တိုက်ပွဲကြားပိတ်မိနေသည့် ကချင်ဒေသပြည်သူများ လုံခြုံရာသို့ လွတ်မြောက်ရေး တောင်းဆိုခြင်း၊ စစ်ဘေးရှောင်သူတို့အတွက် အလှူငွေကောက်ခံခြင်း လှုပ်ရှားမှုကို လူ့ဘောင်သစ်လူငယ်၊ ဗကသများအဖွဲ့ချုပ် စသည့် အဖွဲ့အသီးသီးမှ လူငယ်များ ပူးပေါင်း၍ ရန်ကုန်၊ ကမာရွတ်မြို့နယ်တွင် မေ ၂ရက်နေ့က ပြုလုပ်ခဲ့သည်။
လူ့ဘောင်သစ်လူငယ် ဗဟိုလုပ်ငန်းကော်မတီအဖွဲ့ဝင် ကိုမျိုးစော့က “ကျွန်တော်တို့ ကချင်လူငယ်ထုနဲ့အတူ ရပ်တည်ပါတယ်။ ပိတ်မိနေတဲ့ပြည်သူတွေ လွတ်မြောက်ဖို့၊ ပြည်တွင်းစစ်ရပ်ဖို့နဲ့ တရားမျှတမှုအတွက် ကျွန်တော်တို့လည်း အတူရှိနေပါတယ်လို့ ပြောချင်ပါတယ် ” ဟု ဆိုသည်။
လာမည့် ရက်ပိုင်းအတွင်း ရန်ကုန်မြို့လယ်တွင် အလှူငွေ ကောက်ခံမည်ဖြစ်ပြီး ရရှိမည့် ရန်ပုံငွေကို ကချင်ပြည်နယ်ရှိ လူငယ်အဖွဲ့အစည်းများနှင့် ချိတ်ဆက်ပြီး လှူဒါန်းသွားမည် ဖြစ်ကြောင်း ဗကသများအဖွဲ့ချုပ် ဗဟိုလုပ်ငန်းကော်မတီအဖွဲ့ဝင် ကိုဇေယျက ပြောသည်။
လူသားချင်းစာနာမှုဆိုင်ရာ အရေးကိစ္စများအတွက် ကုလသမဂ္ဂ လက်ထောက်အထွေထွေအတွင်းရေးမှူးချုပ်၊ အရေးပေါ်အခြေအနေတုံ့ပြန်ဆောင်ရွက်ရေးဆိုင်ရာ ဒုတိယညှိနှိုင်းရေးမှူး မစ္စအာရ်ဆူလာမြူလာ ဧပြီ ၆ ရက်နေ့က ကချင်ပြည်နယ်၊ မြစ်ကြီးနားမြို့နယ်ရောက် စစ်ဘေးရှောင်များနှင့် တွေ့ဆုံခဲ့ပြီး ရက်ပိုင်းအတွင်း ပေါ်ပေါက်လာသည့် တိုက်ပွဲများကြောင့် ဒေသခံပေါင်း ထောင်နှင့်ချီ ထွက်ပြေးတိမ်းရှောင်နေရပြီး တချို့မှာ တိုက်ပွဲအတွင်း ပိတ်မိနေကြောင်း သိရသည်။
ပိတ်မိနေသည့် ဒေသခံများကို ဘေးကင်းရာ ရောက်ရှိရေးအတွက် အစိုးရက တာဝန်ယူဆောင်ရွက်ပေးရန် မြစ်ကြီးနားဒေသတွင် လူငယ်များ ဦးဆောင်ကာ ဆန္ဒပြခဲ့ပြီး သပိတ်စခန်းဖွင့် တောင်းဆိုလျက်ရှိသည်။
ကချင်တစ်ကျော့ပြန်စစ်ပွဲသည် ၂၀၁၁ ခုနှစ်က ပြန်လည်ဖြစ်ပွားခဲ့ရာ ယခုအချိန်ထိ နေရပ်မပြန်နိုင်သေးသည့် စစ်ဘေးရှောင်များ ထောင်နှင့်ချီ ရှိနေသည်။
