
ကရင်စာပေနှင့် ယဉ်ကျေးမှုနယ်ပယ်မှ ကျွမ်းကျင်သူများပါဝင်သော အနာဂတ် ဖက်ဒရယ်ပညာရေး ဆိုင်ရာ တွေ့ဆုံဆွေးနွေးပွဲကို ရန်ကုန်မြို့တွင် အောက်တိုဘာ ၁၂ရက်နေ့က နှစ်ရက်ကြာ ပြုလုပ်ခဲ့သည်။
လက်ရှိ ဆောင်ရွက်နေသော ကျောင်းချိန်ပြင်ပ ကရင်စာပေ သင်ကြားမှုကို အစိုးရ အသိအမှတ်ပြုမှု ရရှိရေး၊ တိုင်းရင်းသားအများစု နေထိုင်သော ဒေသများတွင် တိုင်းရင်းသားစာပေကို ဒုတိယဦးစားပေး (second language) အဖြစ် ပါဝင်နိုင်ရေး၊ တိုင်းရင်းသားစာပေ သင်ကြားရေး စသည်ဖြင့် အပိုင်း သုံးပိုင်းခွဲ၍ ဆွေးနွေးခဲ့ကြောင်း၊ ကရင်စာပေ၊ ယဉ်ကျေးမှု ဗဟိုကော်မတီ ဖြစ်ပေါ်လာရန်အတွက် ဖြစ်မြောက်ရေးကော်မတီ ဖွဲ့စည်းနိုင်ခဲ့ကြောင်း ပွဲဖြစ်မြောက်ရေး ဦးဆောင်သူ နန်းခင်အေးဦးက ပြောသည်။
“အမျိုးသားအဆင့် ဗဟို ကရင်စာပေနဲ့ ယဉ်ကျေးမှုကော်မတီ ဖြစ်ပေါ်လာ ရင်တော့ အဲဒီအဖွဲ့က ရှေ့ဆက်သွားမယ်။ အခု ဆွေးနွေးတာတွေက အကြမ်းပါပဲ။ အစိုးရနဲ့ ပြောဆိုတော့မယ်ဆိုရင် ဗဟိုကော်မတီ လိုအပ်တာ အမှန်ပါ”ဟု ပွဲဖြစ်မြောက်ရေး ဦးဆောင်သူ နန်းခင်အေးဦးက ကေအိုင်စီသို ပြောသည်။
ပဲခူးတိုင်းမှ တက်ရောက်လာသူ ကရင်တိုင်းရင်းသားရေးရာဝန်ကြီးဟောင်း စောဂျူးပလီစံလှက “ဒီပွဲမှာ အဓိကက ကရင်စာပေကို ပြန်ပြီး သင်ကြားဖို့အတွက်ဆိုရင် တစ်ယောက်တည်း တစ်ဖွဲ့တည်းလုပ်လို့ အဆင်မပြေနိုင်ဘူး။ တစ်နိုင်ငံလုံး ကရင်စာပေ ကော်မတီကြီး ဖွဲ့နိုင်ဖို့အတွက် ပြန်ကြိုးစားတယ်။ အခုချက်ချင်း မဖြစ်နိုင်သေးတော့ ဖြစ်မြောက်ရေး ကော်မတီ ဖွဲ့ထားလိုက်တယ်။ နိုဝင်ဘာလမှာ ထပ်တွေ့ဆုံကြမယ်”ဟု ကေအိုင်စီသို့ ပြောသည်။
အစိုးရသစ်လက်ထက်တွင် ကရင်စာပေ သင်ကြားမႈနှင့် ပတ်သက်သော ကိစ္စရပ်များ ပြောဆိုဆွေးနွေးမည်ဆိုပါက နိုင်ငံလုံးဆိုင်ရာ ကရင်စာပေနှင့် ယဉ်ကျေးမှုကော်မတီ လိုအပ်ကြောင်း၊ သင်ကြားမည့် ပြဋ္ဌာန်းစာအုပ် အရေးကြီးကာ မည်သို့လုပ်ဆောင်သွားမည်ကို ညှိနှိုင်းရန် လိုအပ်လာနိုင်သည့်အတွက် ယခုကဲ့သို့ တွေ့ဆုံဆွေးနွေးကြခြင်းဖြစ်ကြောင်း ၎င်းက ဆက်ပြောသည်။
ဆွေးနွေးပွဲသို့ ကရင်အမျိုးသားအစည်းအရုံး(KNU) ဗဟိုပညာရေးဌာန တာဝန်ခံ ပဒိုစောလားစေး အပါအဝင် ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ မွန်ပြည်နယ်၊ ကရင်ပြည်နယ်တို့မှ စာပေ နှင့် ယဉ်ကျေးမှုဆိုင်ရာ ပညာရှင် ၄ဝ ကျော် တက်ရောက်ခဲ့ကြောင်း သိရသည်။
(နန့်သွာဖောင်သည် KIC သတင်းဌာနမှ ဖြစ်ပြီး ရန်ကုန်မြို့Myanmar Now သတင်းအေဂျင်စီရုံးတွင် အလုပ်သင် သတင်းထောက်အဖြစ် ခေတ္တလုပ်ကိုင်လျက်ရှိသည်။)