“ဗမာဆိုတာယုံလို့မရဘူးလေ … နော့။ အဲ့လိုမျိုးပြောရင်လည်း ဗမာ မကြိုက်ဘူး”
အသက် ၅၅ နှစ်အရွယ် ဗိုလ်မှူးကြီးစောချစ်သူက ကရင်လူထုကို အထက်ပါအတိုင်း ပြောဆိုခဲ့သည့် ရုပ်သံမှတ်တမ်းတစ်ခုကလည်း Facebook ပေါ်တွင် ပျံ့နှံ့နေသည်။
တခြားတစ်ဖက်တွင်မူ သူသည် ဗမာလူမျိုးကြီးဝါဒ ကိုင်စွဲကြောင်း တိုင်းရင်းသားများက စွပ်စွဲကြသည့် နေပြည်တော်မှ စစ်ဗိုလ်ချုပ်များထံ ကရင်ပြည်နယ်မှ BGF ခေါ် နယ်ခြားစောင့်တပ်၏ အရာရှိအဖြစ် ၁၄ နှစ်ကြာ သစ္စာခံနေသူ ဖြစ်နေပြန်သည်။
ပူပူနွေးနွေးအဖြစ် ပြီးခဲ့သည့်နှစ်အတွင်းကပင် စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် ပေးသည့် “သီရိပျံချီ” ဘွဲ့ကို နေပြည်တော်တွင် လက်ခံရယူခဲ့ထားသည်။
စစ်တပ်ကျောထောက်နောက်ခံပေးထားသည့် သတင်းဌာန တစ်ခု၏အဆိုအရ စစ်ကောင်စီဒုခေါင်းဆောင် ဗိုလ်ချုပ်စိုးဝင်းနှင့် ယခုနှစ် ဇန်နဝါရီ ၂၄ ရက်နေ့တွင် တွေ့ဆုံအပြီး စောချစ်သူကို ဗိုလ်မှူးချုပ်နှင့် ဒေသဆိုင်ရာ စစ်ဆင်ရေးကွပ်ကဲရေးမှုး (ဒစက-BGF) အဖြစ် စစ်ကောင်စီက ရာထူးတိုးပေးလိုက်သည်ဟု သိရသည်။
ထိုရာထူးက စစ်တပ်ကို သစ္စာခံရန် ပြည်သူ့စစ်များ၊ နယ်ခြားစောင့်တပ် တပ်ဖွဲ့ဝင်များအဖြစ် အသွင်ပြောင်းလာကြသည့် လက်နက်ကိုင်များ ရရှိသည့် ရာထူးများအနက် အဆင့်အမြင့်ဆုံးဖြစ်သည်။
စစ်ကောင်စီဒုခေါင်းဆောင်နှင့်တွေ့ဆုံပြီး သီတင်းပတ်အနည်းငယ်အကြာတွင် စစ်တပ်လက်အောက်ခံ BGF တပ်အဖြစ် ရပ်တည်တော့မည်မဟုတ်ဟု ဗိုလ်မှူးကြီးစောချစ်သူနှင့် သူ့ကို ထောက်ခံသည့် နယ်ခြားစောင့်တပ်အရာရှိများက ကြေညာသည်။ အဖွဲ့သစ်အမည်ကို ကရင်အမျိုးသားတပ်မတော် (Karen National Army -KNA) ဟု ပေးပြီး စစ်ကောင်စီထံမှ အမိန့်နှင့် လစာတို့ကို လက်မခံတော့ဟု ဆိုပြန်သည်။
ပြန်တမ်းဝင်နယ်ခြားစောင့်တပ်မှူးဘဝမှ စစ်တပ်၏သြဇာကို မနာခံတော့ဟု ကြေညာသော်လည်း စစ်တပ်ကို အတိအလင်း ပုန်ကန်ခြားနားခြင်းလည်း မဟုတ်ပြန်။
မြန်မာ-ထိုင်းနယ်စပ်မှ နယ်ခြားစောင့်တပ်မှူးကြီး စောချစ်သူ၏ရပ်တည်ချက်က ခန့်မှန်းရ ခက်လှသည်။ သူ၏ပြောဆိုမှုများ၊ ထုတ်ပြန်ချက်များက မြေပြင်အခြေအနေနှင့် ဆန့်ကျင်ဘက်ဖြစ်နေသည်။
