ရှမ်းပြည်နယ်မြောက်ပိုင်း၊ မူဆယ်မြို့လယ်ကောင်၌ ယနေ့ (မေ ၂၈) နံနက်တွင် ပေါက်ကွဲပြီး အသက် ၁၅ နှစ်အရွယ် သန့်ရှင်းရေးဝန်ထမ်း မောင်သင်္ကြန် သေဆုံးသွားကာ အရပ်သားအမျိုးသမီးနှစ်ဦး ဒဏ်ရာရရှိသွားကြောင်း မြို့ခံ ပရဟိတအဖွဲ့တစ်ခုထံမှ သိရသည်။
“ချထားတဲ့ပါဆယ်အိတ်ကို ကောက်ကိုင်မိလို့ ထိတယ်လို့တော့ ကြားတယ်။ သေသွားတဲ့သူကတော့ ခြေထောက်နှစ်ဖက် ပြတ်သွားတယ်။ ဒူးနေရာလောက်ကနေ ပြတ်သွားတာ။ တခြားနေရာတွေမှာလည်း ဒဏ်ရာတွေရထားတယ်။ အခု သူ့ကို သင်္ဂြိုဟ်ဖို့ သုသာန်ကို ပို့နေတယ်”ဟု မူဆယ်မြို့မှ ပရဟိတသမားတစ်ဦးက ပြောသည်။
အမှတ် (၃) အ.ထ.က ကျောင်းနှင့် ဈေးအနီး အဆိုပါဗုံးပေါက်ကွဲမှုတွင် မီးလောင်သွားသော ဆိုင်ကယ်ပေါ်မှ အမျိုးသမီး ဒဏ်ရာပြင်းထန်သည်ဟု ဆိုသည်။
“မျက်မှန်ဆိုင်မှာလုပ်တဲ့ မိန်းကလေးက ဆိုင်ကယ်လည်း မီးလောင်သွားတယ်။ ကျောကုန်းမှာလည်း မီးလောင်ဒဏ်ရာ ရထားတယ်။ သူက ကိုယ်တစ်ခြမ်းလုံး မီးလောင်သလိုဖြစ်သွားတာ။ ဒဏ်က ပြင်းတယ်”ဟု မြို့ခံ ပရဟိတသမားတစ်ဦးက ဆက်ပြောသည်။
ဒဏ်ရာရသွားသည့် အခြား အမျိုးသမီးတစ်ဦးမှာ လားရှိုးမြို့ဆေးဆိုင်တစ်ဆိုင်မှဖြစ်ကြောင်း၊ စိုးရိမ်ရသည့် အနေအထားမဟုတ်ကြောင်း ပရဟိတအဖွဲ့ထံမှ သိရသည်။
ပေါက်ကွဲသည့် နေရာအနီး၌ စစ်ကောင်စီ၏ လက်နက်ကိုင်များက ပိတ်ဆို့စစ်ဆေးနေကြောင်း မြို့ခံများက ပြောသည်။
စစ်အာဏာသိမ်းပြီးနောက်ပိုင်း နိုင်ငံအနှံ့ ပေါက်ကွဲမှုများ ဆက်တိုက်ဖြစ်ပေါ်လျက်ရှိသည်။
