လှည်းကူးတွင် ပေါက်ကွဲမှုဖြစ်၊ ရပ်ကျေးအုပ်ချုပ်ရေးမှူးနှင့် စာရေး ဒဏ်ရာရ

ရန်ကုန်တိုင်း၊ လှည်းကူးမြို့နယ် ရန်ကင်း ၆ လမ်းရှိ ရိပ်သာရပ်ကွက်ရုံးရှေ့တွင် ရပ်နားထားသော ကားအနီး ယနေ့ (စက်တင်ဘာ ၈) နံနက်ပိုင်းက ဗုံးခွဲတိုက်ခိုက်ခံရမှုကြောင့် အုပ်ချုပ်ရေးမှူးနှင့် ရုံးစာရေး အမျိုးသားတစ်ဦး ဒဏ်ရာရသွားသည်။

ပေါက်ကွဲမှုကြောင့် အသက် ၄၀ အရွယ် အုပ်ချုပ်ရေးမှူးမှာ ခြေထောက်နှစ်ဖက်တွင် ဒဏ်ရာရခဲ့ကြောင်း၊ ရုံးစာရေးမှာ ထိခိုက်မှု ပိုများခဲ့ကြောင်း၊ နှစ်ဦးစလုံးကို လှည်းကူးမြို့နယ်ဆေးရုံသို့ ပို့ဆောင်ထားပြီးဖြစ်ကြောင်း မျက်မြင်များကို ကိုးကား၍ အမျိုးသားတစ်ဦးက ပြောသည်။ 

“ကားနားမှာရှိတဲ့အချိန်ဖြစ်တာ။ ကားနားရောက်နေတဲ့အချိန်မှာ ကားအောက်ကို ပစ်ထည့်သွားတာ။ ကားကတော့ အနောက်ပိုင်းတွေ ထိသွားတယ်။ မှန်တွေဘာတွေ ကွဲသွားတယ်” ဟု ၎င်းက ပြောသည်။ 

“ရုံးစာရေးကတော့ ထိတာပိုများတယ် လက်တွေဘာတွေ ထိသွားတာ” ဟုလည်း အဆိုပါ အမျိုးသားက ဆက်ပြောသည်။ 

ပေါက်ကွဲမှုဖြစ်ပြီး များမကြာမီတွင် စစ်ကောင်စီတပ်ဖွဲ့ဝင်များ ထိုနေရာသို့ ရောက်လာကာ ရပ်ကွက်အတွင်း စစ်ဆေးမေးမြန်းနေသလို အဆိုပါ ဧရိယာအတွင်း ဖြတ်သန်းသွားလာသည့် ယာဉ်များကိုပါ ရပ်တန့်စစ်ဆေးမှုများ ပြုလုပ်ခဲ့ကြောင်း သိရသည်။

ထိုဖြစ်စဉ်နှင့် ပတ်သက်၍ အသေးစိတ်သိနိုင်ရန် လှည်းကူးမြို့နယ်ရဲတပ်ဖွဲ့ထံ ဆက်သွယ်နေသော်လည်း မရသေးပါ။

လှည်းကူးမြို့နယ် ပြည်တော်သာရပ်ကွက်၊ အလယ်ပိုင်းမင်းလမ်း၊ သဉ္ဇာဦးမှတ်တိုင်အနီး ရပ်ထားသည့် စစ်သုံးယာဉ်ဗုံးခွဲတိုက်ခိုက်ခံရမှုတစ်ခု ဩဂုတ် ၃၁ ရက်တွင် ဖြစ်ခဲ့သေးသည်။

အာဏာသိမ်းစစ်ကောင်စီကို ယမန်နေ့(စက်တင်ဘာ ၇)မှစ၍ နိုင်ငံအနှံ့ လှည်းနေ၊ လှေအောင်း၊ မြင်းဇောင်းမကျန် ဆန့်ကျင်မည့် ပြည်သူ့တော်လှန်ရေးစပြီဟု အမျိုးသားညီညွတ်ရေးအစိုးရ (NUG) က ကြေညာပြီးနောက်တွင် ရန်ကုန်၊ မန္တလေးကဲ့သို့ မြို့ကြီးများတွင် လှုပ်လှုပ်ခတ်ခတ်ဖြစ်သွားခဲ့သည်။

NUG က စတင်စိန်ခေါ်သည့် ယမန်နေ့ တစ်ရက်အတွင်း ရန်ကုန်၊ မန္တလေးတို့တွင် ပေါက်ကွဲမှု၊ ပစ်ခတ်တိုက်ခိုက်မှုများတိုးလာပြီး ၅ ကြိမ်စီ အနည်းဆုံးရှိသည်ဟု စစ်ကောင်စီပြောခွင့်ရပုဂ္ဂိုလ် ဗိုလ်ချုပ်ဇော်မင်းထွန်းက ယနေ့(စက်တင်ဘာ ၈)တွင် ဧရာဝတီသတင်းဌာနကို ပြောထားသည်။

(လွတ်လပ်တဲ့ မီဒီယာအဖြစ် မြန်မာနိုင်ငံမှာ ရေရှည်ရပ်တည်နိုင်ရေးအတွက် သင်တို့အကူအညီကို လိုအပ်နေပါတယ်။ ဒီနေရာကိုနှိပ်၍ လှူဒါန်းနိုင်ပါတယ်။)

Donate here > https://www.userroll.com/site/register/m1f6pe