ရန်ကုန်၊ လှိုင်သာယာမြို့နယ် ရွှေလင်ဗန်း ၂၆ ရပ်ကွက် အုပ်ချုပ်ရေးမှူးရုံး၌ ယနေ့(ဇူလိုင် ၃) နံနက် ၈ နာရီခွဲခန့်တွင် ဗုံးပေါက်ကွဲခဲ့ပြီး လူတစ်ဦးထိမှန် ဒဏ်ရာရခဲ့သည်ဟု ဒေသခံများက အတည်ပြုသည်။
“ဆိုင်ကယ်နဲ့လာပြီး အုပ်ချုပ်ရေးမှူးရုံးအနီး ဗုံးကို ပစ်ထည့်သွားတယ်။ အုပ်ချုပ်ရေးမှူးရုံးထဲက တစ်ယောက်ကတော့ အနည်းငယ် ထိခိုက်သွားတယ်” ဟု မျက်မြင်တွေ့ရှိသူက ဆိုသည်။
ပေါက်ကွဲမှုဖြစ်ပွားအပြီး စစ်ကောင်စီတပ်ဖွဲ့ဝင်များရောက်လာကာ အဆိုပါရပ်ကွက်ကို နေ့လယ်ပိုင်းအထိ ပိတ်ဆို့၍ စစ်ဆေးရှာဖွေခဲ့သော်လည်း ဆိုင်ကယ်ဖြင့် ဗုံးလာပစ်သူမှာ လွတ်မြောက်သွားသည်ဟု အထက်ပါပုဂ္ဂိုလ်က ဆက်ပြောသည်။
ပေါက်ကွဲမှုအပြီး မရှေးမနှောင်းမှာပင် အနီးအနားရှိ လှိုင်သာယာ ၂၃ ရပ်ကွက်အတွင်း စစ်ကောင်စီသတင်းပေး (ဒလန်) ဟု ကျော်ကြားသူတစ်ဦး ဓားဖြင့် တိုက်ခိုက်ခံရသေးသည်ဟု ဒေသခံတချို့က ပြောသော်လည်း သီးခြားအတည်ပြုနိုင်ခြင်း မရှိသေးပါ။
အဆိုပါဖြစ်စဉ်များနှင့် စပ်လျဉ်း၍ ထိခိုက်ဒဏ်ရာရမှု၊ စုံစမ်းစစ်ဆေးမှုအခြေအနေများကို ယနေ့(ဇူလိုင်၃) ညနေပိုင်းအထိ စစ်ကောင်စီက သတင်းထုတ်ပြန်ခြင်း မရှိသေးပေ။
ဖေဖော်ဝါရီ ၁ အာဏာသိမ်းမှုကို ပြင်းပြင်းထန်ထန်ဆန့်ကျင်သည့် မြို့နယ်များစာရင်းတွင် ပြည်တွင်းရွှေ့ပြောင်းအလုပ်သမားများစွာ နေထိုင်သည့် လှိုင်သာယာသည် ထိပ်ဆုံးမှပါဝင်ခဲ့ပြီး စစ်ကောင်စီတပ်ကလည်း ရက်စက်စွာ ကိုင်တွယ်နှိမ်နင်းဖူးသည်။
စစ်ကောင်စီ၏ ပစ်ခတ်ဖြိုခွင်းမှုများကြောင့် မတ်လ ၁၄ မှ ၁၈၊ ငါးရက်အတွင်း၌ပင် သေဆုံးသူ ၅၈ဦး၊ ဒဏ်ရာရသူ ၅၃ဦးအထိရှိခဲ့ကာ ထောင်ပေါင်းများစွာသော ပြည်သူများ လှိုင်သာယာကို စွန့်ခွာ၍ နေရပ်ပြန်ရသည်အထိ ဖြစ်ခဲ့ရသည်။
ထိုသို့ စစ်ကောင်စီ၏ အန္တရာယ်မှ ကာကွယ်ရန် နိုင်ငံအနှံ့ ဖွဲ့စည်းထူထောင်လာကြသည့် ပြည်သူတို့၏ ဒေသကာကွယ်ရေးအဖွဲ့လှုပ်ရှားရာ နယ်မြေအတွင်း လှိုင်သာယာလည်းပါဝင်လာသည်။
ယင်းနောက် ဇွန်လဆန်းပိုင်းမှစ၍ စစ်ကောင်စီ၏ အုပ်ချုပ်ရေးယန္တရားနှင့် သတင်းပေးများကို ပစ်မှတ်ထားတိုက်ခိုက်သည့်ဖြစ်စဉ်များ လှိုင်သာယာမြို့နယ်အတွင်း မကြာခဏဖြစ်ပွားနေသည်။
