အနောက်မြောက်တိုင်း စစ်ဌာနချုပ် (နမခ) အခြေစိုက်ရာ မုံရွာမြို့ပေါ်တွင် ရွေးကောက်ပွဲလုပ်နေစဉ် ကပ်လျှက် ဘုတလင်မြို့ပေါ် စစ်တပ်အခြေစိုက်နေရာများ တိုက်ခိုက်ခံရသဖြင့် စစ်ကော်မရှင်တပ်က လေကြောင်းနှင့် စစ်ကြောင်းထိုးခြင်းများ ပြုလုပ်နေသဖြင့် ဒေသခံများနှင့် ကာကွယ်ရေးအဖွဲ့ဝင်များ ထိခိုက် သေဆုံးမှုများ ရှိကြောင်း သိရသည်။
ပြီးခဲ့သည့် ဒီဇင်ဘာလ ၂၈ ရက်နေ့က မုံရွာမြို့ပေါ်တွင် စစ်ကော်မရှင်ရွေးကောက်ပွဲလုပ်နေစဉ် မြောက်ဘက် မိုင် ၂၀ ကျော်အကွာ ဘုတလင်မြို့ပေါ်ရှိ စစ်တပ် တပ်စွဲထားသောနေရာများကို ဒေသအခြေစိုက် တော်လှန်ရေးအင်အားစုများက ဝင်ရောက်တိုက်ခိုက်ခဲ့ခြင်းဖြစ်သည်။
ချုံခိုတိုက်ခိုက်ခံရသော စစ်တပ်သည် ထိုနေ့တွင်ပင် မြို့အနီးဝန်းကျင်နေရာတို့ကို လေကြောင်းဗုံးကြဲခဲ့ပြီး နမခထဲမှလည်း လက်နက်ကြီးပစ်ခတ်မှုများဖြင့် တုံ့ပြန်ခဲ့သည်။ ဆက်လက်၍ ယနေ့ (ဒီဇင်ဘာလ ၃၀ ရက်) အထိ လေကြောင်းတိုက်ခိုက်မှုများ နေ့စဉ်ပြုလုပ်နေခြင်းဖြစ်သည်ဟု ဒေသခံများနှင့် တော်လှန်ရေးအဖွဲ့ဝင်များထံက သိရသည်။
“ နမခက တပ်ကူတွေလာနေတယ်။ လေကြောင်းက အဆက်မပြတ်တိုက်နေတယ်” ဟု ဘုတလင်မြို့နယ်မှ တော်လှန်ရေးတပ်ဖွဲ့ဝင်တစ်ဦးက အဆိုပါအခြေအနေကို ပြောပြသည်။
ဒီဇင်ဘာလ ၂၈ ရက်မှ ဒီဇင်ဘာလ ၃၀ ရက်နေ့အတွင်း မြို့အနီးဝန်းကျင်ကျေးရွာများကို လေယာဉ်၊ အင်ဂျင်တပ် လေထီး၊ ဂျိုင်ရိုကော်ပတာ၊ ဒရုန်းတို့ဖြင့် ဗုံးကြဲတိုက်ခိုက်ခဲ့ရာ ဒရုန်းဗုံးကြောင့် ကာကွယ်ရေးတပ်ဖွဲ့ဝင် သုံးဦး သေဆုံးခဲ့ကြောင်း သိရသည်။
ဘုတလင်မြို့ပေါ်တိုက်ပွဲအတွင်း စစ်တပ်အခြေစိုက်နေရာအချို့ကို ယာယီထိန်းချုပ်နိုင်ခဲ့သော်လည်း လက်နက်ခဲယမ်း အခက်အခဲကြောင့် ပြန်ဆုတ်ခွာခဲ့ရကြောင်း တော်လှန်ရေးအဖွဲ့များက ပြောကြသည်။
တိုက်ပွဲဖြစ်သည့်နေ့တွင် အနောက်မြောက်တိုင်းစစ်ဌာနချုပ်မှ ပို့လာသော စစ်ကူများကို ကြားဖြတ် ဟန့်တားနိုင်ခဲ့သော်လည်း ယမန်နေ့တွင် စစ်တပ်က အင်အား ထပ်ဖြည့်၍ ရှေ့ဆက်တိုးလာကြောင်း တော်လှန်ရေးအင်အားစုများထံက သိရသည်။
“စစ်ကြောင်းက နမခ ကနေ နောက်ထပ် အင်အားတိုးပြီးတော့ ရှေ့ဆက်တိုးလာတယ်။ နောက်ထပ် ကားသုံးစီး အပြည့်နဲ့ အင်အားထပ်တိုးပြီးတော့။ မနေ့ကတည်းက ရှေ့ကိုတိုးလာတယ်”ဟု တောလှန်ရေးအဖွဲ့ဝင် နောက်တစ်ဦးက ပြောသည်။
နမခမှ ထွက်လာသော အဆိုပါ စစ်တပ်စစ်ကြောင်းက လမ်းခရီးတွင် တွေ့သော ဒေသခံ အမျိုးသမီး ငါးဦးကို ဓားစာခံအဖြစ် ဖမ်းဆီးခေါ်ဆောင်သွားကြောင်း သိရသည်။
နမခမှ ပစ်သော လက်နက်ကြီး ထိမှန်သဖြင့် ဒီဇင်ဘာလ ၂၈ ရက်နေ့တွင် ထနောင်းကုန်းရွာမှ အမျိုးသမီးတစ်ဦး သေဆုံးခဲ့ပြီး ဒီဇင်ဘာလ ၂၉ ရက်နေ့ကလည်း စစ်ကြောင်းထိုးလာသည့် စစ်ကော်မရှင်တပ်က ကံသစ်ရွာမှ လူလတ်ပိုင်းအရွယ် အမျိုးသားတစ်ဦးကို ပစ်သတ်ခဲ့ကြောင်း ဒေသခံများက ဆိုသည်။
သေဆုံးသည့် ကာကွယ်ရေးအဖွဲ့ဝင်များ၊ အရပ်သားများ၏ အမည်၊ အသက်နှင့် အသေးစိတ်အချက်အလက်များကို မသိရသေးပေ။
ဒီဇင်ဘာလ ၂၈ ရက်နေ့က ကျင်းပသည့် ရွေးကောက်ပွဲအပိုင်း (၁) ကို မုံရွာမြို့နယ်အပါအဝင် စစ်ကိုင်းတိုင်းမှ မြို့နယ် ၁၂ ခုတွင် ကျင်းပခဲ့ပြီး မုံရွာခရိုင် ဘုတလင်၊ ချောင်းဦး၊ အရာတော် တို့သည် ရွေးကောက်ပွဲ အပိုင်း (၂) တွင် ပါဝင်မည်ဖြစ်သည်။
မုံရွာ၊ ဘုတလင်၊ ချောင်းဦး၊ အရာတော်တို့တွင် မြို့ပေါ်ရပ်ကွက်များနှင့် ပြည်သူ့စစ်များ အခြေစိုက်သည့် ကျေးရွာအချို့ကိုသာ စစ်တပ်က ထိန်းချုပ်ထားနိုင်ပြီး ကျေးလက်ဒေသအများစုကို တော်လှန်ရေးအင်အားစုများက နယ်မြေစိုးမိုးထားသည်။
