မန္တလေး — မူးယစ်ဆေးဝါးရောင်းဝယ်ဖောက်ကားမှုဖြင့် ဖမ်းဆီးခံထားရသည့် အဆိုတော် ရသ ခေါ် ရဲမင်းသိန်း အပါအဝင် သုံးဦးအား ယနေ့ ဒီဇင်ဘာလ ၂၈ ရက် နေ့လယ်တွင် မန္တလေးခရိုင်တရားရုံးတွင် အလုပ်နှင့်ထောင်ဒဏ် ၁၁ နှစ်စီ ချမှတ်လိုက်သည်။
“ကျွန်တော်လူငယ်ပါ။ ကိုယ်ကြိုက်လို့ ကိုယ်လုပ်တာ ကိုယ်တာဝန်ခံရဲပါတယ်။ ဒါပေမဲ့ ကျွန်တော်မရောင်းဝယ် မဖောက်ကားဘဲ ခုလိုအမိန့်ချတဲ့အတွက် များစွာစိတ်မကောင်းပါဘူး၊ ဥပဒေကို ပြန်ပြင်ဆင်သင့်ပါပြီ”ဟု ၎င်းက အမိန့်ချပြီးနောက် ပြောသည်။
မန္တလေးမြို့ ချမ်းမြသာစည်မြို့နယ် ထွန်တုံးရပ်ကွက် အောင်စေတနာလမ်း ၄၉ လမ်း နှင့် လမ်း ၅၀ လမ်းကြားရှိ ‘နန်းထိုက်ပန်’ ဧည့်ရိပ်မွန်တွင် သြဂုတ်လ ၁၄ ရက်နေ့က သတင်းအရ ဝင်ရောက် ရှာဖွေရာမှ ရန်ကုန်မြို့နေသူ ရဲမင်းသိန်း(ခ) ရသ၊ မျိုးတင့်နှင့် ခေမီ(ခ) ဗာတားမီးတို့ သုံးဦးအား စိတ်ကြွရူးသွပ်ဆေးပြား ၁၆၅၅ ပြား နှင့်အတူ ဖမ်းဆီးရမိခဲ့ခြင်း ဖြစ်သည် ။
ထောင်ဒဏ် အနည်းဆုံး ၁၀ နှစ်မှ နှစ်အကန့်အသတ်မရှိအထိ ပြစ်ဒဏ်ချမှတ်နိုင်သည့် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာ ဥပဒေပုဒ်မ ၁၉(က) မူးယစ်ဆေးဝါး ရောင်းဝယ်ဖောက်ကားမှုဖြင့် စွဲချက်တင်ခဲ့ရာ ထောင်ဒဏ် ၁၁ နှစ်စီ အမိန့်ချခဲ့ခြင်းဖြစ်သည်။
အနုပညာရှင်များ မူးယစ်ဆေးဝါးမှုဖြင့် ဖမ်းဆီးတရားစွဲဆိုထောင်ဒဏ်ချမှတ်ခံရမှုများ မြင့်တက်လာခဲ့ရာ ပြီးခဲ့သည့် ရက်ပိုင်းကလည်း သရုပ်ဆောင်မိုးအောင်ရင်ကို မူးယစ်ဆေးဝါးပုဒ်မများဖြင့် ထောင်ဒဏ် စုစုပေါင်း ၁၇ နှစ်ချမှတ်ခဲ့သည်။ ဒါရိုက်တာမိုက်တီးနှင့် အဆိုတော်ရွှေထိုက်တို့လည်း မူးယစ်ဆေးဝါးမှုဖြင့် တရားရင်ဆိုင်နေရဆဲ ဖြစ်သည်။
