၁၁ : ၃၀ – နေပြည်တော်၌ သွေးမအေးပါ
စစ်အာဏာသိမ်းမှုအမြစ်ဖြုတ်ရေး လူထုလှုပ်ရှားမှုများ မပေါ်ပေါက်စေရန် စစ်ကောင်စီက တင်းတင်းကျပ်ကျပ်၊ ကြမ်းကြမ်းတမ်းတမ်း ကိုင်တွယ်နေသော အုပ်ချုပ်ရေးမြို့တော် နေပြည်တော်၊ ပျဉ်းမနားမြို့တွင် မတ် ၁၂ရက်က သပိတ်စစ်ကြောင်းလှည့်လည်ခဲ့သည်။
၁၁ : ၀၀ – မန္တလေးမြို့ ကြံ့ကြံ့ခံတော်လှန်နေဆဲ
အာဏာသိမ်းစစ်ကောင်စီတပ်ဖွဲ့များက အသက်သေဆုံးရသည်အထိ ပစ်ခတ်၊ ရိုက်နှက်ဖြိုခွင်းခြင်း၊ ပြည်သူပိုင်ပစ္စည်းများဖျက်ဆီးခြင်းတို့ကို နေ့နေ့၊ ညည ကြုံနေရသော်လည်း မန္တလေးမြို့သူ၊ မြို့သားများက ကြံ့ကြံ့ခံ၍ စစ်အာဏာရှင်စနစ်ကို တော်လှန်နေကြဆဲဖြစ်သည်။
ယနေ့ (မတ် ၁၂)တွင် ရပ်ကွက်အလိုက် သပိတ်စစ်ကြောင်းအချို့ ထွက်၍ အာဏာသိမ်းမှုကိုဆန့်ကျင်ကြောင်း ပြသခဲ့ကြသည်။
ကြံ့ကြံ့ခံတော်လှန်နေဆဲ မန္တလေး
၁၀ : ၃၀ – မြန်မာပြည်မြောက်ဖျား၌လည်း စစ်အာဏာရှင်ကို လက်မခံ
ကချင်ပြည်နယ် ပူတာအိုမြို့တွင် အင်အား ၁၀၀၀ ကျော်က စစ်အာဏာသိမ်းစစ်ကောင်စီကို ဆန့်ကျင်ကြောင်းနှင့် အာဏာဖီဆန်ရေးလှုပ်ရှားမှု (CDM) တွင် ဝန်ထမ်းများပူးပေါင်းမှုကို ထောက်ခံကြောင်း မြို့ပေါ် နေရာအနှံ့ခွဲ၍ သီးခြားစီ ဆန္ဒပြနေကြသည်။
၁၀ : ၁၀ – မန္တလေးသပိတ်စစ်ကြောင်းလူစုခွဲခဲ့ရ
မန္တလေး အမရပူရတွင် မြို့ခံသံဃာတော်များ၊ ကျန်းမာရေးနှင့်ပညာရေးဝန်ထမ်းများ၊ တက္ကသိုလ်ကျောင်းသားများပါဝင်သော အင်အားထောင်ဂဏန်းရှိ အာဏာရှင်ဆန့်ကျင်ရေးဆန္ဒပြသပိတ်စစ်ကြောင်းသည် ယနေ့ (မတ် ၁၂) နံနက် ၇ နာရီခွဲမှစ၍ စီတန်းလှည့်လည်ခဲ့ကြသည်။
နံနက် ၉ နာရီကျော်တွင် စစ်ကောင်စီလက်နက်ကိုင်များ အမရပူရမြို့အတွင်း ရောက်ရှိလာသဖြင့် သပိတ်စစ်ကြောင်း လူစုခွဲခဲ့သည်။
၁၀ : ၀၀ – ကျောက်မဲသပိတ်စစ်ကြောင်းများခွဲ၍ ပြုလုပ်
ရှမ်းပြည်နယ်၊ ကျောက်မဲမြို့၌ အာဏာရှင်ဆန့်ကျင်ရေးလှုပ်ရှားမှု မပြုလုပ်ရန် စစ်တပ်နှင့် ရဲ ပိတ်ဆို့တားဆီးနေသော်လည်း လူငယ်များ ဦးဆောင်သည့် သပိတ်စစ်ကြောင်းအချို့ လူစုခွဲဆန္ဒပြနေကြသည်။
“ဆန္ဒပြပြည်သူများကို စစ်ကောင်စီ၏ တပ်ဖွဲ့များက ပစ်ခတ်သတ်ဖြတ်နေမှု တားဆီးနိုင်ရေး အပစ်ရပ်အကြား ၁၀ဖွဲ့ နည်းလမ်းရှာ”
ပြည်ထောင်စု လွှတ်တော် ကိုယ်စားပြုကော်မတီ(CRPH)၊ စစ်အာဏာရှင်စနစ်တိုက်ဖျက်ရေးအထွေထွေသပိတ်ကော်မတီ (GSC)တို့နှင့် လူထုဆန္ဒပြမှုပွဲများ ဖြိုခွင်းခံရမှုကို တားဆီးနိုင်ရေး ဆွေးနွေးရန် NCA လက်မှတ်ထိုး အပစ်ရပ်ဆယ်ဖွဲ့ တိုင်းရင်းသားခေါင်းဆောင်များ၏ ငြိမ်းချမ်းရေးလုပ်ငန်းစဉ်ဦးဆောင်အဖွဲ့(PPST)အကြား ဘုံသဘောထားချမှတ်ရန် မတ် ၁၁ရက်က ဆွေးနွေးခဲ့ကြသည်။
စစ်ကောင်စီအကြမ်းဖက်ဖြိုခွင်းမှုကြောင့် ယမန်နေ့က သေဆုံးသူ ၁၂ဦးရှိ
စစ်ကောင်စီလက်နက်ကိုင်တပ်ဖွဲ့များ၏ ဆက်လက်အကြမ်းဖက်ဖြိုခွင်းမှုများကြောင့် ယနေ့ (မတ် ၁၁) ညနေပိုင်း ၅ နာရီအချိန်ထိ ဆက်သွယ်မေးမြန်းချက်များအရ မြိုင်၊ မြင်းခြံ၊ မန္တလေး၊ ပဲခူးနှင့် မြောက်ဒဂုံတို့တွင် လူ ၁၁ ဦးအထိ သေဆုံးခဲ့ပြီး မကွေးတိုင်း အနောက်မြောက်ပိုင်းမြိုင်မြို့တွင် အဆိုးရွားဆုံးဖြစ်ကာ ၇ ဦးအထိ သေဆုံးခဲ့ရသည်။ ညပိုင်း၌ ထားဝယ်မြို့ ကြက်စားပြင်ရပ်ကွက်အတွင်း ဝင်ရောက်ပစ်ခတ်သဖြင့် လူတစ်ဦး ထပ်မံသေဆုံးခဲ့ရပြီး မတ် ၁၁ ရက်တွင် အာဏာသိမ်းစစ်ကောင်စီလက်ချက်ကြောင့် သေဆုံးသူ စုစုပေါင်း ၁၂ ဦးအထိ ရှိခဲ့သည်။
စစ်ကောင်စီ၏အကြမ်းဖက်ဖြိုခွင်းမှုများကြောင့် ယနေ့ သေဆုံးသူ ၁၁ ဦးရှိ
