တယ်လီနောမြန်မာကို အပြီးသတ်ဝယ်ယူပြီးနောက် M1 Group က ရွှေဗျိုင်းဖြူကုမ္ပဏီထံ ရှယ်ယာ ၃၀၀ ကျော် ထပ်မံလွှဲပြောင်းပေးလိုက်ပြီဖြစ်ရာ စုစုပေါင်း ၈၀ ရာခိုင်နှုန်းအထိ ပိုင်ဆိုင်သွားပြီ ဖြစ်သည်။
သုံးစွဲသူ ၁၈ သန်းကျော်ကို ဝန်ဆောင်မှုပေးနေသော မိုဘိုင်းအော်ပရေတာကို ပိုင်ဆိုင်ခွင့်ရသည့် ကုမ္ပဏီတွင် ရွှေဗျိုင်းဖြူကုမ္ပဏီပိုင်ရှင်၏သားကို ဒုအမှုဆောင်အရာရှိချုပ်အဖြစ် ခန့်အပ်ထားသည်။
စစ်တပ်ကျောထောက်နောက်ခံ ရွှေဗျိုင်းဖြူကုမ္ပဏီသည် ယနေ့ (မတ် ၁၈) မှစ၍ တယ်လီနောမြန်မာ၏ အဓိကပိုင်ရှင်ဖြစ်ကာ အလွှဲအပြောင်းကိစ္စများလည်း စတင်နေပြီဖြစ်သည်။
စစ်ကောင်စီ ခွင့်ပြုချက်အားလုံး ရပြီဖြစ်သဖြင့် မြန်မာနိုင်ငံမှ တယ်လီနော ထွက်ခွာတော့မည်ဖြစ်ကာ လာမည့်သီတင်းပတ်အတွင်း ပိုင်ရှင်သစ်က စတင်တာဝန်ယူဖွယ်ရှိသည်။
အသေးစိတ် ထုတ်ဖော်ပြောဆိုခြင်း မရှိသော်လည်း စစ်ကောင်စီလက်အောက်ခံ ဆက်သွယ်ရေးညွှန်ကြားမှုဦးစီးဌာန၏ ခွင့်ပြုမိန့်ရရှိပြီဖြစ်ကြောင်း နော်ဝေရှိ တယ်လီနောရုံးချုပ်က အတည်ပြုသည်။