ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် ဦးမြင့်သူကို ပြောင်းရွှေ့ခန့်ထားလိုက်ကြောင်း နိုင်ငံခြားရေးဝန်ကြီးဌာန၏ ဖေဖော်ဝါရီ ၂၃ ရက်စွဲပါ စာတစ်စောင် ပေါက်ကြားလာသည်။
အာဏာသိမ်းစစ်ကောင်စီက ပထမဆုံးအကြိမ် ကုလသမဂ္ဂဆိုင်ရာ အဆင့်မြင့်သံတမန်တစ်ဦးကို နေရာပြောင်းရွှေ့လိုက်ခြင်းဖြစ်ပြီး ကုလသမဂ္ဂဆိုင်ရာ မြန်မာသံအမတ်ကြီးဖြစ်သူ ဦးမြင့်သူအနေဖြင့် ၎င်းကိုယ်တိုင် နုတ်ထွက်စာတင်ခဲ့ခြင်း ရှိမရှိကိုမူ အတည်ပြုနိုင်ခြင်း မရှိသေးပေ။
ရွေးကောက်ခံလွှတ်တော်အမတ်များ စုဖွဲ့ထားသည့် ပြည်ထောင်စုလွှတ်တော်ကိုယ်စားပြုကော်မတီ (CRPH) က ကုလသမဂ္ဂဆိုင်ရာ အထူးသံတမန်အဖြစ် ဒေါက်တာဆာဆာကို ခန့်အပ်ကြောင်း ဖေဖော်ဝါရီ ၂၂ တွင် ထုတ်ပြန်ခဲ့သည်။
ချင်းတိုင်းရင်းသားဖြစ်သူ ဒေါက်တာဆာဆာသည် ၂၀၂၀ ရွေးကောက်ပွဲအတွက် အမျိုးသားဒီမိုကရေစီ အဖွဲ့ချုပ်ပါတီ (NLD) ၏ ချင်းပြည်နယ်အောင်နိုင်ရေး အဖွဲ့ဝင်တစ်ဦးလည်းဖြစ်သည်။
စစ်ကောင်စီ၏ နေရာပြောင်းရွှေ့ခြင်း ခံခဲ့ရသူ ဦးမြင့်သူမှာ ကုလသမဂ္ဂဆိုင်ရာ မြန်မာအမြဲတမ်း ကိုယ်စားလှယ်အဖြစ် တာဝန်မထမ်းဆောင်မီက ဂျပန်နိုင်ငံဆိုင်ရာ မြန်မာသံအမတ်ကြီးအဖြစ် လည်းကောင်း၊ နိုင်ငံခြားရေးဝန်ကြီးဌာန အမြဲတမ်းအတွင်းဝန်အဖြစ်လည်းကောင်း၊ အာဆီယံရေးရာ ညွှန်ကြားရေးမှူးချုပ်အဖြစ်လည်းကောင်း တာဝန်ထမ်းဆောင်ခဲ့သူဖြစ်သည်။
ဦးမြင့်သူသည် ဆွတ်ဇာလန်နိုင်ငံ ဂျီနီဗာမြို့ ရှိ ကုလသမဂ္ဂအပြင် ကမ္ဘာ့ကုန်သွယ်ရေးအဖွဲ့ဆိုင်ရာ မြန်မာ အမြဲတမ်းကိုယ်စားလှယ်အဖြစ်လည်း အမျိုးသားဒီမိုကရေစီအဖွဲ့ချုပ် အစိုးရက ခန့်အပ်ခဲ့သည်။
