ယခင် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီအစိုးရ၊ ယခု အမျိုးသား ဒီမိုကရေစီ အဖွဲ့ချုပ် အစိုးရတို့၏ တူညီသော အချက်မှာ ဝန်ကြီးဌာနတချို့က ပြည်သူ့ဘဏ္ဍာဖြင့် သတင်းစာများ၊ ရုပ်သံဌာနများ အကြီးအကျယ် တည်ထောင် လုပ်ကိုင်နေကြသောအချက် ဖြစ်သည်။
အစိုးရက သတင်းစာထုတ်ခြင်းမှာ ပြည်သူ့အတွက် ဖြစ်သည်ဟု မကြာသေးခင်က ပြည်ခိုင်ဖြိုးပါတီ၏ ပြောခွင့်ရသူတစ်ဦးဖြစ်လာသည့် ဒေါ်ယဉ်မင်းမြင့်ဆွေက ပြောသည်။
“နိုင်ငံပိုင်သတင်းစာဆိုတာတော့ ရှိရမယ်။ မရှိရင် ပြည်သူ မျက်စိပိတ်နားပိတ် ဖြစ်သွားမယ်” ဟု ဒေါ်ယဉ်မင်းမြင့်ဆွေက Myanmar Now ကို ပြောသည်။
သို့သော်လည်း ဒီမိုကရေစီနိုင်ငံ ဖြစ်သောကြောင့် မီဒီယာလွတ်လပ်ခွင့် မရှိမဖြစ် ရှိရမည်ဟု သူက ဆိုသည်။
“ကျွန်မတို့ဦးသိန်းစိန်အစိုးရ လက်ထက်မှာ မီဒီယာတွေ ဘယ်လောက်လွတ်လပ်ခဲ့လဲဆိုတာ မီဒီယာတွေလည်း အသိဖြစ်မှာပါ။ အထွေအထူး ပြောနေဖို့ မလိုဘူး ထင်ပါတယ်” ဟု ဒေါ်ယဉ်မင်းမြင့်ဆွေက ပြောသည်။
(အင်တာဗျူး အပြည့်အစုံကို https://myanmar-now.org/mm/news/415 တွင် ဖတ်ရှုနိုင်ပါသည်)
ပုဂ္ဂလိက သတင်းဌာန အများအပြား အရှုံးပြခြင်း၊ အမြတ်အစွန်းနည်းပါးခြင်းကြောင့် ရပ်နားသွားကြသော်လည်း ဝန်ကြီးဌာနတချို့ လုပ်ကိုင်နေသည့် သတင်းဌာနတို့မှာ ဘဏ္ဍာရေးအကျပ်အတည်းနှင့် ရင်ဆိုင်ရခြင်း မရှိပေ။
ပြန်ကြားရေးဝန်ကြီးဌာနအနေဖြင့် အစိုးရမီဒီယာအပြင် ပုဂ္ဂလိက မီဒီယာများ ဖြစ်ထွန်းပေါ်ပေါက်ရေးကိုလည်း ဆောင်ရွက်နေသည်ဟု ဝန်ကြီး ဒေါက်တာဖေမြင့်က ဒီဇင်ဘာ ၅ ရက်နေ့ မူဝါဒဆိုင်ရာ မိန့်ခွန်းတစ်ခုတွင် ထည့်သွင်းပြောကြားလိုက်သည်။
“အစိုးရ၏ ပုံနှိပ်မီဒီယာနှင့် ရုပ်သံမီဒီယာများသည် အစိုးရနှင့် အများ ပြည်သူအကြား ဆက်သွယ်ပေါင်း ကူးပေးသည့်တာဝန်ကို အဓိက ထမ်းဆောင်ပါကြောင်း” ဟု ဝန်ကြီးက ပြောသည်။
မြန်မာနိုင်ငံတွင် အစိုးရက ပြည်သူ့ဘဏ္ဍာဖြင့် မီဒီယာလုပ်ငန်းကြီးများ လုပ်ကိုင်ခြင်းကို ယခင် အာဏာရှင်အစိုးရများလက်ထက်ကပင် အစပြုခဲ့ခြင်းဖြစ်ကြောင်း တွေ့ရသည်။