ဗိုလ်မှူးကြီးစောချစ်သူ၏ မပုန်ကန်သော ပုန်ကန်မှု
စစ်ဗိုလ်ချုပ်များ စိတ်ကြိုက်ရေးဆွဲထားသည့် ၂၀၀၈ ဖွဲ့စည်းပုံအခြေခံဥပဒေရ မြန်မာစစ်တပ်အတွက် အဆုံးအဖြတ်အားလုံးကို ကာကွယ်ရေးဦးစီးချုပ်ကသာ ဆုံးဖြတ်ပိုင်ခွင့်ရှိသည်။ ရွေးကောက်ခံ သမ္မတနှင့် လွှတ်တော်တို့ကို ဂရုစိုက်စရာမလိုဘဲ ကာကွယ်ရေးဦးစီးချုပ်က စစ်တပ်အရွယ်အစားကို လိုသလို ချုံ့နိုင်၊ ချဲ့နိုင်သလို သူ့စိတ်ကြိုက် အရာရှိများကို ခန့်နိုင်၊ ဖြုတ်နိုင်သည်။
ဗိုလ်မှူးကြီးစောချစ်သူသည်လည်း မြန်မာစစ်တပ်၏ စစ်သားတစ်ဦးဖြစ်ပြီး သူသည် နေပြည်တော်နှင့် မွန်ပြည်နယ် မော်လမြိုင်အခြေစိုက် အရှေ့တောင်တိုင်းစစ်ဌာနချုပ်မှ စစ်ဗိုလ်ချုပ်များ၏အမိန့်ကို နာခံရသည်။
သို့သော်လည်း ယခုနှစ် မတ်လဆန်းမှစတင်ပြီး ဗိုလ်မှူးကြီးစောချစ်သူက အာခံကြောင်း ကြေညာသည်။
ပြီးခဲ့သည့်နှစ်အတွင်းကလည်း နိုင်ငံအရှေ့ပိုင်း ကယား (ကရင်နီ) ပြည်နယ်မှ နယ်ခြားစောင့်တပ်ရင်း နှစ်ခုသည် စစ်ကောင်စီအမိန့်ကို မနာခံနိုင်တော့ကြောင်း အလားတူကြေညာပြီး စစ်ကောင်စီကို ပြန်တိုက်နေသည်။
ဗိုလ်မှူးကြီးစောချစ်သူ၏ ပုန်ကန်မှုက ကရင်နီနယ်ခြားစောင့်တပ်များကဲ့သို့ မဟုတ်ဘဲ တစ်မူထူးခြားသည်။
စစ်တပ်အောက်မှ ခွဲထွက်သော်လည်း စစ်တပ်ကို ဆက်လက်အကူအညီပေးနေပြန်သည်။
ဧပြီ ၁၁ ရက်နေ့တွင် ကရင်အမျိုးသားအစည်းအရုံး (KNU) က ခလရ (၂၇၅) တပ်စခန်းကို ထိုးစစ်ဆင် သိမ်းပိုက်စဉ် မြဝတီမြို့ကို လုံခြုံရေးယူထားသည့် BGF က ထိုးစစ်ကို ဝင်ရောက်ဟန့်တားမှု မပြုသည့်နည်းဖြင့် ကူညီခဲ့သည်။
စစ်ကောင်စီက ဧပြီ ၂၃ တွင် ထိုစခန်းကို ပြန်လည်သိမ်းပိုက်သည့်အခါ ဗိုလ်မှူးကြီးစောချစ်သူ၏ BGF က ကူညီသည်ဟု မြဝတီဒေသခံများက Myanmar Now ကို ပြောသည်။
လက်ရှိအချိန်တွင် မြဝတီမြို့သည် ဗိုလ်မှူးကြီးစောချစ်သူနှင့် BGF ၏ ထိန်းချုပ်မှုအောက်တွင် ရှိနေကြောင်း ဒေသခံတို့က ဆိုသည်။
မြဝတီမြို့တွင် BGF တပ်စွဲထားသည့် နေရာအများအပြားရှိနေပြီး မြဝတီ၏အနာဂတ်သည် ဗိုလ်မှူးကြီးစောချစ်သူ၏ ဆုံးဖြတ်ချက်ပေါ်တွင် မူတည်နေသည်ဟု မဲဆောက်မြို့မှ နိုင်ငံရေးသတင်းရင်းမြစ်တစ်ဦးက ဆိုသည်။
