(ရန်ကုန်) – ကယားပြည်နယ်၊ လွိုင်ကော်မြို့ ပြည်နယ်ခန်းမအနီးရှိ ပန်းခြံတွင် ဗိုလ်ချုပ်အောင်ဆန်း မြင်းစီးကြေးရုပ် ထားရှိမည့်အစီအစဉ်အား ပြည်နယ်အတွင်းရှိ တိုင်းရင်းသားများအ ကြား စိတ်ဝမ်းကွဲမှုများနှင့် မတည်ငြိမ်မှုများ ဖြစ်ပွားစေနိုင်သည့်အတွက် ရပ်ဆိုင်းထားရန် ကရင်နီလူငယ်များက ရန်ကုန်တွင်ယနေ့(ဇူလိုင် ၂၄ ရက်) ပြုလုပ်သည့်သတင်းစာရှင်းလင်းပွဲ တွင်ပြောကြားလိုက်သည်။
ပြည်နယ်အစိုးရက ဖွဲ့စည်းထားသည့် ဗိုလ်ချုပ်ကြေးရုပ်ဖြစ်မြောက်ရေးကော်မတီကို ဖျက်သိမ်းလိုက်ကြောင်း ဇူလိုင် ၂၃ ရက်နေ့က ပြည်နယ်အစိုးရအဖွဲ့ရုံးတွင်ပြုလုပ်သည့် သတင်းစာရှင်း လင်းပွဲတွင် ပြည်နယ်ဝန်ကြီးချုပ်ဦးအယ်ဖောင်းရှိုက ပြောကြားခဲ့သော်လည်း ပြည်သူလူထု၏အစီအစဉ်ဖြင့် လုပ်ဆောင်ပါက ပံ့ပိုးပေးသွားမည်ဟု ၎င်းက ပြောကြားခဲ့ခြင်းဖြစ်သည်။
ဗိုလ်ချုပ်ကြေးရုပ်ထားရှိမည့် အစီအစဉ်အား ထောက်ခံသူတချို့လည်းရှိနေပြီး စိတ်ဝမ်းကွဲမှုများနှင့် မတည်ငြိမ်မှုများလည်း ဖြစ်ပွားနိုင်သည်ဟု ကရင်နီလူငယ်များသမဂ္ဂကော်မတီဝင် ဥတ္တရာအောင်ကပြောသည်။
“ဗိုလ်ချုပ်ဆိုတာနဲ့ အားလုံးကလည်း လုံးဝလေးစားပြီးသားဖြစ်နေတာကြောင့် ဒါက လုံးဝကို ထိလွယ်ရှလွယ်ကိစ္စကြီး ဖြစ်နေတယ် ” ဟု ကိုဥတ္တရာအောင်က ပြောသည်။
ထိပ်တိုက်ရင်ဆိုင်ရမည့် ပြဿနာများကို အတတ်နိုင်ဆုံး ရှောင်ရှားသွားမည်ဖြစ်သော်လည်း ဗိုလ်ချုပ်ကြေးရုပ်ထားရှိမည့်ကိစ္စကိုတော့ ဆက်လက်ကန့်ကွက်သွားမည်ဟု ကရင်နီ လူငယ်များကပြောသည်။
ပြည်နယ်ဝန်ကြီးချုပ်၏ပြောဆိုချက်အရ ကြေးရုပ်ထားရှိရေးအစီအစဉ်အား လုံးဝရပ်ဆိုင်းမည့် သဘောမတွေ့ရသည့်အတွက် လက်မခံနိုင်ခြင်းဖြစ်ကြောင်း ၎င်းတို့ကပြောသည်။
ဗိုလ်ချုပ်ကြေးရုပ်သည် ရုပ်တုတစ်ခုသာမကပဲ ကရင်နီပြည်နယ်၏ နိုင်ငံရေးနှင့် အမျိုးသားရေးတို့နှင့် ပတ်သက်ဆိုင်သည်ဟု ယူဆကြောင်း ကရင်နီလူငယ်များအဖွဲ့၏ပြောရေးဆိုခွင့်ရှိသူ ခွန်ဘားနဒ်က ပြောသည်။
“ကျွန်တော်တို့တိုင်းရင်းသားတွေရဲ့ တည်ရှိမှုကို အသိအမှတ်မပြုဘူးဆိုရင် အမျိုးသားပြန်လည်ရင်ကြားစေ့ရေးက ခက်ခဲနေဦးမှာပဲ” ဟု ၎င်းကပြောသည်။
ဗိုလ်ချုပ်အောင်ဆန်းရုပ်တု ထားရှိရေးအတွက် ပြည်နယ်အစိုးရက ဖေဖော်ဝါရီလအတွင်း ဆုံးဖြတ်ခဲ့ခြင်းဖြစ်ပြီး အဆိုပါဆုံးဖြတ်ချက်သည် ဒေသခံများ၏ သဘောထားအတည်ပြုချက် ကိုလည်းရယူထားခြင်းမရှိကြောင်း လူငယ်အဖွဲ့ကပြောသည်။
