အိမ်အကူလုပ်သားပြဋ္ဌာန်းချက် လက်မှတ်ထိုးရန် အစိုးရတွင် အစီအစဉ်မရှိသေး

ရန်ကုန် – ကမ္ဘာ့အလုပ်သမားအဖွဲ့ (ILO) ၏ အိမ်အကူ လုပ်သားဆိုင်ရာ ပြဋ္ဌာန်းချက် အမှတ် ၁၈၉ ကို မြန်မာနိုင်ငံအစိုးရက လက်မှတ်ထိုးမည့် အစီအစဉ် မရှိသေးကြောင်း အစိုးရအရာရှိတစ်ဦးက ဇွန် ၁၅ ရက်နေ့တွင် ပြုလုပ်သော အပြည်ပြည်ဆိုင်ရာ အိမ်အကူအလုပ်သမားများနေ့ ဂုဏ်ပြုအခမ်းအနားတွင် ပြောလိုက်သည်။

သို့သော်လည်း အိမ်ဖော် ဟု အများက ခေါ်ကြသည့် အိမ်အကူအလုပ်သမားတို့ကို ပြည်တွင်း ဥပဒေများက လျစ်လျူရှုထားခြင်း မရှိဟု အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ ဒုတိယညွှန်ကြားရေးမှူးချုပ် ဒေါ်ခင်နွေဦးကပြောသည်။

“ပြည်တွင်းအလုပ်သမား၊ ပြည်တွင်း ရွှေ့ပြောင်းးအလုပ်သမား၊ အိမ်တွင်းအထောက်အကူနဲ့ ပတ်သက်ရင် အလုပ်သမားရဲ့ အနက်အဓိပ္ပာယ် ဖွင့်ဆိုချက်ထဲမှာ အိမ်တွင်းအထောက်အကူ ပါပါတယ်။ နောက် လျော်ကြေးဥပဒေတို့၊ အနည်းဆုံးအခကြွေးငွေတို့ အဲဒီထဲမှာ ပါပါတယ်။ အဲဒီထဲမှာ အိမ်တွင်းအထောက်အကူအလုပ်သမား ပါတဲ့အတွက်ကြောင့် သက်ဆိုင်ရာဥပဒေနဲ့ပဲ ဆက်လက် ဆောင်ရွက်သွားမယ်” ဟု ဒုတိယညွှန်ကြားရေးမှူးချုပ်က ရန်ကုန်မြို့တွင် ပြုလုပ်သော အလုပ်သမားဆိုင်ရာ အခမ်းအနားတွင် ပြောသည်။

အလုပ်အကိုင်ရှာဖွေရေး အေဂျင်စီများ၏ အစီအစဉ်အရ အိမ်အကူလုပ်သားအဖြစ် ပြည်ပနိုင်ငံများသို့ သွားရောက်လုပ်ကိုင်သူ အရေအတွက် လေးသောင်း ဝန်းကျင် ရှိသည်ဟု ဒုတိယညွှန်ကြားရေးမှူးချုပ်က ပြောသည်။

အစိုးရက ပြည်ပ အလုပ်အကိုင်ဥပဒေ ပြင်ဆင်ရေးဆွဲလျက်ရှိကြောင်း၊ ၄င်းဥပဒေထဲတွင် အိမ်တွင်း အထောက်အကူ လုပ်ငန်းအတွက် ကာကွယ်စောင့်ရှောက်မှုဟူသည့် ကဏ္ဍတစ်ခု ထည့်ထားကြောင်း၊ ၁၉၉၉ က ဆွဲထားသော ဥပဒေဖြစ်သောကြောင့် ခေတ်နှင့်လိုက်လျောညီထွေစေရန် ပြင်ဆင်နေကြောင်း ဒုတိယညွှန်ကြားရေးမှူးချုပ် ဒေါ်ခင်နွေဦးက ပြောသည်။

