အလွှာစုံပါဝင်သော စစ်အာဏာရှင်ဆန့်ကျင်ရေး လူထုအုံကြွမှုကြီးဖြစ်လာ 

စစ်အာဏာသိမ်းမှုဆန့်ကျင်ရေး ဆန္ဒပြပွဲများစတင်ပြီး လေးရက်မြောက်နေ့တွင် ဌာနစုံမှ နိုင်ငံ့ဝန်ထမ်းများ၊ ရဲအရာရှိများ၊ ဘုန်းကြီးရဟန်းများ၊ တိုင်းရင်းသားများပါမကျန် အလွှာစုံမှ လူတန်းစားအသီးသီး ပါဝင်လာပြီး တစ်နိုင်ငံလုံးအတိုင်းအတာဖြင့် လူထုအုံကြွမှုကြီးဖြစ်လာသည်။

အဓိကမြို့ကြီးများဖြစ်သော ရန်ကုန်၊ နေပြည်တော်နှင့် မန္တလေးတို့အပြင် နိုင်ငံတစ်ဝန်းရှိ မြို့အသီးသီးတွင် ဒေသခံ ပြည်သူလူထုနှင့်အတူ ဌာနဆိုင်ရာဝန်ထမ်းများလည်း ပူးပေါင်းပါဝင်ကာ စစ်အာဏာသိမ်းမှုကို ဆန့်ကျင်ကြောင်းနှင့် အာဏာဖီဆန်ရေးလှုပ်ရှားမှု (Civil Disobedience Movement – CDM) ကိုထောက်ခံကြောင်း ကြွေးကြော်ပြီး နေ့စဉ်ဆက်တိုက်ဆန္ဒပြနေကြခြင်းဖြစ်သည်။

ဖေဖော်ဝါရီ ၁ ရက်နေ့ စစ်တပ်က အာဏာသိမ်းယူပြီးချိန်မှစ၍ နိုင်ငံ့ဝန်ထမ်းအများအပြားက လုပ်ငန်းခွင်ဝင် ရုံးတက်ခြင်းမပြုဘဲ CDM လှုပ်ရှားမှုကို စတင်ခဲ့ကြခြင်းဖြစ်ကာ ဒေသအသီးသီးရှိ ပြည်သူလူထုကလည်း နိုင်ငံ့ဝန်ထမ်းများ၏ အာဏာဖီဆန်ရေးလှုပ်ရှားမှုကို ထောက်ခံပြီး လမ်းပေါ်ထွက်ဆန္ဒပြကြသည်။

“ရုံးမတက်နဲ့ ရုန်းထွက်” ဆိုသော ဝန်ထမ်းများ၏ အာဏာဖီဆန်ရေး CDM လှုပ်ရှားမှု 

နေပြည်တော်ရှိ ဝန်ကြီးဌာနများအနက် CDM လှုပ်ရှားမှုတွင် ကျန်းမာရေးနှင့် အားကစား၊ နိုင်ငံခြားရေးဝန်ကြီး၊ သယံဇာတနှင့် သဘာဝပတ်ဝန်းကျင်ထိန်းသိမ်းရေး၊ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး၊ စီမံကိန်း၊ ဘဏ္ဍာရေးနှင့် စက်မှု၊ လျှပ်စစ်နှင့် စွမ်းအင်၊ ဆောက်လုပ်ရေး၊ ပို့ဆောင်ရေးနှင့် ဆက်သွယ်ရေး၊ ပညာရေး၊ ပြန်ကြားရေး၊ စိုက်ပျိုးမွေးမြူရေးနှင့် ဆည်မြောင်း၊ တိုင်းရင်းသားလူမျိုးရေးရာ၊ ပြည်ထောင်စုရှေ့နေချုပ်ရုံး၊ ပြည်ထောင်စုစာရင်းစစ်ချုပ်ရုံးမှသည် အဂတိလိုက်စားမှုတိုက်ဖျက်ရေး ကော်မရှင်ရုံးတို့မှ ဝန်ထမ်းများအထိ ပါဝင်ကြသည်။