“မြဝတီကိုက BGF မပါဘဲနဲ့ သိမ်းဖို့ဆိုတာ မလွယ်ဘူး” ၎င်းက ဆိုသည်။
ခန့်မှန်းရခက်သည့် ဗိုလ်မှူးကြီးစောချစ်သူ၏ ကြွယ်ဝမှု
စောချစ်သူသည် မြန်မာစစ်တပ်၏ စစ်ဗိုလ်ချုပ်ကြီးများနည်းတူ သေနတ်ကိုင်ရင်း စီးပွားရေးလုပ်ငန်းများထူထောင်ထားသူဖြစ်သည်။
မဲဆောက်-မြဝတီဒေသတွင် ထိုင်းနိုင်ငံအခွန်ဌာန အခွန်ငွေရသည့်၊ ကုန်ပစ္စည်းများ စီးဆင်းသည့် နယ်စပ် စက်လှေဂိတ်များစွာရှိရာ မြန်မာဘက်တွင် ထိုဂိတ်အများအပြားကို BGF က ထိန်းချုပ်ထားသည်။
ထိုဂိတ်ပေါက်များမှ ကုန်သွယ်မှုသည် လစဉ် ဘတ်ငွေ သန်းနှင့်ချီအထိ ရှိသည်။
BGF က ထိန်းချုပ်ထားသည့် ဂိတ်များမှ ရရှိသည့် အကျိုးအမြတ်ကို BGF ခေါင်းဆောင်များက အဓိကရရှိကြသည်။
BGF ထိန်းချုပ်ဒေသ တရားမဝင်စီးပွားရေးလုပ်ငန်းများထဲတွင် ယခင်က လောင်းကစားလုပ်ငန်းမျိုးစုံ ပါဝင်ရာမှ နောက်ပိုင်းတွင် ကျားဖြန့်ဟုခေါ်သည့် အွန်လိုင်းငွေလိမ်ခြင်းလည်း ပါဝင်လာသည်။ ဗိုလ်မှူးကြီးစောချစ်သူနှင့် BGF ခေါင်းဆောင်များသည် မြန်မာ-ထိုင်းနယ်စပ်မျဉ်းအနီး ရွှေကုက္ကိုမြို့သစ်ဆိုသည့် စီမံကိန်းကို တည်ထောင်ပြီး ကျားဖြန့်ဂိုဏ်းများကို အခြေစိုက်စေကြောင်း၊ ထိုကျားဖြန့်ဂိုဏ်းများထံမှ အကျိုးအမြတ်ကိုလည်း ရရှိကြောင်း လေ့လာသူတို့က ဆိုကြသည်။
မြေဧက ၃၀,၀၀၀ ကျယ်ဝန်းပြီး အမေရိကန်ဒေါ်လာ ၁၅ ဘီလီယံခန့် ရင်းနှီးမြှုပ်နှံထားသည့် ရွှေကုက္ကိုမြို့သစ်စီမံကိန်းကို ရထိုင်နိုင်ငံတကာဦးပိုင်လုပ်ငန်း (Yatai International Holdings Group) နှင့် BGF က ထူထောင်ထားသော ချစ်လင်းမြိုင်ကုမ္ပဏီတို့ ပူးပေါင်းလုပ်ကိုင်ကြသည်။
ထောင်နှင့်ချီသည့် ငွေလိမ်လုပ်ငန်းများတည်ရှိရာ ရွှေကုက္ကိုစီမံကိန်းမှ နှစ်စဉ် အမေရိကန်ဒေါ်လာ ၁၉၂ သန်း BGF က ရရှိသည်၊ ထိုငွေ ထက်ဝက် ၅၀ ရာခိုင်နှုန်းကို စစ်တပ်က ရရှိနေသည်ဟု အမေရိကန်ပြည်ထောင်စု၊ ငြိမ်းချမ်းရေးအင်စတီကျု (USIP) အဖွဲ့၏ အင်တာနက်စာမျက်နှာရှိ ဧပြီ ၂၂ ရက်နေ့ ရက်စွဲတပ် သုံးသပ်ချက်ဆောင်းပါးတစ်စောင်တွင် ဖော်ပြလာသည်။
