နေပြည်တော်တိုင်းစစ်ဌာနချုပ် နယ်မြေအတွင်း တာဝန်ထမ်းဆောင်နေသော တပ်မတော်သားတစ်ဦးတွင် ကိုဗစ်နိုင်တင်းရောဂါပိုးတွေ့ရှိရကြောင်း တပ်မတော်ကာကွယ်ရေးဦးစီးချုပ်ရုံးက ယနေ့(မေ ၄)တွင် သတင်းထုတ်ပြန်သည်။
၎င်းတပ်မတော်သားမှာ ဧပြီ ၃၀ ရက်တွင် ဖျားခြင်း၊ လည်ချောင်းနာခြင်း၊ ဝမ်းပျက်ဝမ်းလျှော ဖြစ်ခြင်းတို့ ခံစားရသဖြင့် မေ ၁ တွင် ကိုဗစ်နိုင်တင်းရောဂါနှင့်ပတ်သက်၍ ကြိုတင်ပြင်ဆင်ထားသော နယ်မြေခံတပ်မတော်ဆေးရုံရှိ ကုသဆောင်၌ သီးခြားစောင့် ကြည့်စစ်ဆေးခဲ့ခြင်းဖြစ်သည်။
ပိုးတွေ့စစ်သည်မှာ ရုံးပိုင်းဆိုင်ရာတာဝန်များထမ်းဆောင်သူ အသက် ၃၀ ကျော်အရွယ်ဖြစ်ကြောင်း၊ နေပြည်တော်ရှိ တပ်မတော်ဆေးသုတေသနတပ်ဆေးရုံတွင် ကုသနေကြောင်း တပ်မတော်သတင်းမှန် ပြန်ကြားရေးအဖွဲ့ ဒုတိယဥက္ကဋ္ဌဗိုလ်ချုပ်ထွန်းထွန်းညီကပြောသည်။
ရောဂါပိုးကူးစက်ခံရမှုအခြေအနေနှင့် ထိတွေ့ခဲ့သူများကို စုံစမ်းဖော်ထုတ်နေဆဲဖြစ်ပြီး ပိုးတွေ့စစ်သည်၏ မိသားစု၊ ၎င်းတာဝန်ထမ်းဆောင်ခဲ့သည့် ရုံးရှိလူများကို အသွားအလာကန့်သတ်ထားပြီး လိုအပ်သူများကို ရောဂါပိုးရှိမရှိ စိစစ်ရန် စီစဉ်နေကြောင်း ၎င်းကဆိုသည်။
“ကုတာကတော့ တပ်မတော်ဆေးပညာရှင်တွေ အဓိကတာဝန်ယူမှာပါ။ ကျန်းမာရေးဝန်ကြီးဌာနနဲ့ရော တရုတ်က လာကူနေတဲ့အဖွဲ့နဲ့ရော တိုင်ပင်ဆွေးနွေးတာတွေ လုပ်သွားမှာပါ” ဟု ၎င်းကပြောသည်။
ရောဂါစစ်ဆေးတွေ့ရှိရသည့် စစ်သည်ကို တပ်မတော်မှကြိုတင်စီစဉ်ထားသည့် ကိုဗစ်နိုင်တင်းရောဂါအထူးကုသရန် သတ်မှတ်ထားသည့် ဆေးရုံသို့ပို့ဆောင်၍ ကုသမှုခံယူလျက်ရှိကြောင်း ၎င်း၏ကျန်းမာရေးအခြေအနေမှာ တည်ငြိမ်ကောင်းမွန်လျက်ရှိကြောင်း တပ်မတော်က ထုတ်ပြန်သည်။
အဆိုပါစစ်သည်မှာ မြန်မာနိုင်ငံအတွင်း၌ ကိုဗစ်နိုင်တင်းရောဂါပိုး ကူးစက်ခံရသည့် ပထမဆုံး တပ်မတော်သားဖြစ်ပြီး ရုရှားနိုင်ငံသို့ ပညာတော်သင် ရောက်ရှိနေသည့် တပ်မတော်သား ၅ ဦးမှာလည်း ကိုဗစ်နိုင်တင်းရောဂါ ကူးစက်ခံထားရကြောင်း တပ်မတော်ကာကွယ်ရေးဦးစီးချုပ်ရုံးက ဧပြီ ၂၉ က သတင်းထုတ်ပြန်ထားသည်။
