ရန်ကုန် – အမျိုးသမီးတစ်ဦးကို လိင်ပိုင်းဆိုင်ရာအဓမ္မပြုကျင့်မှု စွပ်စွဲချက်ဖြင့် ရဲက အလိုရှိနေသည့် စစ်ကိုင်းတိုင်း ကန့်ဘလူခရိုင် ဇီးကုန်းမြို့နယ်ရှိ နတ်တလူသာသနာပြုစခန်းကျောင်းထိုင်ဆရာတော် ဦးဝရဉာဏကို ယနေ့ ဖမ်းဆီးရလိုက်ပြီဖြစ်ကြောင်း သိရသည်။
ယနေ့ မွန်းလွဲ ၂ နာရီခန့်တွင် ရဲအင်အား ၇၀ ခန့်ဖြင့် ၎င်းအား သွားရောက်ဖမ်းဆီးခဲ့ခြင်းဖြစ်ကြောင်း၊ သို့႔သော် ထိုဘုန်းကြီးအပြင် အမှုတွင် ကြံရာပါဟု စွပ်စွဲခံရသူ ဘုန်းကြီး၏ တကာအချို့ကို မဖမ်းဆီးနိုင်သေးသောကြောင့် ထိုသာသနာပြုစခန်းတွင် လူစုလူဝေးလည်း ဖြစ်ပေါ်ခဲ့ကြောင်း ဒေသခံများကဆိုသည်။
အသက် ၅၁ နှစ်အရွယ် ထိုဘုန်းကြီးကို မကျေနပ်သောရွာသားများရှိနေရာ လက်လွန်ခြေလွန် မဖြစ်ပေါ်ရန် ဘုန်းကြီးကို ရဲစခန်းမှာပင် လုံခြုံရေးအစောင့်အရှောက်များဖြင့် ထိန်းသိမ်းထားကြောင်း နတ်တလူသာသနာပြုစခန်း၏ ဂေါပအဖွဲ့ဝင် ဦးဟန်ဝင်းက Myanmar Now ကိုပြောသည်။
“ဘုန်းကြီးကို ရဲစခန်းမှာပဲ တိုင်းသံဃနာယကအဖွဲ့ရဲ့ သြဝါဒခံယူစေပြီး လူဝတ်လဲပေးတာ၊ လောလောဆယ်စခန်းမှာ ထိန်းထားတယ်။ လူသတ်မှုတွေ ဖြစ်ကုန်မှာစိုးလို့” ဟု ၎င်းကပြောသည်။
ယခုကိစ္စနှင့်ပတ်သက်ပြီး ကန့်ဘလူမြို့မရဲစခန်းသို့ ဆက်သွယ်မေးမြန်းသော်လည်း ပြန်လည်ဖြေကြားခြင်းမရှိပေ။
ဇီးကုန်းမြို့နယ်တွင် နေထိုင်သည့် အသက် ၂၄ နှစ်အရွယ် မအိစန္ဒာသည် မိဘများကိုးကွယ်သည့် တစ်ရွာတည်းနေ နတ်တလူသာသနာပြုစခမ်းမှ ဦးဝရဉာဏ (ခေါ်) လူအမည် ဦးဝင်းနိုင်မှ လွန်ခဲ့သောသုံးနှစ်ခန့်က လက်ထပ်ပါမည်ဟုဆိုကာ အတင်းအဓမ္မကာမရယူခဲ့သည်ဟု ကန့်ဘလူမြို့မရဲစခန်းတွင် ကာမလိမ်လည်ရယူမှုဖြင့် အမှုဖွင့်တိုင်ကြားခဲ့ခြင်းဖြစ်သည်။
တိုင်ကြားမှုမှာ ကြန့်ကြာသည်ဟုဆိုကာ မအိစန္ဒာက မန္တလေးမြို့တွင် ၂၀၁၈ ခုနှစ်အတွင်း သတင်းစာရှင်းလင်းပွဲ ပြုလုပ်ခဲ့သေးသည်။ ထို့နောက် ကန့်ဘလူမြို့မရဲစခန်းက ပုဒ်မပြောင်းလဲ တပ်ဆင်ခဲ့ပြီး ဖမ်းဝရမ်းလေးကြိမ်ထုတ်ခဲ့သည် ဟု ဦးဟန်ဝင်းက ပြောသည်။
“တိမ်းရှောင်နေတဲ့လကတော့ မမှတ်မိတော့ဘူး။ ဒါပေမယ့် ဦးဝရဉာဏ ရုံးချိန်းပျက်ကွက်တာ လေးခါလောက်ရှိပြီ။ ကလေးမလေး သားအမိတွေကတော့ လုံခြုံရေးအရ အဲဒီအချိန်ကတည်းက တခြားရွာပြောင်းနေကြတယ်” ဟု ၎င်းကဆိုသည်။
