ရှမ်းပြည်နယ်မြောက်ပိုင်း နောင်ချိုမြို့နယ်တွင် လေကြောင်းတိုက်ခိုက်မှု ပါဝင်သော တိုက်ပွဲများ နေ့စဉ်ဖြစ်ပွားနေရာ ဒေသခံ အများအပြား ပိုမိုလုံခြုံမည့်နေရာများတွင် သွားရောက်ခိုလှုံနေကြရကြောင်း သိရသည်။
မန္တလေးတိုင်းနှင့် ကပ်လျက်တည်ရှိသော ထိုမြို့နယ်တွင် အခြေစိုက်သည့် မန္တလေးပြည်သူ့ကာကွယ်ရေးတပ်မတော် (MDY-PDF) က ဧပြီ ၅ ရက်မှ ၁၁ ရက်အထိ ဟိုခိုကျေးရွာ ဝန်းကျင်တွင် တိုက်ပွဲများ ဆက်တိုက် ဖြစ်ပွားနေပြီး မြို့နယ်တစ်ခုလုံးကို စစ်မျက်နှာ ကျယ်ပြန့်လာနေသည်ဟု ဆိုသည်။
မိနစ်ပိုင်း၊ နာရီပိုင်းကြာသည့် တိုက်ပွဲများအပြင် တစ်နေကုန် တိုက်ခိုက်ကြသည့် ရင်ဆိုင်တိုက်ပွဲများလည်း ဖြစ်ပွားနေခြင်းဖြစ်ကြောင်း MDY-PDF ပြန်ကြားရေးတာဝန်ခံ ကိုအော်စမွန်က ပြောသည်။
နောင်ချိုမြို့နယ် တိုက်ပွဲများအတွင်း စစ်ကောင်စီ မြေပြင်တပ်က ၈၁ မမ စိန်ပြောင်း၊ ၁၂၀ မမ တာဝေးပစ်လက်နက်၊ ၁၅၅ မမ အမြောက်များ အသုံးပြုနေသည်၊ တစ်ပတ်တာ ရင်ဆိုင်တိုက်ပွဲ အကြိမ် ၂၀ ကျော်အတွင်း နှစ်ဖက်စလုံးမှ ထိခိုက် ကျဆုံးမှုများရှိသည်ဟု MDY-PDF ပြန်ကြားရေးတာဝန်ခံက ဆိုသည်။
“တိုက်ပွဲတွင်းကတော့ စစ်ကောင်စီဘက်က လက်နက်ကြီးအစုံနဲ့ ပစ်တယ်၊ လေကြောင်းကတော့ ၁၀ ရက်နေ့ တစ်ရက်တည်းမှာတင် ၅ ကြိမ်လုပ်တယ်၊ ည ၁၂ နာရီကျော်အထိကို လေယာဉ်နဲ့ ပစ်နေတုန်း၊ စစ်ဆင်ရေးအတွင်းမှာတော့ ကိုယ့်ဘက်ကလည်း ရဲဘော်အချို့ ထိခိုက်ကျဆုံးရှိတယ်၊ စစ်ကောင်စီဘက်ကလည်း ၁၀ ရက်နေ့ တစ်ရက်တည်းကို ၃၀ ကျော် ကျတယ်” ဟု ကိုအော်စမွန်က ဆိုသည်။
သေဆုံးမှု ကိန်းဂဏန်းနှင့် ပတ်သက်၍ Myanmar Now က သီးခြား အတည်ပြုနိုင်ခြင်းမရှိသေးသလို စစ်ကောင်စီကလည်း တိုက်ပွဲသတင်းများကို အမှောင်ချထားသည်။
ဒေသတွင်းသတင်းဌာန ရွှေဖီမြေက တိုက်ပွဲများကြောင့် ဒေသခံတို့ နောင်ချိုမြို့ပေါ်သို့ သွားရောက် ခိုလှုံနေကြကြောင်း ရေးသားထားသည်။
တိုက်ပွဲများ စတင်သည့် ဧပြီ ၅ ရက်နေ့ ပစ်ခတ်မှုများကြောင့် သံဘိုကျေးရွာမှ ကလေး ၂ ဦး သေဆုံးသည်ဟု သျှမ်းသံတော်ဆင့်သတင်းဌာန အွန်လိုင်းသတင်းတစ်ပုဒ်တွင် ဖော်ပြထားသည်။
၁၁ လအရွယ် စိုင်းဝါဝါထွန်း၊ သူ၏ အစ်မ ၁၄ နှစ်အရွယ် နန်းမအေးတို့ သေဆုံးပြီး မိဘများ ဒဏ်ရာရသဖြင့် ဆေးရုံပို့ထားရသည်ဟု ဒေသခံများက ပြောကြောင်း ဧပြီ ၆ ရက်နေ့ထုတ် အဆိုပါသတင်းတွင် ဖော်ပြထားသည်။
စစ်တပ်က ပစ်ခတ်သည့် လက်နက်ကြီးကျည်ကြောင့် ထိုသို့ သေဆုံး၊ ဒဏ်ရာရခြင်းဖြစ်သည်ဟု ဖော်ပြထားသော်လည်း စစ်ကောင်စီက ယနေ့အထိ ထိုသတင်းနှင့် ပတ်သက်ပြီး တုံ့ပြန်ခြင်း မရှိသေးပေ။
နောင်ချိုတွင် အခြေစိုက် လှုပ်ရှားနေသော MDY-PDF သည် ထိုဒေသရှိ တအာင်းအမျိုးသားလွတ်မြောက်ရေးတပ်မတော် (TNLA) နှင့် ပူးပေါင်းပြီး မန္တလေးတိုင်းအတွင်းမှ စစ်ကောင်စီပစ်မှတ်များကိုလည်း တိုက်ခိုက်လျက်ရှိသည်။
အာဏာသိမ်းမှုဆန့်ကျင်သူတို့ ပစ်သတ်ခံရပြီးနောက် မန္တလေးမှ လက်နက်ကိုင် ခုခံလိုသူ အများအပြားမှာ TNLA နယ်မြေသို့ သွားရောက်ခဲ့ကြသည်။
နောင်ချိုမြို့သည် မန္တလေးတိုင်း ပြင်ဦးလွင်မြို့နှင့် ကပ်လျက် တည်ရှိသည်။
(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
