အာဏာသိမ်း​ခေါင်း​ဆောင် မြန်မာနိုင်ငံအပြင်ထွက်သည်နှင့် ဖမ်းဆီးရန် တိုက်တွန်း 

အာဆီယံထိပ်သီးအစည်းအ​ဝေးတက်​ရောက်မည်ဆိုသော အာဏာသိမ်း​စစ်ခေါင်း​ဆောင် ဗိုလ်ချုပ်မှူးကြီးမင်း​အောင်လှိုင်ကို မြန်မာနိုင်ငံအပြင်ရောက်သည်နှင့် နိုင်ငံတကာတရားစီရင်ပိုင်ခွင့်နှင့် လူသားမျိုးနွယ်အ​ပေါ် ကျူးလွန်​ထားသော ရာဇဝတ်မှုများအတွက် ဖမ်းဆီးသင့်ကြောင်း ကမ္ဘာလုံးဆိုင်ရာ R2P စင်တာ (GCR2P) အမှုဆောင်ညွှန်ကြားရေးမှူး ဆိုင်မွန်အဒမ်စ်က တိုက်တွန်းလိုက်သည်။

ကမ္ဘာလုံးဆိုင်ရာ GCR2P သည် အစိုးရမဟုတ်​သော နိုင်ငံတကာအဖွဲ့အစည်းတစ်ခုဖြစ်ပြီး R2P ကျင့်သုံးရန် ​စောင့်ကြည့်ကာ ဥပ​ဒေအရ ​ထောက်ခံအား​ပေး​သောအဖွဲ့ဖြစ်သည်။

အာဏာသိမ်းစစ်ခေါင်းဆောင်အစား ဧပြီ ၁၆ ရက်က ရွေးကောက်ခံအမတ်များ၊ တိုင်းရင်းသားကိုယ်စားလှယ်များနှင့် ဖွဲ့ထားသည့် အမျိုးသားညီညွတ်ရေးအစိုးရ (NUG) ကို အာဆီယံအစည်းအဝေး ဖိတ်ကြားသင့်ကြောင်းလည်း ဆိုင်မွန်အဒမ်စ်က ၎င်း၏ Twitter တွင် ရေးသားထားသည်။ 

အင်ဒိုနီးရှားနိုင်ငံ ဂျာကာတာမြို့၌ လာမည်ဧပြီ  ၂၄ ရက်တွင် ကျင်းပရန်ရှိသည့် မြန်မာ့အ​ရေးဆိုင်ရာအာဆီယံထိပ်သီးအစည်းအ​ဝေးကို အာဏာသိမ်းစစ်​ခေါင်း​ဆောင် ဗိုလ်ချုပ်မှူးကြီးမင်းအောင်လှိုင်တက်ရောက်မည်ဟု ထိုင်းအစိုးရ​ပြော​ရေးဆိုခွင့်ရှိသူက ယမန်​နေ့ (ဧပြီ ၁၇) က ပြောကြားကြောင်း နိုင်ငံတကာသတင်းဌာနများက ရေးသားထားသည်။

မြန်မာအ​ရေးတွင် အာဏာသိမ်းစစ်​ကောင်စီနှင့် ဖမ်းဆီးဖိနှိပ်ခံထားရ​သော အရပ်သားအစိုးရတို့ ​​​တွေ့ဆုံ​​​ဆွေး​နွေးပြီး ပြဿနာ​ပြေ​လည်​အောင် အ​ဖြေရှာနိုင်ရန် အာဆီယံ​ခေါင်း​​ဆောင်များက မျှော်လင့်နေသည်။ 

ကနဦးတွင် မြန်မာနိုင်ငံသို့ လူသားချင်းစာနာ​ထောက်ထားမှုဆိုင်ရာအကူအညီများ​ပေးနိုင်ရန် ညှိနှိုင်းပြီး ထို့နောက် ပြဿနာကို ​နှစ်ဖက်ဆွေး​နွေးညှိနှိုင်းအ​ဖြေရှာနိုင်ရန် သံတမန်​ရေးရာအရ ကြိုးစားလိုခြင်းဖြစ်​ကြောင်း သံတမန်များအားကိုးကားလျက် နိုင်ငံတကာသတင်းဌာနများက ရေးသားဖော်ပြကြသည်။ 

အာဆီယံအနေဖြင့် လူသတ်သမားခေါင်း​ဆောင်ကို ဖိတ်ကြားပါက မြန်မာ့​နွေဦးတွင် ရဲရင့်လှ​သော ပြည်သူများကို ​ကြီးမားစွာစော်ကားသကဲ့သို့ ဖြစ်မည်ဖြစ်ပြီး မြန်မာနိုင်ငံတွင် အကြမ်းဖက်မှုများရပ်တန့်​စေရန်နှင့် ဒီမိုက​ရေစီပြန်လည် အသက်သွင်းနိုင်​ရန် အာဆီယံအ​နေဖြင့် အမျိုးသားညီညွတ်ရေးအစိုးရ(NUG)နှင့်သာ​ ဆွေး​နွေးသင့်​ကြောင်း NUG ၏ နိုင်ငံတကာပူး​ပေါင်း​ဆောင်ရွက်​ရေးဆိုင်ရာဝန်ကြီး ​ဒေါက်တာဆာဆာက ရိုက်တာသတင်းဌာနကို ဧပြီ ၁၆ တွင် ပြောကြားထားသည်။ 

ထို့ပြင် စစ်​ကောင်စီလက်ထက်တွင် ပြည်သူများအတွက် လူသားချင်းစာနာ​ထောက်ထားမှု အကူအညီများ​ပေးပါကလည်း ပြည်သူထံမ​ရောက်ဘဲ စစ်တပ်ကသာ ခိုးယူသွားလိမ့်မည်ဟု ​ဒေါက်တာဆာဆာက​ ဆိုသည်။

သို့​သော် ဧပြီ ၁၇ တွင် ထိုင်းအစိုးရ​ပြော​ရေးဆိုခွင့်ရှိသူက အာဏာသိမ်း​ခေါင်း​ဆောင် အာဆီယံထိပ်သီးအစည်းအ​ဝေးတက်​ရောက်မည်ဖြစ်​ကြောင်း​ ဖြေကြားပြီး​နောက် ရိုက်တာက အမျိုးသားညီညွတ်​ရေးအစိုးရထံ မှတ်ချက်​တောင်းရန် ထပ်မံဆက်သွယ်ရာ ဆက်သွယ်မရဟု ရိုက်တာက ​ဖော်ပြသည်။

စစ်တပ်က အာဏာသိမ်းပြီး​နောက် မြန်မာနိုင်ငံတွင် စစ်အုပ်စု၏ တပ်ဖွဲ့ဝင်များက သတ်ဖြတ်၍ ဧပြီ ၁၇ ရက် ည​နေ ၆ နာရီအထိ ကျဆုံးသူ အနည်းဆုံး ၇၃၀ ဦးရှိပြီဖြစ်​ကြောင်း နိုင်ငံ​ရေးအကျဉ်းသားများကူညီ​စောင့်​ရှောက်​ရေးအသင်း( AAPP) က ထုတ်ပြန်ထားသည်။ ထို့ပြင် ဖမ်းဆီးခံထားရသူ​ပေါင်း ၃၁၅၂ ဦးရှိပြီး ဖမ်းဝရမ်းထုတ်ခံရသူ​ပေါင်း ၈၇၁ ဦးရှိ​ကြောင်းလည်း AAPP က ဆိုသည်။