ရှစ်လေးလုံးအရေးတော်ပုံ ၂၈ နှစ်မြောက်နေ့ အမှတ်တရအစီအစဉ်တွေကို တနင်္လာနေ့က နိုင်ငံအနှံ့မှာ ကျင်းပခဲ့ကြပါတယ်။ ပြည်ပရောက်မြန်မာပြည်သားအများအပြားကလည်း သူတို့ ရောက်ရှိရာ ဒေသတွေမှာ အမှတ်တရအစီအစဉ်တွေ ပြုလုပ်ကြပါတယ်။
ရှစ်လေးလုံးနှစ်ပတ်လည်နေ့ နိုင်ငံအနှံ့၊ ပြုလုပ်ကြပုံကို အွန်လိုင်းမီဒီယာတွေမှာ ချက်ချင်းဆိုသလို ဖော်ပြကြပါတယ်။
အင်္ဂါနေ့မှာထွက်လာတဲ့ သတင်းစာ၊ ဂျာနယ်တွေမှာလည်း ဒီအကြောင်းအရာက မျက်နှာဖုံးသတင်းဖြစ်နေပါတယ်။ အစိုးရသတင်းစာတွေကတော့ အတွင်းပိုင်းမှာ ထည့်ပါတယ်။
ခြွင်းချက်တော့ ရှိပါတယ်။ ပြည်ခိုင်ဖြိုးပါတီက ထုတ်ဝေတဲ့ ပြည်ထောင်စုနေ့စဉ်၊ တပ်မတော်ရဲ့အာဘော်ဖြစ်တဲ့ မြဝတီ စတဲ့ သတင်းစာနှစ်စောင်မှာတော့ ဒီမိုကရေစီအရေးလှုပ်ရှားသူများ အလေးထားကြတဲ့ ၈၈၈၈ သတင်းတွေ ထည့်သွင်းခြင်း မရှိပါဘူး။
သတင်းမီဒီယာတွေကို အဆွဲဆောင်ဆုံးကတော့ ရန်ကုန်မှာ ပြုလုပ်တဲ့ အခမ်းအနားတွေပါပဲ။
ဘာကြောင့်လဲဆိုတော့ ရန်ကုန်ဟာ ၈၈ အရေးတော်ပုံက အစပြုရာဒေသ ဖြစ်တဲ့အပြင် နိုင်ငံရေးသမားတွေ၊ နိုင်ငံရေးအဖွဲ့အစည်းတွေ အများစု အခြေစိုက်ကြတဲ့မြို့ဖြစ်နေလို့ပါပဲ။
