ရခိုင်ပြည်နယ်မြောက်ပိုင်း၊ ကျောက်တော်မြို့နယ်၊ မီးဝရွာ ဘုန်းကြီးကျောင်းအတွင်းသို့ လက်နက်ကြီးကျည် ကျရောက်ပေါက်ကွဲခဲ့ပြီး ဘုန်းတော်ကြီးတစ်ပါးအပါအဝင် ၅ ဦး ဒဏ်ရာရသွားကြောင်း မီးဝရွာ ရာအိမ်မှူး ဦးမောင်သာစိန်က ပြောသည်။
ယနေ့မနက် ၁ နာရီဝန်းကျင်ခန့်တွင် မီးဝရွာအနီး၌ လက်နက်ကြီး၊ လက်နက်ငယ် ပစ်ခတ်သံများ ကြားရသည့်အတွက် ရွာသားအချို့မှာ ရွာဘုန်းကြီးကျောင်းအတွင်း သွားရောက်တိမ်းရှောင်စဉ် အဆိုပါ ဘုန်းကြီးကျောင်းအတွင်း လက်နက်ကြီးတစ်လုံး ကျရောက်ပေါက်ကွဲခဲ့ခြင်းဖြစ်သည်ဟု ၎င်းက ဆိုသည်။
ကျောင်းထိုင်ဆရာတော်၊ ကိုရင်တစ်ပါးနှင့် အဆိုပါဘုန်းကြီးကျောင်းတွင် စာသင်နေသည့် ကျောင်းဆရာမနှင့် ကျောင်းသားနှစ်ဦး စုစုပေါင်း ၅ ဦး ဒဏ်ရာရသွားခြင်းဖြစ်ကြောင်း၊ ဆရာတော်မှာ ရင်ဘတ်တွင် လက်နက်ကြီးစ ထိမှန်ခဲ့ပြီး ကိုရင်ငယ်မှာ ဦးခေါင်းကို ထိမှန်ခဲ့သည့်အတွက် စိုးရိမ်ရသည်ဟု ၎င်းက ဆက်လက်ပြောသည်။
ယနေ့မနက် ၂ နာရီခန့်က မီးဝရွာအရှေ့ဘက် ကုလားတန်မြစ်ထဲတွင် ကျောက်ချ ရပ်နားထားသည့် တပ်မတော် စစ်ရေယာဉ် ၃ စီးကို ရခိုင်လက်နက်ကိုင်အဖွဲ့ AA က လာရောက်တိုက်ခိုက်သည့်အတွက် မိနစ် ၃၀ ခန့် ကြာအောင် တိုက်ပွဲဖြစ်ပွားခဲ့ကြောင်း အနောက်ပိုင်းတိုင်းစစ်ဌာနချုပ် တိုင်းဦးစီး ဗိုလ်မှူးကြီးဝင်းဇော်ဦးက ပြောသည်။
မီးဝရွာအနီးမှ တိုက်ခိုက်လာသည့်အတွက် အဆိုပါနေရာကို ပြန်လည်ပစ်ခတ်ခဲ့ကြောင်းနှင့် ရွာသားတွေ ဒဏ်ရာရသည့် ဖြစ်စဉ်တွင် မည်သည့်ဘက်က ပစ်ခတ်မှုကြောင့်ဖြစ်ကြောင်း အတိအကျ မသိရဟု ၎င်းက ဆက်လက်ပြောသည်။
“ သူလို့လည်း လက်နက်ကြီးသုံးတာပဲ၊ သူပစ်ကိုယ်ပစ်ဆိုတော့ ဘယ်ဘက်ကပစ်လို့ ထိလဲဆိုတာ ဘယ်သိနိုင်မလဲ ” ဟု ဗိုလ်မှူးကြီးဝင်းဇော်ဦးက ပြောသည်။
တိုက်ပွဲဖြစ်ပွားမှုနှင့်ပတ်သက်၍ ရခိုင်လက်နက်ကိုင်အဖွဲ့ AA မှ ပြောခွင့်ရအရာရှိ ခိုင်သုခကို ဆက်သွယ်မေးမြန်းရာတွင် ယခုလ၂၉ ရက်နေ့က တိုက်ပွဲဖြစ်ပွားခဲ့သော်လည်း ယနေ့တွင် တိုက်ပွဲဖြစ်ပွားမှု မရှိကြောင်း ပြန်လည်ဖြေကြားသည်။
“ သေနတ်သံတွေကြားလို့ ဘုန်းကြီးကျောင်းကို သွားပုန်းပြီး မကြာဘူး လက်နက်ကြီးကျတာပဲ ” ဟု ဦးမောင်သာစိန်က ပြောသည်။
- ကျောက်တော်တွင် တပ်မတော်နှင့် AA တို့ တိုက်ပွဲဖြစ်၍ အရပ်သား ၂ ဦး ဒဏ်ရာရ
- မင်းပြားတွင် တပ်နှင့် AA တို့ ၅ ရက်အတွင်း တိုက်ပွဲ အကြိမ် ၂၀ ကျော်ဖြစ်ပွား
ဒဏ်ရာရသူ ၅ ဦးကို မနက် ၆ နာရီခန့်တွင် ကျောက်တော်ဆေးရုံသို့ ပို့ဆောင်ခဲ့ပြီး ထို့မှတဆင့် စစ်တွေဆေးရုံသို့ ဆက်လက်ပို့ဆောင်နေသည်ဟု ကျောက်တော်မြို့နယ် ပြည်နယ်လွှတ်တော်အမတ် ဦးမောင်လှကျော်က ပြောသည်။
“ အခုကတော့ စစ်တွေဆေးရုံကို ကျောက်တော်ဆေးရုံက လွှဲလိုက်ပြီ ရောက်တော့မယ် ” ဟု ဦးမောင်လှကျော်က ယနေ့ နေ့လယ် ၃ နာရီခန့်က ပြောသည်။
ကျောက်တော်မြို့နယ်၏ မြောက်ဘက်အစွန်ဆုံး ချင်းပြည်နယ်အစပ်တွင်ရှိသည့် အဆိုပါကျေးရွာမှာ အိမ်ခြေ ၃၆၀ ခန့်နှင့် လူဦးရေ ၁၄၀၀ကျော် ရှိပြီး ကုလားတန်မြစ်၏ အနောက်ဘက်တွင် ရှိသည်။
စက်တင်ဘာလ ၂၉ ရက်နေ့ကလည်း အဆိုပါရွာအနီး တပ်မတော်နှင့် AA တို့ တိုက်ပွဲဖြစ်ပွားမှုကြောင့် ရွာသား ၂ ဦး ဒဏ်ရာရရှိခဲ့ပြီး ယနေ့ ၅ ဦး ထပ်မံ၍ ဒဏ်ရာရမှုကြောင့် မီးဝရွာတွင် ၃ ရက်အတွင်း ဒဏ်ရာရသူ ၇ ဦးအထိ ရှိလာခဲ့သည်။
ရခိုင်ပြည်နယ်စစ်ပွဲများအတွင်း အရပ်သားများ ထိခိုက်၊ ဒဏ်ရာရမှုအတွက် စုံစမ်းစစ်ဆေးရေးကော်မရှင် ဖွဲ့ပေးရန် မြောက်ဦးမြို့နယ် ပြည်နယ်လွှတ်တော်အမတ် ဦးထွန်းသာစိန်က စက်တင်ဘာ ၂၃ ရက်နေ့တွင် အဆိုတင်သွင်းခဲ့ပြီး ရခိုင်ပြည်နယ်လွှတ်တော်က အတည်ပြုခဲ့သည်။
