လူခြောက်ဦး သေဆုံးခဲ့သည့် ရခိုင်ပြည်နယ်မြောက်ပိုင်း ရသေ့တောင်မြို့နယ် ကျောက်တန်းကျေးရွာတွင် ၁၆ ရက်ကြာ တပ်မတော်က ပိတ်ဆို့စစ်ဆေးနေမှုများ ပြီးဆုံးသွားပြီဖြစ်၍ တပ်မတော်စစ်ကြောင်းမှာ မနေ့ညနေပိုင်းက အဆိုပါရွာမှ ပြန်လည်ဆုတ်ခွာသွားပြီဖြစ်ကြောင်း တပ်မတော် သတင်းမှန်ပြန်ကြားရေးအဖွဲ့မှ အတွင်းရေးမှူး ဗိုလ်မှူးချုပ်ဇော်မင်းထွန်းက Myanmar Now ကို ယနေ့ ပြောသည်။
“ လုံခြုံရေးကို နယ်မြေအလိုက် လှုပ်ရှားရတာဖြစ်တဲ့အတွက် သွားကြတာပါ ” ဟု ဗိုလ်မှူးချုပ်ဇော်မင်းထွန်းက ပြောသည်။
တပ်မတော်စစ်ကြောင်းများ ကျောက်တန်းရွာအတွင်း ပြန်လည်ဝင်ရောက်မရောက်ကိုမူ အတိအကျ မပြောနိုင်သေးကြောင်း ၎င်းက ဆက်လက်ပြောသည်။
ယမန်နေ့ညက ရွာတွင်းမှ တပ်များ ထွက်ခွာသွားကြောင်းကို ကျောက်တန်းရွာသား ကိုဇော်သန်းက အတည်ပြုသည်။
“ သူတို့ထွက်သွားကြပြီဗျ ကျွန်တော်တောင် အခု ကျွဲတွေကို ရေတိုက်ဖို့ ရွာပြင်ရောက်နေတာ ” ဟု ၎င်းက ပြောသည်။
ကျောက်တန်းရွာတွင် ရက္ခိုင့်တပ်တော် AA တပ်ဖွဲ့ဝင်များ ရှိနေသည်ဆိုသည့် သံသယကြောင့် ရွာသားများကို စစ်ဆေးရန် ဧပြီ ၃၀ ရက်နေ့ကတည်းက တပ်က ဝင်ရောက် ထိန်းချုပ်ထားခြင်းဖြစ်သည်။
ရွာသား ၂၇၅ ဦးကို ကျေးရွာစာသင်ကျောင်းအတွင်း စစ်ဆေးနေစဉ် ရုန်းရင်းဆန်ခတ်ဖြစ်၍ တပ်က ပစ်ခတ်မှုကြောင့် လူ ၆ ဦးသေဆုံးပြီး ၈ ဦးဒဏ်ရာရသွားကြောင်း တပ်က ထုတ်ပြန်ထားသည်။ ဒဏ်ရာရသူများထဲမှတစ်ဦးမှာလည်း ရန်ကုန်သို့ ပြောင်းရွှေ့ကုသစဉ် ထပ်မံသေဆုံးသွားသည်။
တပ်မတော်၏ နှစ်ပတ်ကျော်ကြာစစ်ဆေးမှုအတွင်း AA တပ်ဖွဲ့ဝင်များဖြစ်ကြောင်း ဝန်ခံသူ ၆ ဦးနှင့် အသေးစိတ် ဆက်လက်စစ်ဆေးနေသူ ၂ ဦးရှိကြောင်း တပ်မတော်က ပြောဆိုခဲ့ပြီး ၎င်းတို့ကို ဖမ်းဆီးထားပြီး ဥပဒေအရ အရေးယူရန် ဆက်လက် ဆောင်ရွက်သွားမည်ဟု ဆိုသည်။
တပ်မတော်စစ်ကြောင်းများ ပြန်လည်ထွက်ခွာသွားပြီးနောက် ယနေ့နေ့လယ်ပိုင်းတွင် အရပ်ဘက်အဖွဲ့အစည်းအချို့ ကျောက်တန်းကျေးရွာထဲ ဝင်ရောက်လာပြီး အကူအညီပေးရေးအတွက် စာရင်းကောက်ခံမှုများ ပြုလုပ်သွားသည်ဟု ရွာသားများက ပြောဆိုသည်။
တိုက်ပွဲများ၊ ငြိမ်းချမ်းရေးဖြစ်စဉ်များကို စောင့်ကြည့်မှတ်တမ်းတင်နေသည့် ရန်ကုန်အခြေစိုက် Burma Monitor အဖွဲ့၏ ဒီဇင်ဘာ ၁ ရက်မှ မေလ ပထမပတ်ထိ အချက်အလက်များအရ ရခိုင်မြောက်ပိုင်းတွင် တပ်မတော်နှင့် AA တို့အကြား တိုက်ပွဲပေါင်း ၁၀၀ ကျော် ဖြစ်ပွားခဲ့ပြီး အရပ်သားသေဆုံးမှု ၄၄ ဦးအထိ ရှိကြောင်း သိရှိရသည်။
