အာဏာသိမ်းစစ်တပ်က ယမန်နေ့ကတည်းက ဖြိုခွဲနေသော မြင်းခြံမြို့၊ အမှတ် ၆ ရပ်ကွက် လမ်းမတော်ခံတပ်ကို ယနေ့နံနက်ပိုင်းက အင်အားအလုံးအရင်းဖြင့် စီးနင်းပစ်ခတ်ရာ ဒေသခံပြည်သူနှစ်ဦး ဒဏ်ရာရရှိထားသည်။
မြင်းခြံမြို့တွင် အင်အားအတောင့်တင်းဆုံးဖြစ်သည့် ထိုခံတပ်ကို အရုဏ်တက်ချိန်၌ ပြန်လည်တည်ဆောက်ရာ စစ်အုပ်စု၏ လက်နက်ကိုင်တို့က နံနက် ၇ နာရီမှစ၍ စီးနင်းကြောင်း၊ နံနက် ၁၀ နာရီခွဲဝန်းကျင်အထိ ပစ်ခတ်ဖြိုခွဲနေဆဲဖြစ်ကြောင်း သိရသည်။
ဒေသခံ အမျိုးသားနှစ်ဦးသည် လည်ပင်းနှင့် ခြေထောက်တွင် ထိခိုက်ဒဏ်ရာရရှိထားကြောင်း၊ လည်ပင်းထိမှန်သူမှာ ဒဏ်ရာပြင်းထန်ကြောင်း ဒေသခံများအဆိုအရ သိရသည်။
“တပ်က အမှတ် ၆ ရပ်ကွက် ကြားလမ်းတွေထဲထိ ဝင်ပစ်တယ်။ လမ်းပေါ်ထွက်တာနဲ့ အကုန်ပစ်နေတာ။ ဘာမှ စစ်ဆေးမေးမြန်းခြင်းကို မရှိဘဲနဲ့ ပစ်နေတာ။ လက်ရှိ မြင်းခြံရဲ့ လုံခြုံရေးအခြေအနေက စိုးရိမ်ရေမှတ်ရဲ့ အောက်ဆုံး၊ သုညအောက်ထိ ရောက်နေပြီ” ဟု မြင်းခြံမြို့ခံတစ်ဦးက ပြောသည်။
ထို့ပြင် အမှတ် ၆ ရပ်ကွက်နှင့် လမ်းမတော်လမ်းတလျှောက်ရှိ နေအိမ်များကို စစ်တပ်က ယနေ့မနက်ပိုင်းမှစ၍ တစ်အိမ်တက်ဆင်း ဝင်ရောက်ရှာဖွေနေသည်။
အနီးတဝိုက်ကျေးရွာများဖြစ်သည့် လေးအိမ်တန်းကျေးရွာ၊ ကျောင်းကုန်းကျေးရွာများအထိ လိုက်လံပစ်ခတ်နေသည်ဟု ဒေသခံတချို့က ပြောသည်။
လမ်းမတော်ခံတပ်ကို ယမန်နေ့ ညနေ ၆ နာရီမှ ည ၁၀ နာရီကျော်အထိ လေးနာရီကျော်ကြာ အင်အားအလုံးအရင်းဖြင့် ပစ်ခတ်ဖြိုခွဲခဲ့ပြီး ၁၃ နှစ်အရွယ် ကလေးတစ်ဦးအပါအဝင် ပြည်သူ ၆ ဦးကို စစ်ကောင်စီတပ်က ဖမ်းဆီးသွားသည်ဟုဒေသခံတစ်ဦးက ပြောသည်။
အာဏာသိမ်းစစ်တပ်၏ လက်နက်ကိုင်များက “အမှတ် ၆ ခံတပ်ကြီးရယ်၊ နေပါဦး၊ ပစ်လို့ကောင်းနေတုန်း” ဟု ကြွေးကြော်ပြီး လက်နက်ကြီးများအပါအဝင် တပ်အင်အား ၂၀၀ ကျော်ဖြင့် ယမန်နေ့ ညပိုင်းက ဖြိုခွဲခဲ့ခြင်းဖြစ်သည်ဟု အမှတ် ၆ ရပ်ကွက်တွင် နေထိုင်သူတစ်ဦးက ပြောသည်။
