သင်္ကြန်ရုံးပိတ်ရက်ရှည်ကာလ ဧပြီ ၁၀ မှ ၁၉ အထိ ဆယ်ရက်တာအတွင်း အခြေခံ လူတန်းစားများကို ဆန်၊ ဆီ၊ ဆား ကဲ့သို့ အခြေခံစားသောက်ကုန် (၅) မျိုးကို အစိုးရက ထောက်ပံ့ကူညီပေးသွားမည်ဟု နိုင်ငံတော် အတိုင်ပင်ခံရုံးက ထုတ်ပြန်လိုက်သည်။
ပုံမှန်ဝင်ငွေမရှိသည့် အခြေခံလူတန်းစား အိမ်ထောင်စုတစ်စုလျှင် ဆန် ၈ ပြည်၊ ဆီ ၅၀ သား၊ ဆား ၅၀ သား၊ ပဲ တစ်ပိဿာ၊ ကြက်သွန် တစ်ပိဿာ၊ စုစုပေါင်း (၅) မျိုးကို ဧပြီ ၁၀ မှစ၍ အခမဲ့ဖြန့်ဝေသွားမည်ဟု ထုတ်ပြန်ချက်တွင် ဖော်ပြထားသည်။
ထို့ပြင် ပြည်သူများ၊ ဘာသာရေးအဖွဲ့အစည်းများနှင့် ပြည်တွင်းလူမှုရေးအဖွဲ့အစည်းများ အနေနှင့်လည်း ဧပြီ လကုန်သည်အထိ ဓာတ်အားသုံးစွဲမှု ‘၁၅၀ ယူနစ်‘ အထိ အခမဲ့ ပေးသွားမည်ဟု ပါရှိသည်။ သို့သော် သံရုံးများ၊ ကုလသမဂ္ဂနှင့် နိုင်ငံတကာအဖွဲ့အစည်းများမှာ အခမဲ့ပေးမည့်အထဲ ပါဝင်မည်မဟုတ်ပေ။
ယခု ထုတ်ပြန်ချက်တွင် “ဒေါ်အောင်ဆန်းစုကြည်ထံသို့ နိုင်ငံအနှံ့အပြားမှ ပြည်သူများ၏ တင်ပြချက်များကို စိစစ်၍ နိုင်ငံတော်အစိုးရက ဖြည့်ဆည်းဆောင်ရွက်ပေးနိုင်မည့် အခြေအနေများကို ရှာဖွေသုံးသပ်ခဲ့သည်” ဟု ပါရှိသည်။
အခြေခံစားသောက်ကုန်များကို အခမဲ့ ဖြန့်ဖြူးရာတွင် “မလိုလားအပ်သော လေလွင့်မှုများ၊ ကြန့်ကြာမှုများ၊ အဂတိလိုက်စားမှုများ မဖြစ်ပေါ်စေရေးအတွက် တိုင်းနှင့် ပြည်နယ်အစိုးရများ၏ ကြီးကြပ်မှု” နှင့် ဌာနဆိုင်ရာများ၊ ကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ် (UMFCCI)၊ ရပ်မိရပ်ဖများ၊ လူမှုရေးအသင်းအွဲ့များ၊ ပရဟိတလူငယ်များနှင့် ပူးပေါင်းဆောင်ရွက်သွားမည် ဟု အစိုးရက ထုတ်ပြန်သည်။
