ရသေ့တောင်မြို့နယ်၊ မယူကမ်းဒေသတွင် တပ်မတော်စစ်ကြောင်း၏ ပစ်ခတ်မှုကြောင့် အငူမော် – မောင်တောကားလမ်းဘေးရှိ အောင်ဗလကျေးရွာမှ အမျိုးသမီးနှစ်ဦး ဒဏ်ရာရရှိခဲ့သည်ဟု မိသားစုဝင်များက ပြောသည်။
ဇူလိုင် ၁၁ တွင် အငူမော်မြောက်ဘက်ရှိ ဒုံးပိုက်ကျေးရွာသို့ ဦးတည်လာသည့် တပ်မတော်စစ်ကြောင်း၏ ပစ်ခတ်မှုကြောင့် အောင်ဗလကျေးရွာမှ အသက် ၃၇ နှစ် အရွယ်ရှိ ဒေါ်ဦးသန်းခင်နှင့် အသက် ၄၈ နှစ်အရွယ် ဒေါ်မသန်းဝင်း ဒဏ်ရာရရှိခဲ့သည်။
ဒေါ်မသန်းဝင်းသည် ဘယ်ဘက်ဒူးဆစ်တွင် ရှပ်ထိဒဏ်ရာ ရရှိခဲ့ပြီး၊ ဒေါ်ဦးသန်းခင်သည် ညာဘက်လက်မောင်း ကျည်ဆန်ဖောက်ဝင်သွားရာ ညာဘက်လက်မောင်းကျိုးသည်အထိ ဒဏ်ရာပြင်းထန်ခဲ့သဖြင့် ထိုနေ့ညနေပိုင်းတွင် စစ်တွေဆေးရုံသို့ ပို့ဆောင်ထားရကြောင်း ဒေါ်ဦးသန်းခင်၏ ခင်ပွန်းဖြစ်သူ ဦးထွန်းထွန်းဝင်းက ပြောသည်။
အဆိုပါကျေးရွာအနီး တိုက်ပွဲဖြစ်ပွားခြင်းမရှိဘဲ တပ်မတော်စစ်ကြောင်းက အလွတ်ပစ်ခတ်သွားခြင်း ဖြစ်သည်ဟုလည်း ဒဏ်ရာရရှိသူများနှင့် ဆွေမျိုးတော်စပ်သည့် အမည်မဖော်လိုသူတစ်ဦးက ပြောသည်။
“ဘယ်လိုဖြစ်လဲဆိုရင် တောင်ဘက်ကနေ လာကြတာ။ ရွာရဲ့ အနောက်ဘက်ကားလမ်းဘေးအတိုင်း သူတို့( တပ်မတော်) ခြေလျင်လာကြတယ်။ လာတဲ့အချိန်မှာ အောင်ဗလရွာကိုအရောက်မှာ အိမ် လေးအိမ်ကို ပစ်တယ်။ အိမ်လေးအိမ် ပစ်တာမှာ နောက်ဆုံးအိမ်မှာ ပုန်းနေတဲ့ မိန်းမနှစ်ယောက်ကို ကျည်ထိသွားတယ်။ တစ်ယောက်မှာ လက်မောင်းကျိုးသွားတယ်။ နောက်တစ်ယောက်မှာ ခြေဆစ်မှာ ရှပ်ထိသွားတယ်” ဟု အမည်မဖော်လိုသည့် ၎င်းက ပြောသည်။
သို့သော် ထိုကျေးရွာအနီး တပ်မတော်နှင့် ရက္ခိုင့်တပ်တော်(AA) အကြား နှစ်ဖက်တိုက်ပွဲဖြစ်ပွား၍ ပစ်ခတ်ခြင်းသာဖြစ်သည်ဟု ရခိုင်ပြည်နယ်အစိုးရဖွဲ့မှ လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး မင်းသန့်က Myanmar Now ကို ပြောသည်။
ရသေ့တောင်မြို့နယ် အုပ်ချုပ်ရေးမှူး ဦးအောင်မြင့်သိန်းကလည်း “ဖြစ်တာတော့ ဟုတ်ပါတယ်။ ကျွန်တော်တို့ ဆေးရုံတွေဘာတွေ ပို့လိုက်ပြီ။ သေချာတာကတော့ ရွာက သတင်းပို့တာပေါ့လေ။ ကျည်ဆန်မှန်တယ်ဆိုလား။ အဲဒါကတော့ ရဲက ဆက်ပြီးစစ်မှာပေါ့။ ကျွန်တော်တို့ကတော့ အဲလို သိပ်မသိဘူး။ ဒဏ်ရာရတယ်။ ဒဏ်ရာရတော့ အုပ်ချုပ်ရေးမှူးကို ပြောတယ်။ ဆေးရုံကို ရဲနဲ့ လွှတ်ပေးလိုက်တယ်။ အဲဒီလောက်ပဲ သိတယ်” ဟု ပြောသည်။
အဆိုပါ အောင်ဗလကျေးရွာသည် ရသေ့တောင်မြို့နှင့် ၁၁ မိုင်ခန့် ဝေးကွာပြီး အိမ်ခြေ ၆၀ ကျော်နှင့် လူဦးရေ ၃၀၀ ကျော် နေထိုင်လျက်ရှိသည်။ ဇူလိုင် ၁၂ တွင်လည်း အငူမော် – မောင်တော ကားလမ်းမပေါ်ရှိ ကိုးတန်ကောက်ကျေးရွာနှင့် မောင်တောမြို့နယ်တောင်ပိုင်း အင်းဒင်ကျေးရွာကြား လက်နက်ကြီးပစ်ခတ်သံများကို ကြားရသည်ဟု ဒေသခံများက ပြောသည်။
ပြီးခဲ့သည့် ဇွန် ၂၂ ကလည်း ရသေ့တောင်မြို့နယ်အစပ် မောင်တောမြို့နယ်တောင်ပိုင်း၊ အင်းဒင်အုပ်စုအနီး ဆားငံတက်ချောင်းအတွင်း နယ်ခြားစောင့်ရဲတပ်ဖွဲ့ဝင်များနှင့် ရက္ခိုင့်တပ်တော် (AA) တို့ကြား ထိတွေ့တိုက်ပွဲ ဖြစ်ပွားခဲ့သည်။
ရခိုင်တိုင်းရင်းသားမျိုးနွယ်များအစည်းအရုံး (Rakhine Ethnics Congress) ၏ ဇူလိုင် ၇ အထိ စာရင်းများအရ ရသေ့တောင်မြို့နယ်တစ်ခုတည်းတွင် စစ်ရှောင်ဦးရေ ၃၇,၀၀၀ ခန့်ရှိပြီး ရခိုင်ပြည်နယ်တစ်ခုလုံးတွင် စစ်ရှောင်ဦးရေ ၁၉၀,၀၀၀ ကျော်အထိရှိလာသည်။
