အလုပ်သမားရေးရာ ဖြေရှင်းရေးဥပဒေကို ဒုတိယအကြိမ် ပြင်ဆင်သည့်( ဥပဒေမူကြမ်း) နှင့် အလုပ်သမားအဖွဲ့အစည်းဥပဒေကို ဒုတိယအကြိမ် ပြင်ဆင်သည့် (ဥပဒေ မူကြမ်း)များတွင် အလုပ်သမားများ၏ အသံများပါဝင်စေရေး၊ နိုင်ငံ့ဝန်ထမ်းများအား အလုပ်သမားအဖြစ်သတ်မှတ်ပေးရေးစသည့် ရာနှင့်ချီသည့် အလုပ်သမားများက မန္တလေးမြို့တွင် ယနေ့ ဆန္ဒပြခဲ့ကြသည်။
“အလုပ်သမား ဥပဒေတွေမှာ အလုပ်သမားအသံတွေမပါတာရယ် အလုပ်သမားခေါင်းဆောင်တွေ အလုပ်ထုတ်ခံရမှုနှုန်းမြင့်တက်လာတာရယ်တွေကြောင့် အခုလိုဆန္ဒပြတောင်းဆိုတာဖြစ်တယ်”ဟု မြန်မာနိုင်ငံစက်မှုလက်မှုနှင့် ဝန်ဆောင်မှုလုပ်ငန်းပေါင်းစုံအလုပ်သမားများသမဂ္ဂအဖွဲ့ချုပ်မှ လက်ထောက်အတွင်းရေးမှူး ကိုနေလင်းအောင်က ပြောသည် ။
အလုပ်သမားများသည် ပြည်ကြီးတံခွန်မြို့နယ် အေးသုခလမ်းမှ မနော်ရမ္မံ လူထုဟစ်တိုင် အနီးထိ လမ်းလျှောက်ဆန္ဒပြခဲ့ကြသည်။
၎င်းတို့သည် အလုပ်သမားတရားရုံးများပေါ်ပေါက်ရေး၊ လွတ်လပ်စွာ သင်းပင်းဖွဲ့စည်းရေး၊ နိုင်ငံ့ဝန်ထမ်းများအား အလုပ်သမားအငြင်းပွားမှုဥပဒေတွင်ထည့်သွင်းပေးရေး၊ ဆောက်လုပ်ရေးအလုပ်သမားများအား ကန့်သတ်သည့် ညွှန်ကြားချက်များ ဖျက်သိမ်းရေး၊ အထူးစီးပွားရေးဇုန်လုပ်သားများ ဥပဒေအကာအကွယ်ရရှိရေး ၊ အလုပ်သမားဥပဒေများကို ILO စံနှုန်းနဲ့အညီ ပြင်ဆင်ရေး ၊ ILO ပြဋ္ဌာန်းချက် (၉၈) အား အစိုးရမှ လက်မှတ်ရေးထိုးပေးရေး ၊မန္တလေးတိုင်းအတွင်း အလုပ်သမားဝန်ကြီး ခန့်အပ်ပေးရေး စသည့် တောင်းဆိုချက်များကို တောင်းဆိုခဲ့ကြသည်။
ဆန္ဒပြသူများသည် အစောပိုင်းက မနော်ရမ္မံ ပြည်သူ့ဟစ်တိုင်တွင် ဟောပြောရန် စီစဉ်ထားသော်လည်း ရဲတပ်ဖွဲ့က လမ်းတလျှောက် တားဆီးခဲ့သဖြင့် ၆၂လမ်းမနော်ရမ္မံအနီး လမ်းကြားတစ်ခုတွင် ဟောပြောဆန္ဒထုတ်ဖော်ခဲ့ကြပြီး မနက်၁၁နာရီတွင် ပြန်လည် ထွက်ခွာသွားကြသည်။
