အနုပညာအိပ်မက်ကို လျစ်လျူရှုထားရတဲ့ လက်ဖြောင့်တပ်သား

မှန်ပြောင်းတပ်ရိုင်ဖယ်ကိုင်ထားတဲ့ အမျိုးသမီးလေးက  ရှေ့တန်းစစ်မြေပြင်တနေရာမှာ ရန်သူ့လှုပ်ရှားမှုတွေကို စောင့်ကြည့်နေပါတယ်။ ဒီလိုစောင့်ကြည့်ရင်း ဘာမြင်တွေ့နေရတယ်ဆိုတာ တခြားရဲဘော်တွေကို သူက လှမ်းအသိပေးနေပါတယ်။ 
အန်နာလို့ခေါ်တဲ့ ဒီအမျိုးသမီးလေးရဲ့ ဇာတိက  စစ်ကိုင်းတိုင်း တန့်ဆည်မြို့နယ်ဖြစ်ပါတယ်။ အန်နာဆိုတာ အမည်ရင်း မဟုတ်ဘဲ တော်လှန်ရေးကာလမှာ သုံးနေတဲ့လျှို့ဝှက်နာမည် ဖြစ်ပါတယ်။
စစ်အာဏာမသိမ်းခင်အထိ တခြားသော လူငယ်တွေလိုပဲ အနာဂတ်မှာ ဝါသနာပါတာလုပ်မယ်ဆိုတဲ့ ရည်မှန်းချက်ရှိသူ တယောက်ပါ။ အခုတော့ ဆံပင်ရှည်ရှည်၊ ပိန်ပိန်ပါးပါး၊ အသက် ၂၃ နှစ်အရွယ် အန်နာက   တက္ကသိုလ်ကျောင်းသား၊ အထက်တန်းကျောင်းသားတွေနဲ့ စုဖွဲ့ထားတဲ့ ပြည်သူ့တော်လှန်ရေးတပ်ဦး (PRF) ရဲ့ တပ်ဖွဲ့ဝင်တယောက် ဖြစ်နေပါတယ်။  
 သူ့ကိုယ်သူ စိတ်ဓာတ်ပိုင်းဆိုင်ရာ သန်မာတဲ့သူ တယောက်ဖြစ်တယ်လို့ အန်နာက ပြောပါတယ်။
“အမျိုးသမီးတွေက (အမျိုးသားတွေနဲ့ ယှဉ်ရင်)  ခန္ဓာကိုယ်ဖွဲ့စည်းပုံ မတူတော့ အားနည်းတာတွေက အများကြီးရှိတယ်။ ဒါပေမဲ့ ရုပ်ပိုင်းဆိုင်ရာ  အားနည်းတယ်ဆိုရင်တောင် ကျွန်တော့်မှာ စိတ်ပိုင်းဆိုင်ရာတော့  အများကြီး ပိုပြီးတော့သန်မာတယ်။ ဒီစိတ်နဲ့ပဲ ဒီလိုမျိုးအခြေအနေအထိ ရောက်လာခဲ့ပြီးတော့ ဒီလိုလုပ်နိုင် နေတာ”လို့ အန်နာက ဆေးမင်ကြောင်တွေထိုးထားတဲ့ သူ့လက်နှစ်ဖက်ကို လှုပ်ရမ်းပြီး ပြောပါတယ်။ 
သူက သေတူရှင်ဘက်ရဲဘော်တွေနဲ့ အမှတ်တရဓာတ်ပုံတွေ၊  နှစ်သက်ရာကဗျာအပိုင်းအစတွေကို Facebook မှာ တင်တတ်ပါတယ်။ ထိုးထားတဲ့  ဆေးမင်ကြောင်တွေကတော့ မိခင်နဲ့ဖခင် ဆိုတဲ့စကားလုံး၊ ကမ္ဘာကျော် ပြောက်ကျားတော်လှန်ရေးသမား ချေဂွေဗားရား၊ ကျဆုံးသွားတဲ့ မိတ်ဆွေရဲဘော် ဝဿန်တို့ရဲ့ နာမည်တွေ ပါဝင်ပါတယ်။ 
Myanmar Now က အန်နာ့ကို တွေ့ဆုံမေးမြန်းနေချိန်မှာ ဆေးလိပ်သောက်တဲ့ အန်နာက ညာဘက်လက်မှာ မီးခြစ်ကိုင်ထားပြီး၊ ဘက်ဘက်လက်မှာတော့ လက်ပတ်နာရီနဲ့ ဆင်မြီးလက်စွပ် စွပ်ထားပါတယ်။ ဒါက အန်နာ့ရဲ့ အဆင်တန်ဆာပါ။ အန်နာ့လိုပဲ လက်နက်ကိုင်တော်လှန်ရေးမှာ ပါဝင်နေတဲ့ အမျိုးသမီး အများအပြားဟာ ကျောက်မျက်ရတနာတွေ ဝတ်ဆင်လေ့မရှိပါဘူး။

