အာဏာသိမ်းစစ်ကောင်စီ၏ လူ့အခွင့်အရေးချိုးဖောက်မှုများကြောင့် အမေရိကန်ဒေါ်လာ ၁ ဘီလျံခွဲ တန် ရွှေလီ (၁) ရေအားလျှပ်စစ်စီမံကိန်းကို ရပ်ဆိုင်းလိုက်ကြောင်း ပြင်သစ်အစိုးရပိုင်ကုမ္ပဏီ Électricité de France(EDF) က ထုတ်ပြန်ခဲ့သည်။
အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ရေအားလျှပ်စစ်စီမံကိန်းများ ဆက်လက်လုပ်ဆောင်ရန် တွန်းအားပေးနေချိန်တွင် ပြင်သစ်ကုမ္ပဏီက အကြီးစားရေအားလျှပ်စစ် စီမံကိန်းတစ်ခုဖြစ်သည့် ရွှေလီ (၁) စီမံကိန်းကို ရပ်ဆိုင်းလိုက်ခြင်းဖြစ်သည်။
မဂ္ဂါဝပ် ၆၇၀ ကျော်ထုတ်လုပ်မည့် ထိုစီမံကိန်းသည် ရှမ်းပြည်နယ်မြောက်ပိုင်းရွှေလီမြစ်ပေါ်တွင် တည်ရှိသည်။ ထိုစီမံကိန်းကို ဂျပန်မာရူဘီနီ၊ ပြည်တွင်းက ဧရာဟင်္သာကုမ္ပဏီတို့ဖြင့် EDF က ဆောင် ရွက်ခြင်းဖြစ်ပြီး ၂၀၂၅-၂၆ တွင် ပြီးစီးရန်မျှော်မှန်းထားသည့် အဆိုပါစီမံကိန်းမှ အိမ်ထောင်စု ၈ သန်းခွဲ ကို လျှပ်စစ်မီးဖြန့်ဖြူးနိုင်ရန် ရည်ရွယ်ထားသည်။
ပြင်သစ်အစိုးရရှယ်ယာအများဆုံး ပိုင်ဆိုင်ထားသည့် EDF သည် ပြင်သစ်နိုင်ငံ၊ ပဲရစ်မြို့အခြေစိုက် စွမ်းအင်ကုမ္ပဏီကြီးတစ်ခုဖြစ်သည်။
စစ်အာဏာသိမ်းမှုကို ဆန့်ကျင်သောအားဖြင့် နိုင်ငံတကာရင်းနှီးမြှုပ်နှံသူအချို့က မြန်မာနိုင်ငံရှိ လုပ်ငန်းများ ရပ်ဆိုင်းလျက်ရှိသည့်နည်းတူ အကောင်အထည်ဖော်နေဆဲ စီမံကိန်းကြီးများလည်း အခက်အခဲတွေ့ လျက်ရှိသည်။
စစ်အာဏာသိမ်းပြီး နိုင်ငံကို အရေးပေါ်ကြေညာထားခြင်းကြောင့် ရန်ကုန်မြို့လယ်ရှိ ဒေါ်လာသန်း ၁၃၀ တန် ဟောင်ကောင်အခြေစိုက် Peninsula hotel စီမံကိန်းဆောင်ရွက်ရေး အခက်အခဲဖြစ်နေသည်ဟု Hongkong and Shanghai Hotels အုပ်စုက ထုတ်ပြန်သော နှစ်ပတ်လည် အစီရင်ခံစာတွင် ဖော်ပြ ထားသည်။
ရိုးမကုမ္ပဏီအုပ်စုက ဆောင်ရွက်နေသည့် ထိုစီမံကိန်းသည် တည်ဆောက်ပြီးစီးပါက Hongkong and Shanghai Hotels က ဟိုတယ်လုပ်ငန်းကို စီမံခန့်ခွဲမည်ဖြစ်သည်။
“မကြာခင်ဖြစ်ပွားလာတဲ့ အကြမ်းဖက်မှုနှင့် ဖရိုဖရဲဖြစ်နေမှုတွေကို စိုးရိမ်စိတ်ကြီးစွာ စောင့်ကြည့်နေပါတယ်” ဟု ကုမ္ပဏီက မတ် ၁၇ ရက်တွင် ထုတ်ပြန်သည့် အစီရင်ခံစာတွင် ရေးသားထားသည်။
အဆိုပါ စီမံကိန်းသည် ရန်ကုန်မြို့ ဗိုလ်ချုပ်အောင်ဆန်းဈေးအနီး၊ ဗိုလ်ချုပ်အောင်ဆန်းလမ်းနှင့် ဆူးလေဘုရားလမ်းထောင့်တွင်တည်ရှိသည်။ လိုနီခေတ်လက်ရာဖြစ်သည့် မြန်မာ့မီးရထားရုံးချုပ် အဆောက်အအုံဟောင်းကို အဆင့်မြင့် Peninsula Yangon ဟိုတယ်အဖြစ် ပြောင်းလဲမည်ဖြစ်သည်။
Peninsula Yangon ဟိုတယ်စီမံကိန်းကို Hong Kong and Shanghai Hotels က ဟိုတယ်၏ ၇၀ ရာခိုင်နှုန်း၊ Yoma Strategic က ၂၄ ရာခိုင်နှုန်းနှင့် FMI က ၆ ရာခိုင်နှုန်း ပါဝင်ရင်းနှီးမြှုပ်နှံထားသည်။