BGF ခေါင်းဆောင်များသည် မြဝတီရှိ တရုတ်ငွေလိမ်ဂိုဏ်းများနှင့် ဆက်နွှယ်နေပြီး ထိုဂိုဏ်များနှင့် ပတ်သက်နေသူများမှာ BGF ခေါင်းဆောင် ဗိုလ်မှူးကြီးစောချစ်သူ၊ ဒုတိယဗိုလ်မှူးကြီး စောမုတ်သုန်၊ ဗိုလ်မှူးတင်ဝင်းတို့ ဖြစ်သည်ဟု ထိုဆောင်းပါးတွင် ဆိုထားသည်။
ထိုဆောင်းပါးပါ ဖော်ပြချက်မျိုးနှင့် ပတ်သက်ပြီး BGF ခေါင်းဆောင်များက တုံ့ပြန်ခြင်း မရှိပေ။ တုံ့ပြန်ချက် ရရှိရန် Myanmar Now က ကြိုးစားသော်လည်း အဆက်အသွယ် မရသေးပေ။
ပြီးခဲ့သည့်နှစ်အတွင်းကလည်း ဗိုလ်မှူးကြီးစောချစ်သူသည် မြန်မာ၊ ကမ္ဘောဒီးယားနှင့် လာအိုနိုင်ငံတို့တွင် ဖြစ်ပွားခဲ့သည့် လူကုန်ကူးမှုများနှင့်ပတ်သက်ပြီး သံသယရှိသည်ဟုဆိုကာ ဗြိတိန်၊ အမေရိကန်နှင့် ကနေဒါနိုင်ငံများက အမည်ပျက်စာရင်းသွင်းခဲ့သည်။
သြဇာကြီးထွားလာသည့် ဗိုလ်မှူးကြီးစောချစ်သူ ရွှေကုက္ကိုကို အပိုင်စားရခြင်း
မြန်မာ-ထိုင်း နယ်စပ်တွင် စစ်ဘုရင်တစ်ပါးဖြစ်လာမည့် စောချစ်သူသည် သူ၏လက်နက်ကိုင်တပ်သားဘဝကို ဆယ်ကျော်သက်အရွယ်ကတည်းက KNU လက်အောက်ခံ ကရင်အမျိုးသားလွတ်မြာက်ရေးတပ်မတော် (KNLA) တွင် စတင်ခဲ့သည်။
၁၉၉၅ တွင် စစ်အစိုးရ၏ မဟာဗျူဟာကျသည့် KNU ဖြိုခွဲရေးစီမံကိန်းအောက်တွင် ဗုဒ္ဓဘာသာဝင်ကရင်များသည် KNU အောက်မှ ခွဲထွက်ပြီး DKBA အမည်ရ ဒီမိုကရက်တစ် တိုးတက်သော ဗုဒ္ဓဘာသာ ကရင်တပ်မတော်ကို တည်ထောင်သည်။ DKBA အဖွဲ့သစ်တွင် ဗုဒ္ဓဘာသာဝင် စောချစ်သူလည်း ပါလာခဲ့သည်။
၂၀၁၀ ရွေးကောက်ပွဲမတိုင်မီတွင် စစ်တပ်က DKBA ကို နယ်ခြားစောင့်တပ်အဖြစ် စစ်တပ်အောက်ဝင်ရန် ဖိအားပေးပြီးနောက် ဗိုလ်မှူးကြီးစောချစ်သူလည်း နယ်ခြားစောင့်တပ် (BGF) ၏အရာရှိဖြစ်လာသည်။
သို့သော်လည်း ရှုပ်ထွေးလှသည့် ကရင်လက်နက်ကိုင်များအကြားတွင် DKBA ဆိုသည့်အမည်ကို မြန်မာဘာသာဖြင့် အနက်အဓိပ္ပာယ်အမျိုးမျိုးဖွင့်ကြသည်။ စစ်ကောင်စီက ပြီးခဲ့သည့်နှစ်အထိ ဗိုလ်မှူးကြီးစောချစ်သူကို ဗုဒ္ဓဘာသာကရင်အမျိုးသားအစည်းအရုံး (DKBA) မှ အရာရှိဟု သုံးနှုန်းခဲ့သည်။