ပြည်သူ့ဝန်ထမ်းများ၏ အာဏာဖီဆန်ရေး CDM လှုပ်ရှားမှုတွင် ဝန်ကြီးဌာနအသီးသီးမှ  အဆင့်မြင့်အရာရှိကြီးများ ပါဝင်ခြင်းရှိမရှိ လူသိရှင်ကြား မသိရသေးသော်လည်း အမှုထမ်း၊ အရာထမ်းအများစု ပါဝင်ကြောင်း သက်ဆိုင်ရာဝန်ထမ်းများ၏ စုပေါင်းထုတ်ပြန်ကြေညာချက်များ၊ ၎င်းတို့၏ လူမှုကွန်ရက်စာမျက်နှာများအရ သိရသည်။ 

စစ်အာဏာရှင်စနစ်ကို ဆန့်ကျင်၍ ငြိမ်းချမ်းစွာ ဆန္ဒထုတ်ဖော်နေသော အခြားပြည်သူ့ဝန်ထမ်းများနည်းတူ CDM လှုပ်ရှားမှု အောင်မြင်သည်အထိ ဆက်လက်ပူးပေါင်း ပါဝင်ဆောင်ရွက်သွားမည်ဖြစ်ပြီး မည်သူတစ်ဦးတစ်ယောက်၏ သွေးထိုးလှုံ့ဆော်ခြင်းကြောင့် မဟုတ်ဘဲ မိမိတို့၏ သဘောဆန္ဒအလျောက် ပူးပေါင်းပါဝင်ခြင်းဖြစ်ကြောင်းလည်း CDM လှုပ်ရှားမှုတွင် ပါဝင်သော ဝန်ထမ်းများက အတည်ပြုချက်များ ထုတ်ပြန်ထားကြသည်။

“စစ်အာဏာသိမ်းမှုကို လုံးဝ (လုံးဝ) ဆန့်ကျင်ကန့်ကွက်ကြောင်းနှင့် ဒီမိုကရေစီနည်းလမ်းတကျ ပြည်သူ့ဆန္ဒဖြင့် ပွင့်လင်းမြင်သာစွာ ရွေးကောက်တင်မြှောက်ထားသော ပြည်သူ့အစိုးရ၏ စီမံခန့်ခွဲမှုအောက်တွင်သာ ပြည်သူ့ဝန်ထမ်းပီသစွာ တာဝန်ထမ်းဆောင်လိုကြောင်း” CDM တွင်ပါဝင်သော ပြည်တွင်းအခွန်ဦးစီးဌာနဝန်ထမ်းများ၏ ဖေဖော်ဝါရီ ၈ ရက်စွဲတပ် ကြေညာချက်က ဆိုသည်။

“မဲမသမာမှုကြောင့် အာဏာသိမ်းရပါသည်” ဆိုသော အကြောင်းပြချက်ကို လုံးဝလက်မခံနိုင်ကြောင်း ယခင်က ရွေးကောက်ပွဲကော်မရှင်ရုံးတွင် တာဝန်ထမ်းဆောင်ခဲ့ပြီး ပြည်တွင်းအခွန်ဦးစီးဌာနတွင် တာဝန်ထမ်းဆောင်နေသူ ဝန်ထမ်းတစ်ဦးက ၎င်း၏ Facebook စာမျက်နှာတွင် ရေးတင်ထားသည်။

ပြည်ပရင်းနှီးမြှုပ်နှံမှုလုပ်ငန်းများနှင့် ပတ်သက်၍ အရေးကြီးဆုံးသော ဝန်ကြီးဌာနတစ်ခုဖြစ်သည့် ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန (MIFER) အောက်ရှိ ပြည်ထောင်စုဝန်ကြီးရုံး၊ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန (DICA)၊ နိုင်ငံခြားစီးပွားဆက်သွယ်ရေးဦးစီးဌာနတို့မှ ပြည်သူ့ဝန်ထမ်းများကလည်း CDM လှုပ်ရှားမှုတွင် ပါဝင်ကြောင်း ကြေညာချက်ထုတ်ပြန်ထားသည်။ 

