ့သို့ ဟောင်ကောင်၏ တရားဥပဒေစိုးမိုးရေးကို မထီမဲ့မြင်ပြုသည့်လုပ်ရပ်သည် ဟောင်ကောင်၏ လူမှုတည်ငြိမ်ရေးကို ထိခိုက်စေပြီး ဟောင်ကောင်ပြည်သူများ၏ အခြေခံကျသော အကျိုးစီးပွားကိုလည်း ပျက်စီးစေသည်” ဟု တရုတ်အစိုးရ၏ ဟောင်ကောင်နှင့် မက္ကာအိုရေးရာရုံးအဖွဲ့က ထုတ်ပြန်သော ကြေညာချက်တွင် ဖော်ပြထားသည်။
အဆိုပါကိစ္စပေါ်ပေါက်ပြီးနောက် ဟောင်ကောင်အုပ်ချုပ်ရေးမှူးကလည်း သတင်းစာရှင်းလင်းပွဲတစ်ရပ် ကျင်းပပြုလုပ်ပြီး ဝေဖန်ရှုတ်ချခဲ့သည်။
ဟောင်ကောင်တွင် တရားဥပဒေစိုးမိုးရေးထက် အရေးကြီးသောကိစ္စ တစ်ခုမျှမရှိဟု အုပ်ချုပ်ရေးမှူး ကယ်ရီလမ်က ဆိုသည်။
BBC