DKBA မှ ခွဲထွက်လာသည့် တပ်ရင်း ၁၂ ရင်း၊ ကရင်ငြိမ်းချမ်းရေးအဖွဲ့ KPF မှ အမှတ် ၂၁ တပ်ရင်းတို့ ပူးပေါင်းပြီး ၂၀၁၀ ပြည့်နှစ်တွင် ကရင် BGF ကို တပ်ရင်း ၁၃ ရင်းဖြင့် ဖွဲ့စည်းလိုက်ခြင်းဖြစ်ပြီး စောချစ်သူလည်း အရှေ့တောင်တိုင်းစစ်ဌာနချုပ် လက်အောက်ရှိ ကရင်ပြည်နယ် နယ်ခြားစောင့်တပ် (BGF) အမှတ် (၃) တပ်နယ်မှူးဖြစ်လာသည်။
၂၀၁၁ အတွင်းက DVB သတင်းဌာန၏ဖော်ပြချက်တွင် စစ်တပ်က ဗိုလ်မှူးကြီးစောချစ်သူကို ကရင်နယ်ခြားစောင့်တပ်များကို ကြီးကြပ်ရန် အာဏာကုန်လွှဲခဲ့သည်ဟု ဆိုသည်။
ထိုအချိန်မှစပြီး ဗိုလ်မှူးကြီးစောချစ်သူသည် စစ်တပ်၏လောင်းရိပ်အောက် သြဇာကြီးထွားလာခဲ့ပြီး ပိုမို ချမ်းသာကြွယ်ဝလာသည်ဟု တောင်ပိုင်းတိုင်း စစ်ရေးသတင်းရင်းမြစ်တစ်ဦးက ပြောသည်။
“သူ့မှာ ပါဝါရှိတယ်၊ အာဏာရှိတယ်၊ ငွေကြေးရှိတယ်။ ဒီအကျိုးစီးပွားတွေကို ဖြန့်ဝေနိုင်တဲ့ ရင်းမြစ်တွေရှိတယ်။ အဲဒီရင်းမြစ်တွေရှိနေတဲ့ အခါကျတော့ တော်တော်များများကို သူသည် ခြယ်လှယ်နေလို့ရတဲ့ အနေအထားမျိုးတွေဖြစ်နေတယ်” ဟု ထိုသတင်းရင်းမြစ်က ပြောပြသည်။
စောချစ်သူသည် မြန်မာစစ်တပ်နှင့် ကာလရှည်ကြာ ရှိလာခဲ့သည့် ဆက်ဆံရေးကြောင့် ရွှေကုက္ကိုဒေသတစ်ဝိုက်ကို ထိန်းချုပ်ခွင့်ရလာခဲ့သည်၊ ထိုနေရာသည် ကော့မူးရာ ခေါ် ဝမ်ခ စခန်းဟု ထင်ရှားသည့် KNLA အခြေစိုက်စခန်းတစ်ခု ရှိခဲ့ဖူးသည့် နေရာပင်ဖြစ်သည်။
နိုင်ငံအသီးသီးမှ လူကုန်ကူးခံရသူတို့ကို ညှဉ်းပန်းနှိပ်စက်မှု၊ အတင်းအဓမ္မ ကျွန်ပြုမှု အစရှိသည့် မကောင်းမှု၊ ရာဇဝတ်မှုများသည် သူ၏ ထိန်းချုပ်ရာဒေသအတွင်း ဖြစ်ပွားနေသည့်တိုင် စောချစ်သူသည် လူကြိုက်များတတ်သည့် အားကစားပွဲ၊ ဘာသာရေးအလှူပွဲများ ကျင်းပလေ့ရှိသည်။
၂၀၂၃ ခုနှစ်က သူ၏ ဇာတိဖြစ်သည့် ကရင်ပြည်နယ် လှိုင်းဘွဲ့မြို့နယ် ကြားအင်းကျေးရွာရှိ ပြည်သာလင်းအေးစေတီတော်” ရွှေထီးတော်တင်အလှူပွဲကို ဘုရားဒါယကာအဖြစ် နှစ်ပတ်တိုင်တိုင် ကြီးကျယ်ခမ်းနားစွာကျင်းပသည်။
သိန်းပေါင်းထောင်နှင့်ချီ အကုန်ကျခံပြီး ပြုလုပ်ခဲ့သည့် ထိုအလှူပွဲတွင် တရားဟောသူမှာ လူမျိုးရေးပဋိပက္ခလှုံ့ဆော်မှု၊ ရိုင်းစိုင်းကြမ်းတမ်းသည့် နှုတ်ထွက်စကားကြောင့် ထင်ရှားသည့် မဘသဆရာတော် ဦးဝီရသူဖြစ်သည်။