၂၀၀၈ ဖွဲ့စည်းပုံအခြေခံဥပဒေ အခန်း (၈)၊ ပုဒ်မ ၃၅၄ (က) ပါ ပြဋ္ဌာန်းချက်များနှင့်အညီ မိမိ၏ထင်မြင်ယူဆချက်၊ မိမိ၏ယုံကြည်ချက်များကို လွတ်လပ်စွာ ဆန္ဒထုတ်ဖော်ခြင်းသာဖြစ်ကြောင်း CDM လှုပ်ရှားမှုတွင် ပါဝင်သော အထက်ပါ ဝန်ကြီးဌာနဝန်ထမ်းများ၏ ကြေညာချက်က ဆိုပြီး အခြားဝန်ကြီးဌာနများ၏ ဝန်ထမ်းများ ပူးပေါင်းပါဝင်ကြရန်လည်း နှိုးဆော်ထားသည်။ 

အာဏာသိမ်းယူမှုကို ကန့်ကွက်ရှုတ်ချကြောင်းနှင့် မိမိတို့၏ စိတ်ဆန္ဒမပါဘဲ ဖွဲ့စည်းထားသော အုပ်ချုပ်ရေးယန္တရားတွင် ပါဝင်ထမ်းဆောင်လိုခြင်း မရှိသောကြောင့် စစ်အာဏာသိမ်းမှုကို ဆန့်ကျင်ရန် CDM လှုပ်ရှားမှုတွင် ပူးပေါင်းပါဝင်ခြင်းဖြစ်ကြောင်းလည်း ၎င်းတို့၏ ကြေညာချက်က ဆိုသည်။ 

ဝန်ထမ်းများ၏ အာဏာဖီဆန်ရေးလှုပ်ရှားမှုကြောင့်  ဌာနဆိုင်ရာ အကြီးအကဲတို့က ဖိအားပေးခြင်း၊ အမိန့်ညွှန်ကြားချက်များ ထုတ်ပြန်ခြင်းတို့ဖြင့် ဟန့်တားကြသည် ဟု သိရသည်။

စစ်အာဏာရှင်ဆန့်ကျင်ရေးတွင် ကျန်းမာရေးနှင့် ပညာရေးဝန်ထမ်းများ ရှေ့တန်းမှပါဝင် 

မြို့အသီးသီးရှိ နေ့စဉ်ရက်ဆက် ဆန္ဒပြမှုများတွင် ပြည်သူလူထုနှင့်အတူ ပူးပေါင်းပါဝင်ဆန္ဒပြသူများအနက် ရှေ့တန်းမှ ပါဝင်လာသူများမှာ ကျန်းမာရေးနှင့် ပညာရေးဝန်ထမ်းများ ဖြစ်ကြသည်။ 

စစ်အာဏာသိမ်းမှု စတင်သည့်နေ့ကတည်းကပင် ရန်ကုန်နှင့် မန္တလေးကဲ့သို့သော မြို့ကြီးရှိ ပြည်သူ့ဆေးရုံကြီးများမှ ဆရာဝန်များနှင့် သူနာပြုများက တစ်ပြိုင်နက်တည်း ဆန့်ကျင်ကန့်ကွက်ခဲ့ကြသည်။ 

စစ်အာဏာရှင် အလိုမရှိကြောင်း ဆန္ဒပြပွဲတွင် အဖြူအစိမ်း ကျောင်းဝတ်စုံဝတ်ဆင်လျက် တက်တက်ကြွကြွပါဝင်ခဲ့သူ ဆရာမတစ်ဦးက “ကျွန်မ ဘယ်ပါတီဝင်မှ မဟုတ်ဘူး။ ကျွန်မတို့ဟာ နိုင်ငံရေးသမားလည်း မဟုတ်ဘူး။ ဘာလို့ပါလဲဆို နိုင်ငံရဲ့အရေးမို့။ ကျွန်မတို့ဟာ မဲရုံ သေသေချာချာလုပ်လာတာ။ စနစ်တကျလုပ်လာတာ။ မဲမမှားဘူး။ မဲမှားတယ်ဆိုတဲ့အတွက် ကျွန်မတို့ မသမာမှုလုပ်တယ်လို့ ပြောတဲ့အတွက် ကျွန်မတို့ကို စော်ကားတဲ့အတွက် ကျွန်မတို့ပါတာ” ဟု ပြောသည်။