အစိုးရကို ဖိအားပေး

ရန်ကုန်မြို့တွင် ပြုလုပ်သော အလုပ်သမားဆိုင်ရာ အခမ်းအနားသို့ အိမ်အကူအလုပ်သမားများ၊ အလုပ်သမားအရေး ဆောင်ရွက်သူများ တက်ရောက်ကြပြီး ILO အဖွဲ့က ၂၀၁၁ တွင် ရေးဆွဲသည့် အိမ်အကူ လုပ်သားဆိုင်ရာ ပြဋ္ဌာန်းချက် အမှတ် ၁၈၉ ကို မြန်မာအစိုးရ လက်မှတ်ထိုးရန် တိုက်တွန်းကြသည်။

အိမ်ဖော်များကို မျှတစွာ ဆက်ဆံကြရေးအတွက် ရည်ရွယ်သည့် ထိုပြဋ္ဌာန်းချက်ကို ၂၄ နိုင်ငံကသာ သဘောတူ လက်မှတ်ထိုးထားသည်။ အာရှမှ လက်မှတ်ထိုးသည့် တစ်ခုတည်းသော နိုင်ငံမှာ ဖိလစ်ပိုင် ဖြစ်သည်။

ရန်ကုန်မြို့ ကမ္ဘာ့အလုပ်သမားအဖွဲ့ရုံးမှ အကြံပေးအရာရှိချုပ် Ms. Jacqueline Pollock က အိမ်အကူတို့သည် အိမ်မှုကိစ္စအများအပြားကို လုပ်ကိုင်ရကြောင်း၊ သို့သော်လည်း အာရှတွင် အိမ်မှုကိစ္စကို အလုပ်တစ်ခုအဖြစ် ယူဆလေ့မရှိကြောင်း သုံးသပ်သည်။

“အိမ်အလုပ်ဟာ အိမ်ရှင်မတွေဖြစ်တဲ့အတွက်ကြောင့် လုပ်ရမယ်၊ လုပ်ခလစာလည်း မရဘဲ လုပ်သင့်တဲ့ အလုပ်လို့ပဲ သတ်မှတ်ကြပါတယ်။ နိုင်ငံရဲ့စီးပွားရေးမှာလည်း ဒါကို ထည့်သွင်း တွက်ချက်ထားတာတွေ မရှိပါဘူး။ အိမ်အကူအလုပ်သမားတွေဟာ နှိမ့်ချ ဆက်ဆံခံနေရတဲ့တွက် ကိုယ့်အလုပ်အတွက် ရှက်ရွံ့သိမ်ငယ်မှု ခံစားနေရပါတယ်။ ဒါကြောင့် မိမိကို အလွဲသုံးစား၊ ခေါင်းပုံဖြတ်တဲ့ခါမှာ မိမိအခွင့်အရေးကို မတောင်းဆိုရဲဘဲဖြစ်နေပါတယ်” ဟု Ms. Jacqueline Pollock က ပြောသည်။

“အင်မတန်ဝမ်းနည်းစရာကောင်းတာက မိန်းကလေးငယ်တွေဟာ အလုပ်တွင်းကိစ္စကို ကြိတ်မှိတ် ခံစားနေရပြီး လွန်ခဲ့တဲ့ ရက်အနည်းငယ်က စင်ကာပူနိုင်ငံမှာ မြန်မာအိမ်အကူတစ်ယောက်လို အဖြစ်ဆိုးနဲ့ အဆုံးသတ်သွားလေ့ ရှိတယ်။ အိမ်အကူတွေကို အလုပ်သမားအဖြစ် လက်ခံဖို့ သေသေချာချာ လုပ်ဆောင်ဖို့ လိုအပ်လာပါတယ်။

နိုင်ငံ့စီးပွားရေးအတွက် မရှိမဖြစ်လိုတယ်ဆိုတာ လက်ခံဖို့ လိုအပ်ပါတယ်”
——————
ဆက်စပ်ဖတ်ရှုရန် –

“အိမ်အကူကို အနည်းဆုံး တစ်ပတ်မှာတစ်ရက် အနားပေးရမယ်” (အင်တာဗျူး)