တိုင်းရင်းသားလက်နက်ကိုင်အဖွဲ့အစည်းတချို့ဟာ မူးယစ်ဆေးဝါးနဲ့ မကင်းဘူးလို့ ပြောဆိုမှုတွေနဲ့ပတ်သက်လို့ မူးယစ်ဆေးဝါးနဲ့ပတ်သက်ရင် TNLA အနေနဲ့ လိပ်ပြာသန့်တယ်လို့ ပလောင်ပြည်နယ်လွတ်မြောက်ရေးတပ်ဦး(PSLF/TNLA)ရဲ့ ဒုတိယဥက္ကဋ္ဌ ဗိုလ်ချုပ်တားဂျုပ်ဂျားက ပြောလိုက်ပါတယ်။
ကျပ်သိန်းပေါင်း ကိုးထောင်ကျော် တန်ဖိုးရှိတဲ့ ဘိန်းဖြူ၊ ဘိန်းမဲနဲ့ ရာမဆေးပြားတွေကို ဇွန်လ ၁၆ရက်နေ့မှာ ကျရောက်တဲ့ အပြည်ပြည်ဆိုင်ရာ မူးယစ်ဆေးဝါးတိုက်ဖျက်ရေးမှာ TNLA က မီးရှို့ဖျက်ဆီးလိုက်တာပါ။ စစ်ကောင်စီရဲ့ လေကြောင်းအန္တရာယ်ကို သတိကြီးကြီးထားပြီး TNLA ရဲ့ ထိန်းချုပ်နယ်မြေတစ်နေရာမှာ လုပ်ရတဲ့ ဒီအခမ်းအနားကို ဒေသခံလူထု ရာနဲ့ချီပြီး တက်ရောက်လာတာ တွေ့ရပါတယ်။၂၀၁၈ခုနှစ်ကနေ အခုနှစ် ဇွန်လအထိ ၅နှစ်အတွင်း ဖမ်းဆီးရမိထားတဲ့ မူးယစ်ဆေးဝါးတွေကို TNLA က ဖျက်ဆီးခဲ့တာ ဖြစ်ပါတယ်။