အမျိုးသားဒီမိုကရေစီအဖွဲ့ချုပ် (NLD) က အပြတ်အသတ်အနိုင်ရရှိခဲ့သော ၂၀၂၀ ရွေးကောက်ပွဲ တွင် မဲရုံတာဝန်ကျ ဆရာဆရာမများ ဘက်လိုက်မှုရှိသည်ဟု ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၏ စွပ်စွဲမှုကို ယင်းဆရာမက ရည်ညွှန်းပြောဆိုခြင်းဖြစ်ပြီး ဆန္ဒပြပွဲတွင် ပါဝင်ခြင်းသည် တပ်မတော်ကို ဆန့်ကျင်နေခြင်း မဟုတ်ဘဲ ကလေးငယ်များအတွက် အတိတ်က ပညာရေးမျိုး ပြန်မရောက်စေရန် ဖြစ်သည်ဟုလည်း ရန်ကုန်မြို့လှည်းတန်းလမ်းဆုံအနီး ဆန္ဒပြပွဲတွင် ပါဝင်ခဲ့သူ ထိုဆရာမက ဆိုသည်။ 

မြို့အသီးသီးတွင် ပြည်သူလူထုနှင့်အတူ လမ်းပေါ်ထွက်ဆန္ဒပြမှုများတွင် ကျန်းမာရေးနှင့် ပညာရေးဝန်ထမ်းများနည်းတူ ဆရာဆရာမများ၊ တက္ကသိုလ်နှင့် အထက်တန်းအဆင့် ကျောင်းသားကျောင်းသူများပင် ပါဝင်လာသည်ကို တွေ့ရှိရသည်။ 

“စစ်အာဏာသိမ်းတာကို အခုမတော်လှန်ရင် နောက် ၁၀ နှစ်လောက်နေလည်း တော်လှန်နိုင်တော့မှာ မဟုတ်ဘူး။ အမေ (ဒေါ်အောင်ဆန်းစုကြည်) က အရမ်းအသက်ကြီးနေပြီ။ လူငယ်တွေက အခုလို ဦးဆောင်လုပ်နေတာ အရမ်းဝမ်းသာတယ်။ တိုင်းပြည်ငြိမ်းချမ်းတဲ့အထိ ဆန္ဒပြသွားမယ်” ဟု ရန်ကုန်မြို့ချီတက်ဆန္ဒပြပွဲတွင် ပါဝင်သူ အသက် ၂၁ နှစ်အရွယ် ဥပဒေပညာကျောင်းသူ မမြင့်မြတ်စုက ပြောသည်။ 

စစ်အာဏာရှင် ဖြုတ်ချရေးနှင့် ဒီမိုကရေစီရရှိရေး ကြွေးကြော်သံများနှင့် ဒေသအသီးသီးမှ ဆန္ဒပြပွဲကြီးများတွင် ကျန်းမာရေးနှင့် ပညာရေးဝန်ထမ်းများနည်းတူ အခြားဌာနစုံမှ ဝန်ထမ်းများလည်း ပူးပေါင်းပါဝင်ကြသည်ကို တွေ့ရသည်။ 

ဆန္ဒပြမှုတွင် ပူးပေါင်းပါဝင်ကြသည့် အထွေထွေဝန်ထမ်းများတွင် သစ်တောဦးစီးဌာနမှ ဝန်ထမ်းများ၊ အထွေထွေအုပ်ချုပ်ရေးဦးစီးဌာနမှ ဝန်ထမ်းများ၊ လျှပ်စစ်နှင့် ဆောက်လုပ်ရေးကဲ့သို့သော ဝန်ထမ်းများအပါအဝင် မီးရထားဝန်ထမ်းများလည်း ပါဝင်လျက်ရှိသည်ကို ဓာတ်ပုံမှတ်တမ်းများနှင့်တကွ တွေ့ရှိရ သည်။ 

