မယားပါသမီးအား ၈ နှစ်ကြာ အဓမ္မပြုကျင့်ခဲ့ပြီး ကိုယ်ဝန်ဖျက်ချစေခဲ့သူအား ဧရာဝတီတိုင်း ၊ မြောင်းမြခရိုင် တရားရုံးက ယနေ့တွင် အလုပ်ကြမ်းနှင့် ထောင်ဒဏ် ၂၃ နှစ် ချမှတ်လိုက်သည်။
အသက် ၄၂ နှစ်အရွယ် ဇော်ဌေး ဆိုသူသည် သူ၏အမျိုးသမီး၏ ပထမအိမ်ထောင်မှ ပါလာသည့် သမီးဖြစ်သူအား ၁၄ နှစ်အရွယ်ကတည်းက စတင်ကာ ၈နှစ်ကြာ အဓမ္မပြုကျင့်မှုအတွက် ထောင်ဒဏ်နှစ် ၂၀၊ သူအဓမ္မပြုကျင့်ပြီးနောက် ရခဲ့သည့် အမျိုးသမီးငယ်၏ ကိုယ်ဝန်ဖျက်ချမှုအတွက် ထောင်ဒဏ် ၃ နှစ် တို့ကို သီးခြားစီ ကျခံစေရန် တရားသူကြီးက အမိန့်ချခဲ့ခြင်းဖြစ်သည်။
၂၀၁၈ ခုနှစ်၊ ဇူလိုင်လ ကတည်းက ဖမ်းဆီးခံခဲ့ရသည့် တရားခံအား ၁၀ လကြာ စစ်ဆေးမှု ပြီးဆုံးချိန်တွင် တရားရုံးမှ မြောင်းမြ အကျဉ်းထောင်သို့ ခေါ်ဆောင်သွားကြောင်း တရားခွင်တွင် တက်ရောက်နားထောင်ခဲ့သူ ဦးစစ်အောင်က ပြောသည်။
ရဲမှတ်တမ်းများအရ အဓမ္မပြုကျင့်မှုသည် မိခင်ဖြစ်သူ ကျောင်းဆရာမ ၂၀၁၀ ခုနှစ်က ဖောင်ကြီးသင်တန်း တက်ရောက်နေစဉ် နေအိမ်တွင် ကျန်ခဲ့သည့် ထိုစဉ်က ၈တန်းကျောင်းသူ ၁၄နှစ်အရွယ် မယားပါသမီးအား ပထွေးဖြစ်သူ ဇော်ဌေးက စတင် အဓမ္မပြုကျင့်ခဲ့သည်ဟု ရေးသားထားသည်။
သင်တန်းပြီးဆုံးပြီးနောက် အိမ်ပြန်ရောက်ချိန် သူ၏သမီးက အဆိုပါ အဖြစ်အပျက်ကို ပြန်လည် တိုင်ကြားခဲ့ကြောင်း၊ ပတ်ဝန်းကျင်သို့ အကူအညီတောင်းခံပါက သတ်ပစ်မည်ဟု ခြိမ်းခြောက်သဖြင့် အချိန်အတော်ကြာ နှုတ်ဆိတ်နေခဲ့ရခြင်းဖြစ်ကြောင်း တရားလို ကျောင်းဆရာမ၏ ရဲစခန်းသို့ တိုင်ကြားချက်များတွင် ရေးသားထားသည်။