ထို့ပြင် စောချစ်သူသည် ကျေးရွာအတွင်း နှစ်စဉ်ကျင်းပပြုလုပ်လေ့ရှိသော စုပေါင်းမဟာဘုံကထိန်အထိမ်းအမှတ် ဘောလုံးပြိုင်ပွဲကဲ့သို့ ပျော်ပွဲရွှင်ပွဲများတွင်လည်း လူလုံးထွက်ပြလေ့ရှိသည်။
စောချစ်သူသည် အပြစ်မဲ့ပြည်သူများကို အကြမ်းဖက်သတ်ဖြတ်၊ အစုလိုက်အပြုံလိုက်သတ်ဖြတ်သည့် စစ်တပ်၏ ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ချီးမြှင့်သော သီရိပျံချီဘွဲ့ကိုလည်း ပြီးခဲ့သည့် နှစ်ထဲတွင် လက်ခံထားသူ ဖြစ်သည်။
အသက် ၅၅ နှစ်အရွယ် ရှိပြီဖြစ်သည့် စောချစ်သူသည် အိမ်ထောင်နှစ်ဆက်မှ ရသည့် သား ၃ ဦး၊ သမီးတစ်ဦး ရှိသည်၊ မြေးတစ်ဦး ရှိသည်ဟု သူနှင့် နီးစပ်ခဲ့ဖူးသူတစ်ဦးက ပြောသည်။ သား ၂ ဦးမှာ BGF တွင် အရာရှိများ ဖြစ်နေသည်ဟု ကရင်ပြည်နယ်ဒေသသတင်းများ အထူးပြုတင်ဆက်သည့် KIC သတင်းတစ်ပုဒ်တွင် ဖော်ပြထားသည်။
ခက်ခဲမည့်စာမေးပွဲ
စစ်တပ်က ထွက်မည်ဟု စောချစ်သူအပါအဝင် BGF ခေါင်းဆောင်များ ကြေညာသည်က ယခုတစ်ကြိမ်သည် ပထမဆုံးမဟုတ်ပေ။ ၂၀၂၁ ခုနှစ် ဖေဖော်ဝါရီ စစ်အာဏာသိမ်းမှု မတိုင်မီ လပိုင်းအလိုတွင်လည်း အလားတူကြေညာခဲ့သည်။
အစိုးရခွင့်ပြုချက်ထက် ကျော်လွန်လုပ်ဆောင်နေခြင်းကြောင့် ရွှေကုက္ကိုမြို့သစ်စီမံကိန်း ရပ်နားထားရခြင်းဖြစ်ကြောင်း အာဏာသိမ်းရန် ၁ လအလိုတွင် ထိုစဉ်က သမ္မတရုံးပြောခွင့်ရပုဂ္ဂိုလ် ဦးဇော်ဌေးက ပြောကြားခဲ့သည်။ တစ်ချိန်တည်းမှာပင် စစ်တပ်ကလည်း စောချစ်သူအပါအဝင် BGF ခေါင်းဆောင် ၃ ဦးကို စီးပွားရေးလုပ်လိုပါက နုတ်ထွက်ကြရန် ဖိအားပေးခဲ့ဖူးသည်။
BGF ဘက်က ၎င်းတို့ ခေါင်းဆောင် ၃ ဦးကို နုတ်ထွက်ခိုင်းပါက တပ်ရင်း၊ တပ်ဖွဲ့၊ အရာရှိများအားလုံး နုတ်ထွက်မည်ဟု ပြန်လည်တုံ့ပြန်ခဲ့ရာ စစ်တပ်က မာန်ပြန်လျှော့ခဲ့ရသည်။ ထို့နောက် စစ်အာဏာသိမ်းမှု ပေါ်လာပြီး BGF သည် သူ၏ တရားမဝင်စီးပွားရေးလုပ်ငန်းများကို နေမြဲအတိုင်း ဆက်လက်လုပ်ကိုင်ပြီး နောက်ထပ်ပင် တိုးချဲ့လုပ်ကိုင်ခဲ့သည်။
ထို့နောက် အာဏာသိမ်းစစ်တပ်အောက်တွင် ရွှေကုက္ကိုနှင့် ဗိုလ်မှူးကြီးစောချစ်သူတို့လည်း ဆက်လက်ကြီးထွားလာသည်။