ရှမ်းပြည်နယ် မဘိမ်းမြို့တွင်လည်း အထွေထွေအုပ်ချုပ်ရေးဦးစီးဌာန၊ သစ်တောဦးစီးဌာန၊ ပညာရေး၊ မြို့နယ်လျှပ်စစ်၊ ဆောက်လုပ်ရေးနှင့် ဆေးရုံဝန်ထမ်းများ ယနေ့ လမ်းပေါ်ထွက်လာကာ  ဒေသခံ ပြည်သူလူထုနှင့်အတူ စစ်အာဏာသိမ်းအုပ်ချုပ်မှုကို ဆန့်ကျင်ကြသည်။ 

မဲစာရင်းမှားယွင်းနေသည်ဟု အကြောင်းပြကာ ဗိုလ်ချုပ်မှူးကြီးမင်းအောင်လှိုင်က အာဏာသိမ်းယူခဲ့ခြင်းမှာ လက်နက်အားကိုးဖြင့် ပြည်သူကို အနိုင်ကျင့်ခြင်းသာဖြစ်ကြောင်း အဆိုပါဆန္ဒပြပွဲတွင် ပါဝင်ခဲ့သူ ဒေါက်တာရင်မင်းပိုက်က ပြောသည်။ 

“အတင်းအဓမ္မပဲ ပြည်သူကို သိသိနဲ့အနိုင်ကျင့်တာ။ အနိုင်ကျင့်တယ်ဆိုတာကို အကုန်လုံးလည်း သိနေတာပဲ” ဟု ၎င်းက ပြောသည်။ 

ထို့ပြင် ယမန်နေ့က ရန်ကုန်မြို့ ဆန္ဒပြပွဲများအတွင်း လိင်စိတ်ခံယူမှုကွဲပြားသူများ (LGBTQ) ကလည်း ၎င်းတို့၏ Rainbow အမှတ်အသားအလံများ ကိုင်ဆောင်လျက် ပူးပေါင်းပါဝင်ဆန္ဒပြကြသည်ကို တွေ့ရသည်။

ယနေ့တွင်လည်း ရန်ကုန်မြို့၌ တပ်မတော်က အာဏာသိမ်းယူခြင်းကို ဆန့်ကျင်ကန့်ကွက်ကြောင်းနှင့် ဖမ်းဆီးထိန်းသိမ်းထားသည့် ခေါင်းဆောင်များကို ပြန်လွှတ်ပေးရန် မသန်စွမ်းအဖွဲ့အစည်းများမှ လူဦးရေ ၇၀ ကျော်က မရမ်းကုန်းမြို့နယ် သမိုင်းလမ်းဆုံမှ လှိုင်မြို့နယ် လှည်းတမ်းလမ်းဆုံအထိ ချီတက်ဆန္ဒပြကြသည်။ 

အဆိုပါဆန္ဒပြပွဲတွင် ပါဝင်သူ ဒေါ်ယုကသူက “နိုင်ငံသားတွေရဲ့ သဘောဆန္ဒနဲ့ မကိုက်ညီတဲ့ မဲရလဒ်ဖြစ်နေရင် နိုင်ငံသားတွေက အခုလို ဆန္ဒပြတဲ့အရေးအခင်းတွေ ဖြစ်လာစရာ အကြောင်းမရှိဘူးလေ။ ဒါကို ကြည့်ခြင်းအားဖြင့် နိုင်ငံသားတွေရဲ့ သဘောဆန္ဒနဲ့ တက်လာတဲ့ အစိုးရလား၊ နိုင်ငံသားတွေရဲ့ သဘောဆန္ဒမပါဘဲ မဲလိမ်မဲခိုးပြီး တက်လာတဲ့အစိုးရလားဆိုတာ အခု ဒီတစ်ပတ်ထဲမှာ ဖြစ်နေတဲ့ အခြေအနေကို ကြည့်တာနဲ့ သိသာတယ်” ဟု ပြောသည်။ 
 

‘ပြည်သူ့ရဲ’ ဆိုသော ဆန္ဒပြကြွေးကြော်သံများအကြား ရဲအရာရှိတချို့လည်း ပူးပေါင်းပါဝင်လာ