အန်နာက PRF ကို ၂၀၂၂ ခုနှစ်မှာ ပြောင်းရွှေ့ပြီးနောက် စစ်ကိုင်းနဲ့ မကွေးတိုင်းအတွင်းက စခန်းသိမ်း တိုက်ပွဲတွေ၊ စစ်ကြောင်းဖြတ်တောက်တိုက်ခိုက်တဲ့ တိုက်ပွဲတွေမှာ ဆက်တိုက်ပါဝင်ခွင့် ရခဲ့ပါတယ်။  

“အရင်ဆုံးတော့ စိတ်ညစ်စရာတွေလာတာပဲ။  အောင်ပွဲခံရတဲ့အခါမျိုးဆိုရင်တော့ ပျော်ရတာပဲလေ။ ဒဏ်ရာရ၊  (ကိုယ်နဲ့ မဟာမိတ်ဘက်က) အကျအဆုံးတွေလည်းရှိတဲ့ အခါကျတော့ ဘယ်တိုက်ပွဲမှာမှ အပြည့်အဝ ပျော်ရတယ်လို့တော့ မရှိခဲ့ဘူး” လို့ သူက ဆိုပါတယ်။

၂၀၂၅ ခုနှစ် ဇွန်လ အန်နာ့မွေးနေ့မှာ ချင်းပြည်နယ်ကို လက်ဖြောင့်တပ်သား သင်တန်းသွားတက်ဖို့ တာဝန်ပေးခံရပါတယ်။ သင်တန်းဆင်းပြီး ရက်ပိုင်းအတွင်းမှာပဲ ပေါက်မြို့နယ်ထဲက တိုက်ပွဲတခုမှာ ပါဝင်ခဲ့ရပါတယ်။  
သူတို့တာဝန်ယူနေတဲ့ ကျေးရွာကို စစ်တပ်က စစ်ကြောင်းထိုးလာတာကြောင့် တိုက်ပွဲ ဖြစ်ခဲ့တာပါ။  စစ်တပ် စအထိနာပြီး နောက်ပြန်လှည့်သွားရတဲ့အထိ သူနဲ့ သူ့ရဲဘော်တွေက တိုက်ခိုက်နိုင်ခဲ့ပါတယ်။    လက်နက်ကိုင်အင်အားများပြားတဲ့ စစ်ကြောင်းကို နယ်မြေကျွမ်းကျင်တဲ့ အန်နာတို့က ပြောက်ကျားစနစ်နဲ့ တိုက်ခိုက် အနိုင်ယူခဲ့တာကြောင့် ဒီတိုက်ပွဲဟာ သူ့အတွက် အမှတ်ရစရာ ဖြစ်နေပါတယ်။ 

အဲ့ဒီနောက်ပိုင်းမှာတော့ စစ်တပ်က သူ့လှုပ်ရှားမှုတွေကို ပိုပြီး သတိထားမိလာတယ်၊ ပျူစောထီး ထိန်းချုပ်တဲ့ ရွာတွေထဲမှာ ရန်သူက အရက်မူးချိန်ဆိုရင် အသံချဲ့စက်နဲ့ ဆဲဆိုခြိမ်းခြောက်ကြတယ်လို့ အန်နာက ပြောပါတယ်။ 
 
“အရှင်ရရအသေရရပေါ့လေ၊ ဖမ်းချင်တယ်၊ ဒီအတိုင်းတော့ မသတ်ဘူးဆိုပြီး မူးတဲ့အချိန်တိုင်း အဲဒီလိုမျိုး ပြောပြီးဆဲတာ”