ကိုဗစ်နိုင်တင်း(Covid-19) အတည်ပြုလူနာ တွေ့ရှိခဲ့သည့် မင်္ဂလာဒုံစက်မှုဇုန်ရှိ EMC Manufacturing မှာ ယနေ့ (စက်တင်ဘာ ၄) မနက်ပိုင်းတွင် ဆက်လက်လည်ပတ်လျက်ရှိကြောင်း မင်္ဂလာဒုံမြို့နယ် ပြည်သူ့လွှတ်တော်ကိုယ်စားလှယ်ကပြောသည်။
မင်္ဂလာဒုံစက်မှုဇုန်ရှိ အလုပ်သမား ၆၅၀၀ ကျော်ရှိသည့် EMC Manufacturing အထည်ချုပ်စက်ရုံတွင် လုပ်ကိုင်သူ မြောက်ဥက္ကလာပမြို့နယ်နေ အသက် ၂၅ နှစ်အရွယ် အမျိုးသမီး (ကိုဗစ်လူနာ-၁၀၁၃)၏ ဆေးစစ်ချက်အဖြေ ထွက်ရှိပြီးနောက် ထိုစက်ရုံကို ပိတ်ထားမည်ဟု သတင်းများထွက်ပေါ်ခဲ့သော်လည်း ဆက်လက်လည်ပတ်ခဲ့ခြင်းဖြစ်သည်။
ကိုဗစ်လူနာ-၁၀၁၃ နှင့် အနီးကပ်နေထိုင်ခဲ့သူ စက်ရုံအလုပ်သမား ၁၇ ဦးကို မင်္ဂလာဒုံမြို့နယ်တွင် အသွားအလာကန့်သတ် (Quarantine Centre) ထားရှိပြီး စက်ရုံ၏ စီးပွားရေးနှင့် အလုပ်သမားများ၏ စားဝတ်နေရေး ထိခိုက်မှုမရှိစေရန် ဆက်လက်လည်ပတ်ခွင့် ပြုခဲ့သည်ဟု မင်္ဂလာဒုံမြို့နယ် ပြည်သူ့လွှတ်တော်ကိုယ်စားလှယ် ဦးအောင်လှိုင်ဝင်းက ပြောသည်။
“ဒီနေ့ကျတော့ တိုင်းကို ပြန်တင်ပြတဲ့အခါမှာ စက်ရုံ အလုပ်သမားတစ်ယောက်တွေ့တာနဲ့ စက်ရုံတစ်ခုလုံး ပိတ်ရမယ်ဆိုတဲ့မူ မရှိသေးဘူးပေါ့။ ဒီနေ့ကတော့ ပုံမှန် ပြန်လည်ပတ်နေပါတယ်” ဟု ၎င်းကပြောသည်။
သြဂုတ်လ ၁၆ ရက်နေ့ နောက်ပိုင်းက စတင်ပြီး တစ်ကျော့ပြန်ကိုဗစ်နိုင်တင်း(Covid-19) ကူးဆက်မှု မြင့်တက်လာခဲ့ရာ စက်တင်ဘာလ ၄ ရက် မနက်ပိုင်းအထိ အတည်ပြုလူနာအရေအတွက် ၁၁၃၃ ဦးနှင့် သေဆုံးသူ ၇ ဦးထိ ရှိလာသည်။
ရောဂါ ကူးဆက်ခံရသူ ၃၅၉ ဦးမှာ သက်သာ ပျောက်ကင်းသွားခဲ့ပြီး ၇၆၇ ဦးမှာ ဆက်လက်ကုသမှု ခံယူနေရဆဲဖြစ်သည်။
ယနေ့ အချိန်ထိ ကိုဗစ်နိုင်တင်း ဓာတ်ခွဲနမူနာပေါင်း ၁၆၆,၀၀၀ ကျော်ကို စစ်ဆေးထားပြီး စောင့်ကြည့်လူနာ ၇,၀၀၀ ကျော်ရှိကြောင်း ကျန်းမာရေးနှင့်အားကစား ဝန်ကြီးဌာနက ထုတ်ပြန်ထားသည်။
