မုံရွာမြို့ သလ္လာရပ်ကွက် အုပ်ချုပ်ရေးမှူး ဦးသိန်းထွန်းကို အမည်မသိလူတစ်စုက ယမန်နေ့ (ဇူလိုင် ၂၀) ရက်နေ့ ညနေ ၄ နာရီဝန်းကျင်တွင် ဓားဖြင့်ထိုးသတ်ခဲ့သည်ဟု မြို့ခံအချို့က အတည်ပြုသည်။
အသက် ၅၀ အရွယ် ဦးသိန်းထွန်းမှာ ဆိုင်ကယ်စီးနင်းလာစဉ် ချမ်းမြဝတီရပ်ကွက် ရေကူးကန်လမ်းအရောက်တွင် အမည်မသိလူတစ်စုက ဓားဖြင့်ထိုးခဲ့ခြင်းဖြစ်ပြီး မုံရွာဆေးရုံကြီးအရောက်တွင် သေဆုံးခဲ့သည်ဟု မျက်မြင်သက်သေများကို ကိုးကား၍ မြို့ခံအမျိုးသားတစ်ဦးက Myanmar Now ကို ပြောသည်။
“ဓားနဲ့ထိုးခံရတယ်ပြောတယ်။ ဆေးရုံကြီးရောက်သွားတယ်လို့ သိရတယ်။ နှလုံးတည့်တည့်ကို ထိုးသွားတယ်လို့ ပြောတယ်။ တစ်ချက်တည်းပဲလို့ပြောတယ်” ဟု အဆိုပါ အမျိုးသားက ပြောသည်။
ဦးသိန်းထွန်းသည် စစ်ကောင်စီလက်ထက်တွင် သလ္လာရပ်ကွက်အုပ်ချုပ်ရေးမှူးအဖြစ် ဆက်လက်တာဝန်ယူခဲ့သူဖြစ်သည်ဟု အခြားမြို့ခံတစ်ဦးက ဆိုသည်။ “ဒေသခံတွေက နုတ်ထွက်ခိုင်းတာကို မနုတ်ထွက်ခဲ့တာ” ဟု ၎င်းက ပြောသည်။
အာဏာသိမ်းပြီးစ ဖေဖော်ဝါရီလအတွင်း၌ ရပ်ကွက်နေပြည်သူများက ဦးသိန်းထွန်းကို ရပ်ကွက်အုပ်ချုပ်ရေးမှူးအဖြစ်မှ နုတ်ထွက်ခိုင်းခဲ့ရာ ပြဿနာတက်ဖူးသည်ဟု အထက်ပါမြို့ခံက ဆိုသည်။
“သူ့ကိုနုတ်ထွက်ခိုင်းတာကို သူက သော့ယူပြီး ရပ်ကွက်ရုံးသွားဖွင့်တာပေါ့။ သူ့အိမ်ရှေ့သွားပြီး ရပ်ကွက်ကလည်း သံပုံးသွားတီးတာပေါ့။ အဲ့လိုမျိုးပြဿနာတော့ ဖြစ်ဖူးတယ်” ဟု ၎င်းက ပြောသည်။
Myanmar Now က ပြုစုထားသည့် စာရင်းများအရ စစ်တပ်က အာဏာသိမ်းပြီး ငါးလကျော်အတွင်း လုပ်ကြံသတ်ဖြတ်ခံခဲ့ရသည့် စစ်ကောင်စီဘက်တော်သား ရပ်ကျေးအုပ်ချုပ်ရေးမှူး၊ ရာအိမ်မှူး၊ ဆယ်အိမ်မှူးနှင့် ဒလန် စုစုပေါင်း ၅၀ ကျော်တွင် ရပ်ကျေးအုပ်ချုပ်ရေးမှူး ၄၉ ဦး ပါဝင်သည်။
စစ်အာဏာရှင်ဆန့်ကျင်ရေး ဆန္ဒပြလှုပ်ရှားမှုများအားကောင်းရာ မြို့တစ်မြို့ဖြစ်သည့် မုံရွာတွင် စစ်ကောင်စီ၏ အကြမ်းဖက်ဖြိုခွင်းမှုများ၊ ဖမ်းဆီးနှိပ်စက်မှုများရှိလင့်ကစား ယနေ့အချိန်အထိ ဆန္ဒပြသူများရှိနေဆဲဖြစ်သည်။