တစ်နိုင်ငံလုံးအတိုင်းအတာဖြင့် စစ်အာဏာသိမ်းမှု ဆန့်ကျင်ရေးဆန္ဒပြပွဲများတွင် လက်ရှိတာဝန်ထမ်းဆောင်နေသော မြန်မာနိုင်ငံရဲတပ်ဖွဲ့ဝင် ရဲအရာရှိများကိုယ်တိုင် ဆန္ဒပြပြည်သူလူထုနှင့် ပူးပေါင်းပါဝင်လာသည်ကို ယနေ့ (ဖေဖော်ဝါရီ ၉) တွင် တွေ့ရှိရသည်။

အုပ်ချုပ်ရေးမြို့တော် နေပြည်တော်၌ ယနေ့ဆန္ဒပြပွဲတွင် တာဝန်ထမ်းဆောင်နေဆဲ ရဲအုပ်အဆင့်ရှိ ရဲအရာရှိတစ်ဦးက စစ်အာဏာသိမ်းမှု ဆန့်ကျင်ရေးဆန္ဒပြမှုအတွက် ကိုယ်တိုင်ပါဝင်ခဲ့ပြီး စာစီစာရိုက်ကာ အဆင်သင့်ယူဆောင်လာသော ‘အနာဂတ်အတွက် တောင်းဆိုမှု’၊ ‘ကတိပြုသစ္စာ’ နှင့် ‘ကြွေးကြော်သံ’ ဆိုသော စာရွက်စာတမ်းများနှင့် ကိုယ်တိုင်စည်းရုံးဟောပြောခဲ့သည်။ 

ဒုရဲအုပ်လောင်းသင်တန်း အမှတ်စဉ် ၆၂ ဆင်း ကိုယ်ပိုင်အမှတ် လ/ ၂၂၈၅၈ ကိုင်ဆောင်သူ ရဲအုပ်ခွန်အောင်ကိုကိုဆိုသူ အဆိုပါ ရဲအရာရှိက ဆန္ဒပြပြည်သူများနှင့်အတူ ပူးပေါင်းပြီးနောက် ၎င်းကို ထုတ်ပေးရန် ရဲတပ်ဖွဲ့က တောင်းဆိုခဲ့သော်လည်း ဆန္ဒပြပြည်သူများက အဆိုပါ ရဲအရာရှိကို ထုတ်ပေးခြင်း မပြုခဲ့ပေ။ 

ထို့အတူ မကွေးတိုင်းဒေသကြီး မကွေးမြို့တွင်လည်း ယနေ့နံနက်ပိုင်း ဆန္ဒပြပွဲတွင် တာဝန်ထမ်းဆောင်နေဆဲ ရဲတပ်ဖွဲ့ဝင် ၃ ဦးက ဆန္ဒပြပြည်သူများနှင့်အတူ ပူးပေါင်းပါဝင်ခဲ့ကြောင်း Magway Post သတင်းဌာန ၏ Facebook စာမျက်နှာတွင် တင်ထားသည်။

တနင်္သာရီတိုင်းဒေသကြီး မြိတ်မြို့တွင်လည်း ဆန္ဒပြပြည်သူလူထုနှင့်အတူ ရဲတပ်ဖွဲ့ဝင်တစ်ဦး ပူးပေါင်းပါဝင်ခဲ့ကြောင်း လူမှုကွန်ရက်တွင် ဓာတ်ပုံမှတ်တမ်းများနှင့်တကွ တွေ့ရှိရသည်။ 

တိုင်းရင်းသားများနှင့် ရဟန်းသံဃာများလည်း ပါဝင်ဆန္ဒပြ 

 

အရှိန်မြင့်တက်လာသော နိုင်ငံတစ်ဝန်းရှိ စစ်အာဏာရှင်အလိုမရှိကြောင်း ဆန္ဒပြပွဲများအတွင်း တိုင်းရင်းသားလူနည်းစုများလည်း ပါဝင်လာသည်ကို တွေ့ရှိရသည်။ ချင်းပြည်နယ်၊ ကချင်ပြည်နယ်၊ မွန်၊ ကရင်နှင့် ကယားပြည်နယ်တို့ရှိ မြို့ကြီးများတွင် ဒေသခံတိုင်းရင်းသား များက စစ်အာဏာသိမ်းမှုကို ဆန့်ကျင်ကြောင်း၊ စစ်အာဏာရှင်အလိုမရှိကြောင်း ဆန္ဒထုတ်ဖော်ခဲ့ကြသည့်နည်းတူ ရန်ကုန်နှင့် မန္တလေးရှိ တိုင်းရင်းသားများကလည်း ဆန္ဒပြပွဲများတွင် ပါဝင်နေကြသည်ကို တွေ့ရသည်။ 

