လူနေရပ်ကွက်ပေါ် လက်နက်ကြီးကျည်ကျသဖြင့် အမျိုးသမီးတစ်ဦးသေဆုံးခဲ့ပြီး ငါးဦးဒဏ်ရာရရှိခဲ့သည့် ဖြစ်စဉ်တစ်ခု ရခိုင်ပြည်နယ် မင်းပြားမြို့နယ်တွင် ဖေဖော်ဝါရီလ ၂၈ ရက် (ယနေ့) မနက်အစောပိုင်းက ဖြစ်ပွားခဲ့သည်။
တပ်မတော်နှင့် ရက္ခိုင့်တပ်တော် (AA)တို့ မင်းပြားမြို့နယ် ရာမောင်မြစ်အတွင်း ယနေ့မနက်အစောပိုင်းက တိုက်ပွဲဖြစ်ပွားခဲ့ရာ မင်းဘာကြီးရပ်ကွက်ထဲသို့ လက်နက်ကြီးကျည် ကျရောက်ခဲ့ခြင်းဖြစ်သည်ဟု မင်းပြားမြို့နယ် ပြည်နယ်လွှတ်တော်အမတ် ဦးလှသိန်းအောင်က ပြောသည်။
မနက် ၂ နာရီခွဲခန့်တွင် ယင်းမြို့နယ် ကြပ်စင်တံတားအနီးတွင် သေနတ်သံများကြားရကြောင်း၊ “သေနတ်သံတွေကြားပြီး မကြာဘူး မင်းဘာကြီးရပ်ကွက်ထဲကို လက်နက်ကြီးကျပြီး အဲဒီအမျိုးသမီး သေဆုံးသွားတာ” ဟု ဦးလှသိန်းအောင်က ပြောသည်။
သေဆုံးသွားသူအမျိုးသမီးမှာ ဒေါ်သန်းနုရီ(၄၅ နှစ်)ဖြစ်ပြီး ရင်ဘတ်တွင် လက်နက်ကြီးကျည်ထိမှန်သည့် ဒဏ်ရာဖြင့် သေဆုံးသွားခြင်းဖြစ်သည်ဟု ၎င်းက ဆိုသည်။
မနက် ၅ နာရီခန့်တွင် တိုက်ပွဲပြီးဆုံးသွားပြီးနောက် သေဆုံးသူနှင့် ဒဏ်ရရသူများကို မင်းပြားဆေးရုံသို့ ပို့ဆောင်ထားသည်ဟု ၎င်းက ဆက်လက်ပြောသည်။
ယနေ့မနက် ၂ နာရီလောက်က စစ်ကူပို့ရန်အတွက် စစ်သားအများအပြားတင်ဆောင်လာသည့် တပ်မတော်ရေမှ ဇက်သင်္ဘောသုံးစီးကို မင်းပြားမြို့နယ် ကြပ်စင်တံတားအနီးတွင် AAတပ်ဖွဲ့က ကြားဖြတ်တိုက်ခိုက်ခဲ့သည်ဟု AA ပြောခွင့်ရအရာရှိ ခိုင်သုခက ပြောသည်။
မင်းပြားမြို့နယ်အတွင်း ကျရောက်ပေါက်ကွဲခဲ့သည့် လက်နက်ကြီးမှာ တပ်မတော်ဘက်မှ ပစ်ခတ်လိုက်ခြင်းဖြစ်သည်ဟု ၎င်းက စွပ်စွဲသည်။
လက်နက်ကြီးပေါက်ကွဲမှုကြောင့် အမျိုးသမီးသေဆုံးရသည့် ဖြစ်စဉ်နှင့် ပတ်သက်၍ အနောက်ပိုင်းတိုင်းစစ်ဌာနချုပ်မှ ပြောရေးဆိုခွင့်ရှိသူ ဗိုလ်မှူးကြီးဝင်းဇော်ဦးကို Myanmar Now က ဖုန်းဖြင့်ဆက်သွယ်မေးမြန်းသော်လည်း ဖုန်းလက်ခံဖြေကြားခြင်းမရှိပေ။
ရခိုင်တိုက်ပွဲများအတွင်း အရပ်သားသေဆုံးသည့်အရေအတွက်မှာ ဆက်လက်မြင့်တက်လျက်ရှိပြီး ရခိုင်အခြေစိုက် အရပ်ဘက်အဖွဲ့အစည်းများ၏ အချက်အလက်များအရ တိုက်ပွဲပြင်းထန်သည့် တစ်နှစ်ကျော်အတွင်း အရပ်သားသေဆုံးသူအရေအတွက် ၁၀၀ ကျော်အထိရှိနေသည်။
