ရဲတပ်ဖွဲ့က မန္တလေးတိုင်း၊ ဝမ်းတွင်းမြို့နယ်၌ ဖမ်းမိထားသော မိုက်ကယ်ကျော်မြင့်ကို ယနေ့(ဇွန်လ ၁၄) တွင် ရန်ကုန်တိုင်း၊ ဒဂုံမြို့သစ်တောင်ပိုင်းမြို့နယ် တရားရုံးတွင် ဒုတိယအကြိမ် ရုံးထုတ်ခဲ့သည်။
တောင်ဒဂုံ ဘာသာရေး အကြောင်းပြု ဆူပူမှုတွင် ဦးဆောင်ပါဝင်ခဲ့မှုကြောင့် နိုင်ငံတော်အကြည်ညိုပျက်စေမှု ပုဒ်မ ၅၀၅(ခ)ဖြင့် မိုက်ကယ်ကျော်မြင့်နှင့် သီဟမျိုးနိုင်တို့ နှစ်ဦးကို တောင်ဒဂုံမြို့နယ်တရားရုံး၌ တောင်ဒဂုံမြို့နယ်အုပ်ချုပ်ရေးမှူးက တရားစွဲဆိုထားခြင်းဖြစ်သည်။
မိုက်ကယ်ကျော်မြင့်က တရားသူကြီးကို တရားလိုက တရားစွဲဆိုခဲ့သည့် ဦးတိုက်လျှောက်လွှာကို ဖတ်ချင်ကြောင်းနှင့် ၎င်းအား တရားခွင်အတွင်း လက်ထိတ်ဖြုတ်ပေးရန် ယနေ့တရားခွင်တွင် တောင်းဆိုခဲ့သည်။
“တရားသူကြီးကလည်း ပြောရတာ မောတယ်” ဟု ၎င်းက တရားသူကြီးရှေ့တွင် ပြောကြားခဲ့သည်။
တရားသူကြီးက ၎င်းအား ဦးတိုက်လျှောက်လွှာကို ဖတ်ခွင့်ပြုသော်လည်း လက်ထိတ်ကိုမူ ဖြုတ်ပေးခြင်း မရှိပေ။
ယနေ့ ရုံးထုတ်သို့ သံဃာ ၅ ဦးထက် မနည်း လာရောက်ပြီး ဦးဝီရသူ ထောက်ခံသည့် ဆုတောင်းပွဲများတွင် ပါဝင်သူ အမျိုးသားရေးလှုပ်ရှားသူအချို့လည်း လာရောက်ကြသည်ကို တွေ့ရသည်။
“တရားမဝင် ဗလီတွေကို ဖော်ထုတ်တဲ့ကောင်ကျတော့ ၅၀၅(ခ)နဲ့ တရားစွဲတယ်။ တရားမဝင် ဗလီ ဆောက်လုပ်ထားပါတယ် ဆိုပြီးတော့ ဝန်ခံလက်မှတ်ထိုးထားတဲ့ ကောင်တွေကျတော့ အရေးယူမှု မရှိဘူး။ ဗုဒ္ဓဘာသာကို အကျင့်ပျက်ဘာသာဖြစ်အောင် လုပ်တဲ့ကောင်တွေကို မိုက်ကယ်ကျော်မြင့်က စိန်ခေါ်တယ်။ တရားခွင်ကို လာနားထောင်ကြည့်” ဟု မိုက်ကယ်ကျော်မြင့်က အချုပ်ကားပေါ်မှ ပြောဆိုသည်။
မိုက်ကယ်ကျော်မြင့်က တရားရုံးပရိဝုဏ်အတွင်းနှင့် အချုပ်ကားပေါ်မှနေ၍ အော်ဟစ်ပြောဆိုခဲ့ခြင်းဖြစ်သည်။
- တောင်ဒဂုံ ဘာသာရေး အဓိကရုဏ်းခေါင်းဆောင် မိုက်ကယ်ကျော်မြင့်ကို ဝမ်းတွင်းမြို့၌ဖမ်းမိ
- မိုက်ကယ်ကျော်မြင့်ကို တရားရုံးတွင် ချုပ်ခွင့်ယူပြီး အင်းစိန်ထောင်ပို့
၎င်းအား တရားစွဲဆိုသည့် တောင်ဒဂုံမြို့နယ်အုပ်ချုပ်ရေးမှူးကိုလည်း သက်သေအဖြစ် တောင်ဒဂုံရဲစခန်းမှူးနှင့် မြို့နယ်မှူးတို့ကို ထည့်သွင်းမှု မရှိသည့်အပေါ် တရားခွင်အတွင်း မေးခွန်းထုတ်ခဲ့သည်။