ယမန်နေ့မှစ၍ မကွေးနှင့် မန္တလေးတိုင်းဒေသကြီးအတွင်းရှိ မြို့အချို့တွင် ဆန္ဒပြပြည်သူလူထုနှင့် ရဟန်းသံဃာအချို့လည်း ပူးပေါင်းပါဝင်ကာ ဆန္ဒပြခဲ့သည်ကို တွေ့ရှိရသည်။ ယနေ့တွင် ရန်ကုန်မြို့လယ် ဆူးလေဘုရားအနီး သံဃာတော်အချို့ ချီဆက်ဆန္ဒပြကြသည်။ 

ကိုဗစ်နိုင်တင်းကြောင့် သံဃာတော်အချို့ နေရပ်ဇာတိ၌ ပြန်လည်သီတင်းသုံးနေသဖြင့် ၂၀၀၇ ရွှေဝါရောင်အရေးအခင်းကဲ့သို့ သံဃာတော်အများအပြား ပါဝင်နိုင်ခြင်းမရှိကြောင်း ရန်ကုန်မြို့လယ် ချီတက်ဆန္ဒပြပွဲတွင် ပါဝင်ခဲ့သူ သံဃာတော်တစ်ပါးက မိန့်သည်။ 

စစ်ကိုင်းတိုင်းဒေသကြီးမြို့တော် မုံရွာတွင်လည်း စစ်အာဏာရှင်အလိုမရှိကြောင်း ယနေ့ ချီတက်ဆန္ဒပြပွဲ၌ ရဟန်းသံဃာများ ပါဝင်ခဲ့သည်ကို တွေ့ရသည်။ 

ပြည်သူလူထု၏ ငြိမ်းချမ်းစွာ ဆန္ဒပြမှုများ ဖြိုခွင်းခံရ 

ဆန္ဒပြမှု  လေးရက်မြောက်နေ့ဖြစ်သည့် ယနေ့ (ဖေဖော်ဝါရီ ၉) တွင် နေပြည်တော်၊ မန္တလေးနှင့် ပဲခူးမှ ငြိမ်းချမ်းစွာ ဆန္ဒပြနေသော ပြည်သူလူထုကို ရဲတပ်ဖွဲ့က အင်အားသုံးဖြိုခွင်းခြင်း၊ ဖမ်းဆီးခြင်း၊ သေနတ်ဖြင့် ပစ်ခြင်းများ ရှိခဲ့သည်။ 

ယနေ့ နေ့လယ်ပိုင်းတွင် အုပ်ချုပ်ရေးမြို့တော် နေပြည်တော်၏ အချက်အချာနေရာဖြစ်သော သပြေကုန်းအဝိုင်းအနီး ဆန္ဒပြပြည်သူလူထုကို ရဲတပ်ဖွဲ့က ဖြိုခွင်းခဲ့သည်။ ငြိမ်းချမ်းစွာ ဆန္ဒပြနေသူများကို ရေပိုက်အမြောက်ဖြင့် ထိုးခွင်းခြင်းအပြင် သေနတ်ဖြင့်ပါ ပစ်ခတ်ဖြိုခွင်းခဲ့သည့်အတွက် အနည်းဆုံး ၅ ဦး ဒဏ်ရာရရှိခဲ့သည်။ 

ဆန္ဒပြသူများကို ဆေးဘက်ဆိုင်ရာ အကူအညီပေးနေသောအဖွဲ့၏ အဆိုအရ သေနတ်ထိမှန်ခဲ့သော ပရဟိတအသင်းမှ အသက် ၂၀ အရွယ် အမျိုးသမီးမှာ စိုးရိမ်ရသည်အထိ ဒဏ်ရာပြင်းထန်ခဲ့သည်။ 

