Google ဝန်ဆောင်မှုများ ရယူအသုံးပြုခွင့် Huawei ကုမ္ပဏီပိတ်ပင်ခံရ

အမေရိကန်နည်းပညာကုမ္ပဏီကြီး Google က တရုတ်အီလက်ထရောနစ်နှင့် တယ်လီကွန်းကုမ္ပဏီ Huawei နှင့် ဆက်အလုပ်မလုပ်တော့ရန် ဆုံးဖြတ်လိုက်ပေရာ အဆိုပါ တရုတ်ကော်ပိုရေးရှင်းကြီးအတွက် ပြင်းထန်သော ထိုးနှက်ချက်တစ်ရပ် ဖြစ်သွားပြီဟု နည်းပညာသတင်းစာမျက်နှာများစွာက အတည်ပြုထားသည်။

နောက်ဆက်တွဲအနေဖြင့် Huawei က အသစ်ထွက်လာမည့် စမတ်ဖုန်းများတွင် Google apps များကို အသုံးပြုခွင့် ဆုံးရှုံးတော့မည်ဟု BBC သတင်းက အတည်ပြုထားသည်။

အမေရိကန်ကုမ္ပဏီများ အလုပ်တွဲမလုပ်ရမည့် စာရင်းထဲသို့ Huawei ကို သမ္မတထရမ့်အစိုးရက ထည့်လိုက်ပြီး နောက်ဆက်တွဲတွင် Google ၏ အဆိုပါဆုံးဖြတ်ချက် ထွက်ပေါ်လာခြင်း ဖြစ်သည်။

Google က ကြေညာချက်တစ်ရပ် ထုတ်ပြန်ခဲ့ကာ အဆိုပါကြေညာချက်ထဲတွင် အစိုးရသတ်မှတ်ချက်ကို လိုက်နာမည်ဖြစ်ကြောင်းနှင့် သတ်မှတ်ချက်များကို ပြန်လည်ဆန်းစစ်နေပြီဖြစ်ကြောင်း အသိပေး ထုတ်ပြန်ထားသည်။

လက်ရှိအချိန်အထိ Huawei က မှတ်ချက်ပေးရန် ငြင်းဆန်ထားသည်။

Google က ပေးအပ်သည့် အင်တာနက်လုံခြုံရေးဆိုင်ရာ အဆင့်မြှင့်မှုများ၊ နည်းပညာပံ့ပိုးမှုများကို Huawei က ရတော့မည် မဟုတ်ပေရာ အသစ်ထွက်လာမည့် Huawei စမတ်ဖုန်းများတွင် YouTube နှင့် Google apps များ အသုံးပြုနိုင်တော့မည် မဟုတ်ပေ။

ဆောင်းပါးဖတ်ရှုရန်

• ‘ဟွာဝေး’ ဟုခေါ်သော သို့လောသို့လောဖြစ်စရာ ကုမ္ပဏီတစ်ခုအကြောင်း

လက်ရှိသုံးနေသူများကို ထိခိုက်မည်တော့မဟုတ်ပေ။ လက်ရှိအသုံးပြုသူများအနေဖြင့် apps များကို update လုပ် အဆင့်မြှင့်ခြင်းကို ဆက်လုပ်နိုင်မည်ဖြစ်ကာ၊ Google Play ကဲ့သို့သော ဝန်ဆောင်မှုများကို ရရှိဦးမည် ဖြစ်သည်။

အကယ်၍ Google က Andriod အသစ်ထုတ်ခဲ့လျှင် Huawei အနေဖြင့် အဆိုပါ OS စနစ်ကို ရယူနိုင်တော့မည် မဟုတ်ပေ။ Open source လိုင်စင်ကိုတော့ Huawei က ဆက်သုံးနေနိုင်မည်ဖြစ်သည်။

Google ၏ ယခုဆုံးဖြတ်ချက်ကြောင့် Huawei ၏ စီးပွားရေးမျက်နှာစာတွင် ကြီးစွာသော သက်ရောက်မှုများ ရှိသွားမည်ဖြစ်ကြောင်း CCS အတိုင်ပင်ခံကုမ္ပဏီမှ သုံးသပ်သူ ဘန်ဝုဒ်က ဆိုသည်။

Huawei သည် ၎င်း၏ 5G ကွန်ရက်၊ မိုဘိုင်းကိရိယာများမှတစ်ဆင့် စုံစမ်းထောက်လှမ်းမှုများ ပြုလုပ်မည်ကို အမေရိကန်ဦးဆောင်သော အနောက်အုပ်စုနိုင်ငံများက စိုးရိမ်တကြီး စောင့်ကြည့်လျက်ရှိသည်။

Huawei က ၎င်းသည် တရုတ်အစိုးရနှင့် မပတ်သက်ပါကြောင်း အကြိမ်ကြိမ် ငြင်းဆိုထားခဲ့သည်။

Ref: BBC