နောက်ရုံးချိန်းကို ဇွန်လ ၂၁ ရက်သို့ ပြန်လည် ချိန်းဆိုထားပြီး တရားလိုကို စတင်စစ်ဆေးမည်ဟု တရားရုံးထံမှ သိရသည်။
မေလ ၁၅ ရက်ညက ဖြစ်ပွားခဲ့သည့် တောင်ဒဂုံဆူပူမှုတွင် မိုက်ကယ်ကျော်မြင့် ဦးဆောင်သည့် လူအင်အား ၁၀၀ ခန့်က တောင်ဒဂုံမြို့နယ် ၁၀၆၊ ၆၄ နှင့်၂၆ ရပ်ကွက်များရှိ အစ္စလာမ်ဘာသာဝင်များ ဝတ်ပြုဆုတောင်းရာ နေအိမ်များကို ဝင်ရောက်စစ်ဆေးခဲ့ပြီး ဒေသခံ အစ္စလာမ်ဘာသာရေး လူကြီးများအား နောင်တွင် ထပ်မံဝတ်ပြုခြင်း မပြုလုပ်ရန် ညဉ့်သန်းခေါင်ယံအချိန်တွင် ခံဝန်ရေးထိုးစေခဲ့သည်။
- အစ္စလာမ်ဥပုသ်ဝတ်ပြုမှုများကို မျိုးချစ်ဆိုသူများက တုတ်ဓားများဖြင့် လာရောက် တားဆီး
- တောင်ဒဂုံ ဘာသာရေးဆူပူမှု ကြိုတင်ကြံစည်ခြင်းဖြစ်
ယင်းကြောင့်မိုက်ကယ်ကျော်မြင့်နှင့် သီဟမျိုးနိုင်တို့ကို နိုင်ငံတော် အကြည်ညိုပျက်စေမှု ၅၀၅ (ခ) ဖြင့် တရားစွဲဆိုထားခြင်းဖြစ်ပြီး ယင်းပုဒ်မမှာ ပြစ်မှုထင်ရှားပါက ၂ နှစ်ထိ ထောင်ဒဏ် တစ်မျိုးမျိုးဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်နိုင်ကြောင်း ရာဇသတ်ကြီးဥပဒေတွင် ပြဋ္ဌာန်းထားသည်။
အသက် ၄၃နှစ် အရွယ်ရှိ မိုက်ကယ်ကျော်မြင့်မှာ ၂၀၁၇ ခုနှစ်အတွင်းက ရန်ကုန်တိုင်းဝန်ကြီးချုပ်နှင့် ကိုယ်ရေးအရာရှိတို့ မြေကိစ္စတွင် လာဘ်စားခဲ့သည်ဟု စွပ်စွဲမှု၊ ဆန္ဒပြမှုတို့ကြောင့် ဆက်သွယ်ရေးဥပဒေပုဒ်မ ၆၆ (ဃ) ဖြင့် ထောင်ဒဏ် ခြောက်လ ၊ မမှန်မကန် စွပ်စွဲမှုကြောင့် ရာဇသတ်ကြီး ဥပဒေပုဒ်မ ၂၁၁ ဖြင့် ထောင်ဒဏ် သုံးလ၊ ယင်းအပြင် ငြိမ်းချမ်းစွာစုဝေးခွင့် ငြိမ်းချမ်းစွာ စီတန်းလှည့်လည်ခြင်းဆိုင်ရာ ဥပဒေ ပုဒ်မ ၁၉ဖြင့် ထောင်ဒဏ် တစ်လ၊ ရာဇသတ်ကြီးဥပဒေပုဒ်မ ၅၀၅ (ခ) (အစိုးရကို ထိခိုက်စေသည့် သတင်းဖြန့်ချိမှုကြောင့် အများပြည်သူအကျိုးကို ပျက်စီးစေမှု) ဖြင့် ထောင်ဒဏ် တစ်နှစ် ချမှတ်ခံခဲ့ရသူလည်း ဖြစ်သည်။
သီဟမျိုးနိုင်(နိုင်ဒဂုံ)မှာ မိုက်ကယ်ကျော်မြင့်၏ ညွှန်ကြားမှုဖြင့် တည်ထောင်ထားသည့် အခြေခံလူတန်းစားဘဝ တိုးတက်မြင့်မားရေးပါတီ၏ တောင်ဒဂုံမြို့နယ်ဥက္ကဋ္ဌ ဖြစ်သည်။