အဆိုပါ အမျိုးသမီးမှာ ဦးခေါင်းကို ထိမှန်ခဲ့ခြင်းဖြစ်ပြီး “အသက်လုနေရပါတယ်။ အလွန်စိုးရိမ်ဖွယ်ရာ အခြေအနေပါ။ ရင်ဘတ်ထိတဲ့အမျိုးသားကလည်း ထုတ်ချင်းပေါက်ပါ။ ကျည်အစစ်လို့ မှတ်ချတ်ချထားပါတယ်” ဟု ဒဏ်ရာရရှိခဲ့သူများကို ကုသပေးနေသည့် ဆရာဝန်က ပြောသည်။ 

နေပြည်တော် သပြေကုန်းအဝိုင်းအနီးတွင် ရဲတပ်ဖွဲ့၏ ဖြိုခွင်းမှုအတွင် သေနတ်ကျည်ဆန်ထိမှန်ပြီး အပြင်းအထန်ဒဏ်ရာရရှိခဲ့သူနှစ်ဦးမှာ အသက် ၂၀ အရွယ် မသွယ်သွယ်ခိုင်နှင့် အသက် ၂၃ နှစ်အရွယ် ကိုဆိုဝေဆိုသူတို့ဖြစ်ကြသည်။ 

နေပြည်တော် ခုတင် ၁၀၀၀ ဆေးရုံတွင် ဆေးကုသမှု ခံယူနေရသည့် ထိုဒဏ်ရာရရှိသူနှစ်ဦးကို ကျန်းမာရေးဝန်ကြီးဌာနအမိန့်ဖြင့် စစ်ဆေးရုံသို့ ပြောင်းရွှေ့ပေးရန် ဖိအားပေးခံနေရသည်ဟုလည်း နီးစပ်သည့်ဆရာဝန်တစ်ဦးက ပြောသည်။ 

“အရေးပေါ်ရောက်ရောက်ခြင်း ကျန်းမာရေးဝန်ကြီးဌာနရဲ့ အမိန့်ဆိုပြီး စစ်ဆေးရုံဘက်ကို ပြောင်းပေးဖို့ ဆေးရုံအုပ်က ပြောပါတယ်။ ဒါပေမဲ့ ခုတင် ၁၀၀၀ မှာရှိတဲ့ ဆရာဝန်တွေက ဒီလူနာတွေက ဒီအနေအထားမှာ အသက်အန္တရာယ်ရှိတဲ့အတွက် ပြောင်းပေးဖို့ မဖြစ်နိုင်ဘူးဆိုပြီး ဒီမှာပဲ အတင်းခေါ်ထားပြီး ကုနေပါတယ်” ဟု အဆိုပါဆရာဝန်က ပြောသည်။ 

နေပြည်တော်တွင် ဆန္ဒပြပြည်သူလူထုကို ရဲတပ်ဖွဲ့က အင်အားသုံးဖြိုခွင်းခဲ့သည့်နည်းတူ မန္တလေးမြို့၌လည်း စစ်အာဏာရှင်ဆန့်ကျင်ရေးဆန္ဒပြသူများကို ရဲတပ်ဖွဲ့က ရာဘာကျည်ဖြင့် ပစ်ဖောက်ဖြိုခွင်းခဲ့သည့်အပြင် မျက်ရည်ယိုဗုံးများ၊ ရေပိုက်အမြောက်များ အသုံးပြုကာ ဖြိုခွင်းခဲ့သည်။ 

ဆန္ဒပြသူ အနည်းဆုံး ၃၈ ဦးကို ရဲတပ်ဖွဲ့က အင်အားသုံးဖမ်းဆီးခဲ့ပြီး ဖမ်းဆီးခံရသူများ ပြန်လွှတ်ပေးရေးအတွက် ညနေ ၄ နာရီကျော်အချိန်အထိ မန္တလေးမြို့တွင် ပြည်သူလူထုနှင့် ရဲတပ်ဖွဲ့ဝင်များအကြား အချေအတင်ဖြစ်နေကြောင်း သိရသည်။ 

ထို့အတူ ပဲခူးတိုင်းဒေသကြီး ပဲခူးမြို့တွင် ဆန္ဒပြသူများကို ရဲတပ်ဖွဲ့က အင်အားသုံးဖြိုခွင်းခဲ့ကြောင်း သိရသည်။