ကလေးအလုပ်သမား ၂ ဦး ကာလကြာရှည်စွာ အပြင်းအထန် နှိပ်စက်ခံရသည့် အင်းဝအပ်ချုပ်ဆိုင်အမှုကို သြဂုတ် ၁ ရက်နေ့က ရန်ကုန် အနောက်ပိုင်းခရိုင်တရားရုံးတွင် စစ်ဆေးရာ အပ်ချုပ်ဆိုင် မိသားစုဝင်တစ်ဦးဖြစ်သည့် ဒေါ်စုမွန်လတ်က အိမ်အကူ မစန်းကေခိုင်ကို နှိပ်စက်ခြင်း မပြုလုပ်ခဲ့ကြောင်း ထွက်ဆိုလိုက်သည်။
ရန်ကုန်တစ်ဖက်ကမ်း ကော့မှူးမြို့နယ်မှ ကလေးအလုပ်သမားများတွင် တွေ့ရသည့် ဒဏ်ရာတို့မှာ လုပ်ငန်းခွင်သို့ မရောက်မီကပင် ရရှိထားပြီးဖြစ်သည့် ဒဏ်ရာများဖြစ်သည်ဟု သူက ထွက်ဆိုသည်။
ရန်ကုန်၊ ကျောက်တံတားမြို့နယ် လမ်း ၄ဝ ရှိ အပ်ချုပ်ဆိုင်တွင် မစန်းကေခိုင် ၅ နှစ်ကြာ လုပ်ကိုင်စဉ် ပိတ်လှောင်ထားခြင်းမရှိသလို ရိုက်နှက်နှိပ်စက်ခြင်းလည်း မပြုလုပ်ခဲ့ဟု သူက ဆိုသည်။
လုပ်ခလစာများကို မိဘအုပ်ထိန်းသူတို့က လာရောက် ထုတ်ယူလေ့ရှိသည်ဟု သူက စစ်ဆေးချိန် ၄ နာရီနီးပါးခန့်ကြာမြင့်သည့် တရားခွင်တွင် ထွက်ချက်ပေးသည်။
ဒေါ်စုမွန်လတ်က သူနှင့် မစန်းကေခိုင် တွဲလျက် ရိုက်ထားသည့် ဓာတ်ပုံအများအပြားကို သက်သေခံပစ္စည်းအဖြစ် တရားရုံးသို့ တင်သွင်းခဲ့သည်။
တရားသူကြီး နှစ်ယောက် ပြောင်းလဲ စစ်ဆေးခဲ့သည့် ဤအမှုကို ယမန်နှစ်က စတင်စစ်ဆေးခဲ့ခြင်း ဖြစ်ပြီး အင်းဝအပ်ချုပ်ဆိုင်မိသားစုဝင် ၆ ဦးသည် အိမ်အကူမိန်းကလေးနှစ်ဦးဖြစ်သည့် မစန်းကေခိုင်နှင့် မသဇင်တို့ကို ကာလကြာရှည် ပိတ်လှောင်ထားခြင်း၊ ရိုက်နှက်ညှဉ်းပန်းခြင်း၊ လုပ်ခလစာ အပြည့်အဝမပေးခြင်း စသည့် စွဲချက်များဖြင့် ရင်ဆိုင်နေရသည်။
အမှုမှာ ၁ဝ လ အတွင်း ရုံးချိန်းပေါင်း ၅ဝ ကျော်လာပြီဖြစ်သည်။ အမှုကို ပြန်လည် ကြားနာသည့် သြဂုတ် ၃ ရက်နေ့တွင် စွပ်စွဲခံရသူများထဲမှ တစ်ဦးကို စစ်ဆေးသွားမည်ဟု သိရသည်။