အဖြစ်အပျက်များက ပြီးခဲ့သည့်နှစ်တွင် အလှည့်အပြောင်းဖြစ်လာသည်။
ဒေသတွင်းနှင့် နိုင်ငံတကာတွင် အမည်ဆိုးဖြင့် ကျော်ကြားသော ကျားဖြန့်လုပ်ငန်းများကို တရုတ်အစိုးရက အကြီးအကျယ်ဒေါသထွက်နေခဲ့သည်။
ပြီးခဲ့သည့်နှစ်အတွင်းက တရုတ်အစိုးရသည် မြန်မာအရှေ့မြောက်ပိုင်း ကိုးကန့်/လောက်ကိုင် ဒေသမှ စစ်တပ်လက်အောက်ခံ နယ်ခြားစောင့်တပ်အရာရှိများ၊ ပြည်သူ့စစ်များနှင့် ကြံ့ခိုင်ရေးအမတ်များကို စစ်ကောင်စီ၏အကူအညီဖြင့် ကျားဖြန့်နှိမ်နင်းရေးခေါင်းစဉ်အောက်တွင် ဖမ်းဆီးခဲ့သည်။
တရုတ်၏ကျားဖြန့်စစ်ဆင်ရေးက ဗိုလ်မှူးကြီးစောချစ်သူထံ ရောက်မလာသေးသော်လည်း ထိုင်းအစိုးရကမူ ၎င်းတို့နယ်စပ်မှ ကျားဖြန့်ဂိုဏ်းများကို နှိမ်နင်းရန် စစ်ကောင်စီကို ဖိအားပေးနေသည်။
ထိုင်းဘုရင့်စစ်တပ်၏ ပူးပေါင်းစစ်ဆင်ရေး ညွှန်ကြားရေးမှူး ဒုတိယဗိုလ်ချုပ်ကြီး ဂျကပေါင်း ဂျန်ပန်းပန်ကိုယ်တိုင် ပြီးခဲ့သည့်နှစ် ဒီဇင်ဘာက နေပြည်တော်သို့ ရောက်လာပြီး မြဝတီမြို့အနီးရှိ ကျားဖြန့် ခေါ် အွန်လိုင်းလောင်းကစား ငွေလိမ်ဂိုဏ်းများကို ဖြိုခွင်းပေးရန် စစ်ခေါင်းဆောင်ကို တောင်းဆိုခဲ့သည်။
ထို့နောက် ယခုနှစ် ဧပြီလဆန်းတွင် KNU ဦးဆောင်သော တော်လှန်ရေးပူးပေါင်းတပ်များက မြဝတီကို ဝင်တိုက်ချိန်တွင် စောချစ်သူ၏ ရပ်တည်ချက်က အရေးပါလာသည်။
မြဝတီတိုက်ပွဲတွင် စောချစ်သူက စစ်တပ်ကို အကူအညီပေးနေပြန်သည်။
လက်ရှိအချိန်တွင် ဒေါ်လာသန်းချီတန်ကြေးရှိသည့် မြဝတီနယ်စပ်ကုန်သွယ်ရေးလမ်းကြောင်းနှင့် ရွှေကုက္ကိုစီမံကိန်းသည် ဗိုလ်မှူးကြီးစောချစ်သူ၏ လက်ခုပ်ထဲတွင် ရှိနေသော်လည်း အနာဂတ်က သိပ်မသေချာလှ။
သူ၏အနာဂတ်က ရှမ်းမြောက် ကိုးကန့်မှ နယ်ခြားစောင့်တပ်အရာရှိများကဲ့သို့ တရုတ်လက်ထဲ ရာဇဝတ်သားတစ်ဦးအဖြစ် ရောက်မည်လော၊ စစ်ကောင်စီလောင်းရိပ်အောက် ဆက်ကြီးထွားမည့် စစ်ဘုရင်အဖြစ် ရှိမည်လော၊ သို့တည်းမဟုတ် စစ်ကောင်စီကို ဆန့်ကျင်နေသည့် ကရင်တော်လှန်ရေးတပ်များနှင့် ဇာတ်ပေါင်းမည်လောဆိုသည်ကို မကြာမီလပိုင်းအတွင်း ပိုပြီး ထင်ထင်ရှားရှား တွေ့ရမည် ဖြစ်သည်။
