ရန်ကုန်မြို့လယ်ကောင် မဟာဗန္ဓုလပန်းခြံက ငြိမ်းချမ်းရေးကဗျာရွတ်ပွဲမှာ ပါဝင်ခဲ့တဲ့ ကိုဇေယျာလွင်ကို ကျောက်တံတားရဲစခန်းကို လိုက်ခဲ့ဖို့ ရဲအရာရှိတွေက ပြောဆိုခဲ့ပေမဲ့ သူဟာ လူအုပ်ထဲကနေ ကိုယ်ပိုင်ကားတစ်စီးပေါ်ကို အတင်းပြေးတက်ကာ ထွက်ခွာသွားတဲ့အတွက် ရဲတပ်ဖွဲ့ဝင်တွေ သူ့ကို မျက်ခြည်ပြတ်သွားခဲ့ပါတယ်။
ငြိမ်းချမ်းရေးကဗျာရွတ်တဲ့ ကဗျာဆရာတွေကို အရေးယူခြင်းမရှိပေမဲ့ ကိုဇေယျာလွင်ပြောဆိုချက်မှာ အစိုးရကို ထိခိုက်စေတဲ့ အသုံးအနှုန်းတွေပါလို့ အမှုဖွင့်ဖို့ လုပ်ဆောင်ရတာဖြစ်ကြောင်း ရဲတပ်ဖွဲ့က ဆိုပါတယ်။
ကိုဇေယျာလွင်ဟာ စနေနေ့က တာမွေဆန္ဒပြပွဲမှာ ဖမ်းဆီးခံရပြီးနောက် အာမခံနဲ့ လွတ်မြောက်လာခဲ့သူတစ်ဦး ဖြစ်ပါတယ်။
ကချင်ပြည်နယ်မှာ တပ်မတော်ရဲ့ ထိုးစစ်တွေကြောင့် ဒေသခံပြည်သူအများအပြား စစ်ပြေးဒုက္ခသည်ဖြစ်လာတဲ့အပေါ် မြန်မာနိုင်ငံနေရာအနှံ့ ငြိမ်းချမ်းရေးဆုတောင်းပွဲတွေ ဆက်တိုက်ပြုလုပ်နေပါတယ်။ ဒီလိုပြုလုပ်နေသူတွေကို အာဏာပိုင်များက ဖမ်းဆီးတရားစွဲမှုတွေ ပြုလုပ်နေခြင်းဖြစ်ပါတယ်။
