ကျောက်ဆည်ပေါက်ကွဲမှုတွင် ပရဟိတဆရာဝန်နှင့် အရပ်သား ၂ ဦး သေဆုံးခဲ့

မန္တလေးတိုင်း၊ ကျောက်ဆည်မြို့လယ်တွင် ဒီဇင်ဘာ ၃၁ ရက်နေ့က ပေါက်ကွဲမှုဖြစ်ပွားရာ အမျိုးသားဒီမိုကရေစီအဖွဲ့ချုပ် (NLD) ပါတီ ထောက်ခံသည့် ပရဟိတဆရာဝန်တစ်ဦးနှင့် အရပ်သား ၂ ဦး သေဆုံးခဲ့ရာ ယနေ့ (ဇန်နဝါရီ ၄) အထိ မည်သည့်အဖွဲ့အစည်းလက်ချက်မှန်း မသိရသေးကြောင်း ဒေသခံတို့က ဆိုသည်။

ယင်းနေ့ ညနေ ၃ နာရီခန့်တွင် မြို့မဈေးတောင်ဘက် ၄၅ နှစ်ဝန်းကျင် ဒေါက်တာလှိုင်းဇော်ညွန့်၏ အိမ်အနီး ပေါက်ကွဲခဲ့သည်ဟု မိသားစုနီးစပ်သူတစ်ဦးက ပြောသည်။  

“ဒေါက်တာက သူ့အိမ်နားမှာ အထုပ်တစ်ထုပ်တွေ့တော့ ဘာအထုပ်လဲ ကြည့်တဲ့အချိန် ပေါက်ကွဲသွားတာ။ အထုပ်က မီးခိုးတွေလည်း ထွက်နေတယ် ပြောတယ်” ဟု အမည်မဖော်လိုသော ထိုအမျိုးသားက ပြောသည်။

“လမ်းသွားလမ်းလာ ၂ ဦးက ပွဲချင်းပြီးဆုံးတယ်။ ဒေါက်တာကတော့ ဆေးရုံပို့တဲ့အချိန် လမ်းမှာ ဆုံးတယ်” 

လုပ်ကြံသတ်ဖြတ်ခြင်း ဖြစ်မည်ဟု ၎င်းက ယူဆသည်။  

“ဖြစ်တဲ့နေရာမှာ ဖောက်ခွဲရလောက်တဲ့ ဘာစစ်တပ်လမ်းကြောင်းမှလဲ မရှိဘူး၊ ဘာတပ်စွဲထားတာမှလဲ မရှိဘူး။ အနီးဆုံးက သူပဲရှိနေတာ”ဟု ၎င်းက ဆက်ပြောသည်။

၎င်းသည် ၂၀၁၂ ခုနှစ်မှစ၍ ၈၈ ငြိမ်းချမ်းရေးနှင့် ပွင့်လင်းလူ့အဖွဲ့အစည်း (ကျောက်ဆည်)တွင် ပါဝင်လုပ်ကိုင်ခဲ့ပြီး နိုင်ငံရေးတက်ကြွသူ ပရဟိတဆရာဝန်တစ်ဦးလည်းဖြစ်သည်ဟု ၎င်း၏ မိတ်ဆွေတစ်ဦးက ပြောသည်။

“သူက အနေအထိုင် တည်ကြည်အေးဆေးတယ်။ မဟုတ်မခံစိတ်ရှိတယ်။ ပရဟိတထက်သန်တယ်။ အခုလို ဖြစ်ရတာ သိပ်နှမြောဖို့ကောင်းတယ်ဗျာ”ဟု ထိုသူက ဆိုသည်။

အဆိုပါပေါက်ကွဲမှုနှင့် ပတ်သက်၍ ဇန်နဝါရီ ၂ တွင် ပြည်သူ့ကာကွယ်ရေးတပ် (ကျောက်ဆည်) က ၎င်းတို့လက်ချက် မဟုတ်ကြောင်းနှင့် ပြင်းထန်စွာရှုတ်ချကြောင်း ထုတ်ပြန်ခဲ့သည်။

ထိုဖောက်ခွဲမှုမှာ ဒေသကာကွယ်ရေးတပ်များ၏ လက်ချက်ဖြစ်သည်ဟု လူထုကြား ဝါဒဖြန့်ရန်၊ စိတ်ဝမ်းကွဲစေရန် သွေးထိုးသည့်ဖောက်ခွဲမှုဟု ယူဆကြောင်း၊ ကျောက်ဆည်မြို့၏ ကြယ်တစ်ပွင့်ဖြစ်သည့် ဒေါက်တာလှိုင်းဇော်ညွန့်နှင့် အရပ်သား ၂ ဦး၏ ဖြစ်ရပ်အတွက် အထူးဝမ်းနည်းကြေကွဲမိပါကြောင်း ထိုထုတ်ပြန်ချက်တွင် ပါရှိသည်။

စစ်ကောင်စီဘက်ကမူ ယင်းပေါက်ကွဲမှုနှင့် ပတ်သက်၍ သတင်းထုတ်ပြန်ခြင်း မရှိသေးပေ။

သေဆုံးသူ ဒေါက်တာလှိုင်းဇော်ညွန့်တွင် ဇနီး၊ သားတစ်ဦး၊ သမီးတစ်ဦးတို့ ကျန်ရစ်သည်ဟု သိရပြီး အသေးစိတ်အခြေအနေနှင့် ပတ်သက်၍ Myanmar Now အနေဖြင့် မိသားစုထံ ဆက်သွယ်မေးမြန်း၍ မရသေးပေ။ 

အမှားပြင်ဆင်ချက်

မူရင်းသတင်းတွင် ဒေါက်တာလှိုင်းဇော်ညွန့်ကို ထင်ရှားသည့် ကဗျာဆရာကြီး ကိုလေး(အင်းဝဂုဏ်ရည်)၏ သားဖြစ်ကြောင်း မှားယွင်းဖော်ပြမိခဲ့ပါသည်။

ထိုမှားယွင်းမှုအတွက် စာဖတ်သူများကို တောင်းပန်ပါသည်။