ခံတပ်အပြင် နေအိမ်များကိုပါ ရည်ရွယ်ချက်ရှိရှိ ပစ်ခတ်ခဲ့ပြီး နေအိမ် ၃ လုံးတွင် ကျည်ထိမှန်ခဲ့သော်လည်း ဒဏ်ရာရသူ မရှိခဲ့ဟု အဆိုပါ ဒေသခံက ဆက်ပြောသည်။
လက်နက်ကိုင်တပ်များ၏ အကြမ်းဖက်ပစ်ခတ်မှုများကြောင့် အမှတ် ၆ ရပ်ကွက်မှ ထောင်နှင့်ချီသည့် ဒေသခံများ နီးစပ်ရာကျေးရွာများသို့ ထွက်ပြေးတိမ်းရှောင်နေရသည်။
ဒေသခံများက ရိုးရာလက်လုပ်တူမီးသေနတ်များ၊ ဖန်ဂေါ်လီထည့်ပစ်ရသည့် လက်လုပ်ဂက်စ်သေနတ်များဖြင့် ပြန်ခုခံနေပြီး အာဏာသိမ်းစစ်တပ်ဘက်က ထိခိုက်ဒဏ်ရာရသူများရှိသော်လည်း အရေအတွက်မသိရသေးကြောင်း ဒေသခံများက ပြောသည်။
ယူနီဖောင်းဝတ်မထားသည့် စစ်သားတချို့က လူနေရပ်ကွက်များအတွင်း ဆိုင်ကယ်ဖြင့် ရောက်လာပြီး လိုက်လံပစ်ခတ်မှုများ ပြုလုပ်ခဲ့သေးသည်။
မြင်းခြံမြို့တွင် စစ်ကောင်စီ၏ လက်နက်ကိုင်တပ်များ အကြမ်းဖက်ပစ်ခတ်သတ်ဖြတ်မှုများကြောင့် သေဆုံးရသည့် အရပ်သားပြည်သူ ၂၃ ဦး ရှိလာပြီဖြစ်သည်။
အမှတ် ၆ ရပ်ကွက်အပြင် မြင်းခြံမြို့ အမှတ် ၃ ရပ်ကွက်၊ အမှတ် ၄ ရပ်ကွက်တို့ကိုလည်း ယနေ့နံနက်ပိုင်းတွင် ဝင်ရောက်ပစ်ခတ်နေသည်။
“ဒီနေ့ ပစ်ခတ်နေတာက တိုင်းရင်းသားနယ်မြေတွေမှာ နယ်မြေရှင်းလင်းရေးလုပ်တဲ့ ပုံစံမျိုးကို လုပ်နေတာ” ဟု မြင်းခြံမြို့ အခြားဒေသခံတစ်ဦးက ပြောသည်။
ယနေ့မနက်ပိုင်းက အမှတ် ၆ ရပ်ကွက်တွင် ပြုလုပ်သည့် အရုဏ်ဦးသပိတ် လူစုခွဲချိန်တွင် စစ်တပ်က ဝင်လာပြီး ဖြိုခွဲရာ ဆန္ဒပြသူများ ရှောင်တိမ်းလွတ်မြောက်သွားသော်လည်း ဆိုင်ကယ်များကို လက်နက်ကိုင်များက သိမ်းဆည်းသွားကြောင်း အဆိုပါ ဒေသခံက ပြောသည်။
မြင်းခြံအမှတ် ၆ ပင်မခံတပ်ကို ပစ်ခတ်ဖြိုခွဲမှုများ လုပ်ဆောင်နေသော်လည်း ပင်မသပိတ်မှ ခေါင်းဆောင်များသည် ကျေးလက်သပိတ်စစ်ကြောင်းနှင့် ပူးပေါင်းပြီး အမျိုးသားညီညွတ်ရေးအစိုးရကို ထောက်ခံကြောင်းနှင့် စစ်အာဏာရှင်ကို ဆန့်ကျင်ကြောင်း ဧရာဝတီမြစ်တွင် လှေများဖြင့် ချီတက်ဆန္ဒပြခဲ့ကြသေးသည်။
