ပြည်တွင်းစစ်ရပ်စဲရေးနှင့် ပြည်တွင်းငြိမ်းချမ်းရေးတို့ ထွန်းကားလာစေရန် ရည်ရွယ်တည်ထောင်ခဲ့သည့် “ပန်းရဲ့လမ်း” ဂီတ အဖွဲ့ တည်ထောင်သူ တစ်ဦးဖြစ်သည့် ကိုသားထွေး သည် အသည်းခြောက်ရောဂါဖြင့် ယနေ့ နံနက်ပိုင်းတွင် ရန်ကုန် တောင်ဥက္ကလာပမြို့နယ်အတွင်းရှိ အောင်ရတနာဆေးရုံတွင် ကွယ်လွန်သွားသည်။
အသက် ၅၆ နှစ်အရွယ် ကလေး သုံး ယောက်ဖခင် ကိုသားထွေးသည် သည်းခြေကျောက်တည်သည့် ရောဂါကို သွားရောက် စစ်ဆေးမှုခံယူချိန်ကျမှ သူ့တွင် အသည်းခြောက် ရောဂါပါ ရှိနေပြီဟု သိရှိခဲ့ရကြောင်း ကိုသားထွေးမိသားစုနှင့် နီးစပ်သည့် ဦးဒီချစ်မျိုးက ပြောသည်။
“ဒီအသည်းခြောက်တဲ့ ရောဂါကို ကုရင်းနဲ့ပဲ တဖြည်းဖြည်း ဆိုးရွားလာပြီးတော့ ဆုံးပါးသွားခဲ့တာပါ ” ဟု ၎င်းက ပြောသည်။
သူ၏ဈာပနအခမ်းအနားကို ရန်ကုန်မြို့စွန်ရှိ ရေဝေးသုသာန်တွင် ကြာသပတေးနေ့(နိုဝင်ဘာ ၈) နေ့လယ် ၂နာရီတွင် ကျင်းပမည်ဖြစ်သည်။
ပန်းရဲ့လမ်း တည်ထောင်သူများအနက်မှ တစ်ဦးဖြစ်သည့် ကိုတိုးလွင်(ဥတ္တရ အလင်း)က ကိုသားထွေးသည် ပြည်တွင်းစစ်အဆုံးသတ်ရေးအတွက် တက်တက်ကြွကြွ လှုပ်ရှားခဲ့သူ တစ်ဦးဖြစ်ကြောင်း သူ၏သူငယ်ချင်းအား ချီးကျုးခဲ့သည်။
“(ပန်းရဲ့လမ်းက) လူသား အကျိုးပြုတွေ အများကြီး လုပ်ခဲ့ကြတယ်။ ပြည်တွင်းစစ်နဲ့ ငြိမ်းချမ်းရေးအတွက် လုပ်ခဲ့ကြတယ်” ဟု ပြောသည်။
“ပန်းရဲ့လမ်း” တည်ထောင်သူ အခြားတစ်ဦးဖြစ်သည့် သီချင်းရေးဆရာနှင့် ဂီတာသမား ကိုရဲလွင်သည်လည်း ပြီးခဲ့သည့် ဇန်နဝါရီက ကွယ်လွန်ခဲ့သဖြင့် အဆိုပါအဖွဲ့တွင် ကိုတိုးလွင်(ဥတ္တရ အလင်း) တစ်ယောက်သာ ကျန်ရှိတော့သည်။
ကိုသားထွေး မကွယ်လွန်ချိန်တွင် တေးသီချင်းခွေ ၁၀ ခွေခန့် ဖန်တီးခဲ့ပြီး ၁၉၈၅ တွင် ရေးသားသီဆိုခဲ့သည့် “ပျိုး” သီချင်းမှာ လူကြိုက်များသည့် သီချင်းတစ်ပုဒ်ဖြစ်သည်။
ကိုသားထွေး ရေးသားသည့် သီချင်းများတွင် ရွာအဝင်၊ ချစ်ရတဲ့သူနှင့်ပန်းခင်းထဲမှာ တေးသီချင်းများမှာ နာမည်ကျော်ကြားသည့် သီချင်းများဖြစ်သည်။
