ကရင်အမျိုးသားအစည်းအရုံး (KNU) ထိန်းချုပ်ရာနယ်မြေအတွင်းရှိ မြန်မာစစ်တပ်ကို ထိုင်းဘက်က ရိက္ခာထောက်ပံ့ရန် ပြင်ဆင်နေသည်ဟု KNU ပြောရေးဆိုခွင့်ရှိသူက ပြောသည်။
ထိုင်း − မြန်မာနယ်စပ်ရှိ KNU ထိန်းချုပ်ရာနယ်မြေအတွင်း ပိတ်မိနေသည့် မြန်မာစစ်တပ်အတွက် ထိုင်း လုံခြုံရေးအေဂျင်စီက ဆန်အိတ်ပေါင်း ၇၀၀ ခန့် ပေးပို့ခဲ့သည်ဟု ထိုင်းသတင်းဌာန The Reporters ၏ ယနေ့ (မတ် ၂၀) သတင်းနှင့် ပတ်သက်၍ KNU ကိုဆက်သွယ်မေးမြန်းရာတွင် အထက်ပါအတိုင်း ပြောကြားခဲ့သည်။
“ထိုင်းဘက်က ဖြစ်နေတော့ ဒါက G to G (အစိုးရချင်း) သွားတာလား။ ဘယ်လိုပုံစံမျိုးလဲဆိုတာ စုံစမ်းနေတုန်းပါ။ ထိုင်းဘက်က ကမ်းနားနဲ့ သံလွင်တစ်ဖက်ကမ်းမှာရှိတဲ့ စစ်တပ်စခန်းကို တိုက်ရိုက်ရောက်သွားမယ့် အနေအထားဖြစ်တယ်။ လောလောဆယ်တော့ ထိုင်းဘက်အခြမ်းမှာရှိနေတဲ့ အနေအထားပါ”ဟု KNU ပြောရေးဆိုခွင့်ရှိသူ ဖဒိုစောလှထွန်းက ပြောသည်။
KNU တပ်မဟာ ၅ နယ်မြေအတွင်း၌ ရိက္ခာသယ်ယူပို့ဆောင်ရေးလမ်းကြောင်း ဖြတ်တောက်ခံထားရသည့် အာဏာသိမ်းစစ်တပ်စခန်းသည် ထိုင်းဘက်မှ ရိက္ခာထောက်ပံ့မှုရရန်ကြိုးပမ်းနေခြင်းဖြစ်သည်ဟု ဆိုသည်။
အဆိုပါတပ်စခန်းကို ပြည်တွင်းမှရိက္ခာထောက်ပံ့မှုများ မပြုလုပ်နိုင်ရန် KNU ၏ ကရင်အမျိုးသား လွတ်မြောက်ရေးတပ်မတော်(KNLA) တပ်မဟာ ၅ က အာဏာမသိမ်းခင်ကတည်းက ရိက္ခာဖြတ်တောက် ထားခြင်းဖြစ်သည်ဟု ဖဒိုစောလှထွန်းက ပြောသည်။
ဖာပွန်ခရိုင်အတွင်း၌ အာဏာသိမ်းစစ်တပ်သည် စစ်ရေးပြင်ဆင်လမ်းဖောက်လုပ်နေမှုများ၊ ထိုးစစ်ဆင် တိုက်ခိုက်မှုများကြောင့် ၂၀၁၈ ခုနှစ်ကတည်းက တိုက်ပွဲဖြစ်ပွားနေသော ဒေသဖြစ်သည်။
ထို့ကြောင့် သံလွင်မြစ်တလျှောက်ရှိ စစ်တပ်၏ အခြေစိုက်စခန်းများကို ရိက္ခာပို့လိုလျှင် နှစ်ဖက်ညှိနှိုင်းကြရန် KNU က ပြောဆိုထားသော်လည်း စစ်တပ်က တွေ့ဆုံဆွေးနွေးမှုမရှိသည့်အတွက် အာဏာမသိမ်းခင်ကတည်းက ရိက္ခာပို့လမ်းကြောင်းများကို ဖြတ်တောက်လိုက်ရခြင်းဖြစ်သည်ဟု ဖဒိုစောလှထွန်းက ပြောသည်။
ထိုင်းစစ်တပ်အနေဖြင့် မြန်မာစစ်တပ်ကို ဆန်အိတ်များပေးပို့ခဲ့ခြင်း မရှိကြောင်း၊ စီးပွားရေးသမားများက ပေးပို့ခဲ့သည်ဟု ယူဆကြောင်း၊ မည်သူမည်ဝါဖြစ်သည်ကို အကောက်ခွန်ဌာနက စစ်ဆေးပြီး တရားမဝင်ပေးပို့ခြင်းပါက အရေးယူသွားမည်ဖြစ်ကြောင်း ထိုင်းစစ်တပ်အရာရှိတစ်ဦးကို ကိုးကားလျက် ထိုင်းသတင်းဌာန The Reporters ယနေ့ည ၉ နာရီအချိန်တွင် ထပ်မံသတင်းရေးသားထားသည်။
