(ရန်ကုန်) — မလေးရှားသို့ ဦးတည်ထွက်ခွာစဉ် စက်လှေပျက်ပြီး ရခိုင်ပြည်နယ်၊ ရသေ့တောင်မြို့နယ် ကမ်းခြေတစ်နေရာသို့ ဇွန်လ ၁၁ရက်တွင် ရောက်ရှိလာသည့် ဒုက္ခသည်များအနက်မှ ဘင်္ဂလားဒေ့ရှ် နိုင်ငံသားများအား မူလနိုင်ငံသို့ ပြန်လည် လွှဲပြောင်းပေးမည်ဖြစ်ကြောင်း လူကယ်ပြန်ဝန်ကြီးက သူ၏ Facebook စာမျက်နှာမှတဆင့် ဇွန် ၁၃ ရက်နေ့တွင် ကြေညာလိုက်သည်။
လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ ပြည်ထောင်စုဝန်ကြီး ဒေါက်တာဝင်းမြတ်အေးသည် လှေစီးဒုက္ခသည်များကို ထိန်းသိမ်းထားသည့် မြန်မာ-ဘင်္ဂလားဒေ့ရှ် နယ်စပ် မောင်တောမြို့ရှိ ငါးခူရ ဒုက္ခသည် စခန်းသို့ ဇွန် ၁၂ ရက်နေ့က သွားရောက်ခဲ့ပြီးနောက် ယင်းကဲ့သို့ ကြေညာခဲ့ခြင်းဖြစ်သည်။
စက်လှေဝမ်းဗိုက်ကွဲပြီး ကမ်းခြေသို့ အရေးပေါ်ဆိုက်ကပ်လာသည့် အမျိုးသား ၃၅ ဦး၊ အမျိုးသမီး ၅၂ ဦး၊ ကလေး ၁၇ဦး တို့ကို ရခိုင်ပြည်နယ်၊ ရသေ့တောင်မြို့နယ်၊ အောင်ဗလချောင်းဝ၊ သာစည်ကျေးရွာအနီးတွင် အာဏာပိုင်များက ဇွန်လ ၁၁ရက် နံနက်ပိုင်းတွင် တွေ့ရှိခဲ့ခြင်းဖြစ်သည်။
ကနဦး စစ်ဆေးချက်အရ ၎င်းတို့သည် ဇွန်လ ၈ ရက်နေ့က ဘင်္ဂလားဒေ့ရှ်မှ မလေးရှားသို့ ထွက်ခွာလာခဲ့ခြင်းဖြစ်သည်ဟု သိရကြောင်း အောင်ဗလကျေးရွာ အုပ်ချုပ်ရေးမှူး ဦးမောင်သန်းမြက ဇွန်လ ၁၁ ရက်နေ့တွင် ပြောကြားခဲ့သည်။
ဒုက္ခသည်များထဲတွင် မြန်မာနိုင်ငံ၌ အမှန်တကယ် နေထိုင်ခဲ့သူများပါဝင်လျှင် စိစစ်ပြီး သက်ဆိုင်ရာ ဆွေမျိုးများရှိရာ ဘူးသီးတောင်နှင့် မောင်တောမြို့နယ်များသို့ ပို့ဆောင်ပေးမည် ဖြစ်ကြောင်း ဝန်ကြီးက ရေးသားထားသည်။
အစိုးရသတင်းဌာန၏အဆိုအရ ၂ဝ၁၅ မေလအတွင်း ရခိုင်ပြည်နယ် မောင်တောမြို့နယ်နှင့် ဧရာဝတီတိုင်းဒေသကြီး ဖျာပုံမြို့အရှေ့တောင်ဘက် ပင်လယ်ပြင်အတွင်း တွေ့ရှိခဲ့သည့် လှေစီးဒုက္ခသည် ၁,ဝဝဝ နီးပါးကို ကယ်ဆယ်ခဲ့ပြီး ဘင်္ဂလားဒေ့ရှ်နိုင်ငံသို့ ပြန်လည်လွှဲပြောင်းပေးခဲ့သည် ဟုဆိုသည်။
