လွန်ခဲ့သည့် သုံး လ ခန့်ကတည်းက အလုပ်ထုတ်ခံခဲ့ရသဖြင့် ဆန္ဒပြနေကြသည့် မန္တလေးတိုင်း ပလိပ် ပန်ဒါအထည်ချုပ်စက်ရုံမှ အလုပ်သမား၂ဝဝကျော်သည် လာမည့်ရက်ပိုင်းအတွင်း လုပ်ငန်းခွင် ပြန်ဝင်တော့မည်ဟု မန်းလွှတ်တော် အမတ် ဦးလှိုင်ဝင်းက ပြောသည်။
ယမန်နေ့ညက မန္တလေးတိုင်းဝန်ကြီးချုပ်နှင့် လွှတ်တော်ကိုယ်စားလှယ်များသည် အလုပ်ရှင်နှင့် အလုပ်သမားအကြား စေ့စပ်ညှိနှိုင်းမှုပြုလုပ်ပြီးနောက် အဆိုပါသဘောတူညီချက် ရခဲ့ခြင်းဖြစ်သည်။
“ဝန်ကြီးချုပ်နဲ့ စက်ရုံတာဝန်ရှိသူတွေ ဆွေးနွေးတဲ့အဖြေကတော့ အလုပ်သမား၂ဝဝကျော်ကို အလုပ်ပြန်ခန့်မယ်။ တစ်ပြိုင်နက်ထဲမှာ စက်ရုံကတာဝန်ရှိသူတွေ ချုပ်ဆိုခိုင်းတဲ့EC စာချုပ် (အလုပ်ရှင်၊ အလုပ်သမား အလုပ်ခန့်ထားမှုဆိုင်ရာ သဘောတူစာချုပ်) ကို ချုပ်ဆိုရမည်”ဟု ဦးလှိုင်ဝင်းက ပြောသည်။
ယမန်နေ့ နံနက်ပိုင်းက အလုပ်သမားများသည် စက်ရုံတည်ရှိရာ ပလိပ်မြို႔မှ မန္တလေးမြို႕ပေါ်ရှိ အစိုးရရုံးသို့ ချီတက် ဆန္ဒပြရန် စီစဉ်ခဲ့သော်လည်း တားဆီးခံခဲ့ရသည်။ ညပိုင်းတွင် ဝန်ကြီးချုပ်နှင့် တွေ့ဆုံဆွေးနွေးခဲ့ ကြပြီး ယင်းကဲ့သို့ သဘောတူညီမှု ရခဲ့ခြင်းဖြစ်သည်။
